މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ ލީޑަރު އަދި ދ.މީދޫ ދާއިޜާގެ މެންބަރު އަޙްމަދު ސިޔާމް މުޙައްމަދ (ސަން ސިޔާމް)ު، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހަށާއި، މިސަރުކާރަށް ވަރަށް ބޮޑަށް ތަޢުރީފްކުރައްވާ ވާހަކަފުޅު ދައްކަވައިފިއެވެ. ސަރުކާރަށާއި، ރައީސް ޞާލިހަށް ތަޢުރީފްކުރައްވާ ސިޔާމް ވާހަކަފުޅު ދެއްކެވީ އޭނާގެ ދާއިރާގައި ހިމެނޭ ދ.ބަނޑިދޫ ފުޓްސަލް ދަނޑު ހުޅުވުމަށް އެރަށުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ކުރިން މިސަރުކާރަށަށް ފާޑުވިދާޅުވި ސިޔާމަކީ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ވަރަށް އަރިސް ބޭފުޅެކެވެ. ކުރީ ސަރުކާރު ނިމުމާއި ހަމައަށް ކޯލިޝަންގައި ދެމި އޮތްނަމަވެސް ސަރުކާރުގެ ފަހުކޮޅު ދެބޭފުޅުންގެ މެދުގައި ޚިޔާލުތަފާތުވެފައިވާކަމަށް އަޑުފެތުރިފައިވެއެވެ. އަދި ރައީސް ޔާމީންގެ ވެރިކަން ނިމުމަށްފަހު ދެބޭފުޅުން އެކީގައި ފެނިފައިނުވެއެވެ. އަދި މާ ބޮޑު ގުޅުމެއް މިހާރު ނެތްކަމަށްވެސް ބައެއް ފަރާތްތަކުން ބުނެފައިވެއެވެ.
ބަނޑިދޫ ފުޓްސަލް ދަނޑު ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން މަޝްހޫރު ވިޔަފާރިވެރިޔާ ސިޔާމް ވިދާޅުވީ ކޯވިޑްގެ ހާލަތުން އަރައިގަނެވުނު ހަމައެކަނި ޤައުމަކީ ދިވެހިރާއްޖެކަމަށެވެ. އަދި ފަތުރުވެރިކަމާއި އިޤްތިޞާދު ހުޅުވިގެން ދިޔައީ ރައީސް އިބްރާހީމް މުޙައްމަދު ޞާލިޙްގެ މެނޭޖުމަންޓްގެ ރަނގަޅުކަމުންކަމަށް ވިދާޅުވެ ސިޔާމް ވަނީ ރައީސް އިބްރާހީމް މުޙައްމަދު ޞާލިޙަށް ތަޢުރީފް ކުރައްވާފައެވެ.
MP Shiyam president Ibrahim Mohamed Salih ah thaureef kurevvun pic.twitter.com/TfPE21Nvl8
— Adam Saeed (@AdamSae99374530) November 5, 2021
ރައީސުލްޖުމްހޫރިއްޔާ މި ޕެންޑަމިކާއި ގުޅޭގޮތުން ކުރެއްވި މަސައްކަތަކީ މުޅި ދުނިޔެއަށް ދައްކާ މިސާލެއް. ދަންނަވަންތޯ މުޅި ދުނިޔޭގައި މި ކޮވިޑްގެ ވަބާއިން ސަލާމަތްވި ހަމައެކަނި ޤައުމަކީ މި. ދިވެހިރާއްޖެ އިރާދަކުރައްވައިގެން މީގެ އަހަރެއްހާ ދުވަސްކުރިން ފަތުރުވެރިކަމާ އިޤްތިޞާދީ ކަންކަން ހުޅުވިގެން ދިއުމަކީ އިބްރާހީމް މުޙައްމަދު ޞާލިޙްގެ މެނޭޖުމަންޓްގައި ހުންނެވި ވަރަށް ރަނގަޅު ކަމެއްކަމަށް އަޅުގަނޑު ދެކެން. އެކަމަށްޓަކައި ރާއްޖޭގެ ރައީސުލްޖުމްހޫރިއްޔާއަށް އަޅުގަނޑު ޝުކުރު ދަންނަވަން.
– އަޙްމަދު ސިޔާމް މުޙައްމަދު
ސިޔާމް ސަރުކާރަށް ތަޢުރީފް ކުރައްވާފައިވާއިރު، ރައީސް ޔާމީންގެ މައްޗަށް ރިސޯޓެއްގެ ގޮތުގައި ފުއްގިރި ތަރައްގީކުރަން ކުއްޔަށް ދޫކުރުމުގެ މުޢާމަލާތާއި ގުޅިގެން ދައުވާ އުފުލާފައިވާ މަނީލޯންޑަރިންގެ ކުށުގެ ދައުވާއި ގުޅިގެން ސިޔާމްގެ ކުންފުނިތައްކަމަށްވާ ސަން ކޮންސްޓްރަކްޝަން އެންޑް އިންޖިނިއަރިން ޕްރައިވެޓް ލިމިޓެޑާއި ސަން އިންވެސްޓްމެންޓް ޕްރައިވެޓް ލިމިޓެޑް މެދުވެރިކޮށް އެ ފައިސާ ލޯންޑަކުރުމަށް ފަށަލަކޮށްފައިވާ މައްސަލާގައި ވަނީ ދައުވާ އުފުލާފައެވެ.
