ކޯވިޑް19 ކާރިސާ ދުނިޔޭގައި ފެށުނުފަހުން ޕޮޒިޓިވް ވާމީހުންގެ އަދަދު ފުރަތަމަހަށް ނިއުޒިލޭންޑުގައި 200 އަށްވުރެ މައްޗަށް އަރައިފިއެވެ. މިގޮތުން މިހަފްތާގެ ހޮނިހިރުދުވަހު، ނިއުޒިލޭންޑުގައި ވަނީ 206 މީހުން ކޯވިޑަށް ޕޮޒިޓިވް ވެފައެވެ.
ހޮނިހިރު ދުވަހު 206 މީހަކު ކޯވިޑަށް ޕޮޒިޓިވް ވެފައިވާއިރު ނިއުޒީލޭންޑްގެ ސަރުކާރުން ދަނީ، އެގައުމުގެ 5 މިލިއަން މީހުންގެ އާބާދީއަށް ވެކްސިން ދީ ނިންމުމަށް މަސައްކަތް ކުރަމުންނެވެ.
ނިއުޒީލޭންޑުގެ އެންމެ އާބާދީ ބޮޑު ސިޓީކަމުގައިވާ އޯކްލޭންޑުގައި ކޯވިޑްގެ ޑެލްޓާ ވޭރިއެންޓް ފެތުރި، ރައްކާތެރިކަމުގެ ފިޔަވަޅުތައް އަޅާފައިވާތާ 3 މަސްދުވަސް ވެފައިވާއިރު، މިއަދު އެ ސިޓީގައިވަނީ 200 މީހަކު ކޯވިޑަށް ޕޮޒިޓިވް ވެފައެވެ.
އެހެންނަމަވެސް، ކޯވިޑް ފެތުރުން ހުއްޓުވުމަށް އަޅާފައިވާ ފިޔަވަޅުތަކަށް މިސިޓީގައި ހޯމަ ދުވަހުން ފެށިގެން ލުއި ދިނުމަށް ވަނީ ހަމަ ޖެހިަފއެވެ.
ލުއިދޭން ނިންމަމުން ނިއުޒީލޭންޑްގެ ބޮޑުވަޒީރު ޖަކިންޑާ އާރޑާރން ވިދާޅުވެފައިވަނި އެކަމަނާ ބޭނުންފުޅުވަނީ، އޯކްލޭންޑްގެ ރައްޔިތުންނަށް ސަމާ ގައާއި އަދި ކްރިސްމަސްގައި އެގައުމުގެ ދެކުނަށް ދަރުތުކޮށް އުޅުމުގެ ފުރުސަތު ދިނުމަށް ކަމަށެވެ.
"އޯކްލޭންޑްގެ ރައްޔިތުން އޯކްލޭންޑުގައި މި މުއްދަތުގައި ބަންދުކޮށްފައި އަހަރެމެންނަށް ނު ބޭތިއްބޭނެ، އެކަމެއް އަހަރެމެންނަށް ނުކުރެވޭނެ،" އޭނާ ވިދާޅުވެފައި ވެއެވެ.
ނިއުޒީލޭންޑްގެ ހެލްތު މިނިސްޓްރީން ބުނެފައިވާ ގޮތުގައި، އެގައުމުގެ 12 އަަހަރުން މަތީގެ އާބާދީގެ %78 މީހުން މިހާރު ވެކްސިންގެ ދެ ޑޯޒް ޖަހާ ނިމިފައިވާ ކަމުގައެވެ. އަދި %89 މީހުން އެއް ޑޯޒް ޖަހާ ނިންމާލެވިފައި ވާކަމުގައެވެ.
އެއްއިރަކު، ކޯވިޑް ކޮންޓްރޯލް ކުރުމުގައި ބޮޑު ކާމިޔާބީއެއް ހޯދާފައިވާ ގައުމެއްގެ ގޮތުގައި ފާހަގަ ވަމުން އައި ނިއުޒީލޭންޑަށް ޑެލްޓާ ވޭރިއެންޓް އެގައުމަށް އެތެރެވެގެން ދިޔަ ނުދީ ހިފެހެއްޓިފައެއް ނުވެއެވެ. ނަތީޖާއެއްގެ ގޮތުން، ކޮރޯނާ ވައިރަހާއެކީ ދިރިއުޅުމުގެ ސްޓްރަޓަޖީގެ ބަދަލުގައި އެގައުމުގެ ބޮޑުވަޒީރަށް މަޖުބޫރު ވެވަޑައިގަތީ ވައިރަސް ނައްތާލާނެ ސްޓަރަޓަޖީއަކާއެކީ ކުރިޔަށް ވަޑައިގަންނަވާށެވެ.
އެހެންނަމަވެސް އަދިވެސް ނިއުޒީލޭންޑްގައި ކޯވިޑްގެ ހާލަތު ހުރީ ދުނިޔޭގެ އެހެން ގައުމުތަކާ އަޅާބަލާއިރު އެތައް ގުނައަކުން ރަގަޅު ކޮށެވެ. މިގޮތުން މިހާތަނަށް އެގައުމުގައި ކޯވިޑް ޖެހިފައިވަނީ 7،000 މީހުންނަށްވުރެ މަދު އަދަދެއްގެ މީހުންނަށް ކަމަށްވާއިރު، މި ބަލީގައި އެގައުމުގައި މަރުވެފައިވަނީ އެންމެ 31 މީހުންނެވެ.
