ބޮލީވުޑުގެ މަޝްހޫރު ތަރި ޝާހިދު ކަޕޫރާއި އަންހެނުން މީރާ އަކީ ސޯޝަލް މީޑިއާގައި ގިނަ ބަޔަކު ނަމޫނާއެއްގެ ގޮތުގައި ބަލާ "ލޯބި" ޖޯޑެކެވެ.
ޝާހިދު ބޮލީވުޑުން މަޝްހޫރުކަން ހޯދާފައިވާ މިންވަރަށް މީރާވަނީ ސޯޝަލް މީޑިއާގައި މަޝްހޫރުކަން ހޯދާފައެވެ.
މިދިޔަ ހަފްތާގައި އާންމުން ހެއްވާލީ މިދެތަރިން އިންސްޓަގްރާމްގައި ކުރި "ބާލީހުގެ ހަނގުރާމަ" އިންނެވެ. މިދިޔަ އަންގާރަ ދުވަހު ޝާހިދުވަނީ އިންސްޓަގްރާމް ސްޓޯރީގައި އެމީހުންގެ އެނދުގައި ހުރި ބާލީސްތައް ފެންނާނެހެން ސެލްފީއެއް އާންމުކުރުމަށްފަހު މީރާއާ ސުވާލެއް ކޮށްފައެވެ. ޝާހިދު ތަކުރާރުކޮށް އަހާފައިވަނީ "މިހާގިނަ ބާލީސް އެނދުގައި ހުންނަން ބޭނުންވަނީ ކީއްވެތޯ؟" އެވެ. ޖަވާބުގައި މީރާ އިންސްޓަގްރާމް ސްޓޯރީގައި ބުނެފައިވަނީ އަމިއްލައަށް ތި ވަދެވެނީ ނުރައްކަލުގެ ތެރެއަށް ކަމަށާއި "އެ ވީޑިއޯ ވަރަށް އަވަހަށް އާންމު ވާނެ" ކަމަށެވެ. ނަމަވެސް މީގައި މީރާ ބުނެފައި ވަނީ ކޮން ވީޑިއޯއެއްގެ ވާހަކައެއް ކަމެއް ތަފްސީލުކޮށްދީފައެއް ނުވެއެވެ.
މިދިޔަ މަހު ރާއްޖޭގައި މުޅި އާއިލާ ޗުއްޓީހޭދަކުރުމަށްފަހު މިހާރު މުމްބާއީއަށް ގޮސްތިބި މި ދެމަފިރިން މިފަދަ ވަރަށްގިނަ ކަންކަން ސޯޝަލް މީޑިއާއިން އާންމުންނާ ހިއްސާކުރެއެވެ. އެގޮތުން ރާއްޖޭގައި އެމީހުން ހޭދަކުރި ޗުއްޓީގެ ގިނަ މަންޒަރުތައްވެސް ސޯޝަލް މީޑިއާއިން ފޭނުންނާ ހިއްސާކޮށް، ގިނަބައެއްގެ ސަމާލުކަމަށް އައިސްފައިވެއެވެ.
މަސައްކަތުގެ ދާއިރާއަށް ބަލާލާއިރު ޝާހިދު ދެން އެންމެ އަވަހަށް ފެންނާނީ މިހާރު ޝޫޓިންގ އެއްކޮށް ނިންމާލާފައިވާ ފިލްމް "ޖާޒީ" އެވެ. މި ފިލްމު އެޅުވުމަށް މިހާރު ކަނޑައަޅާފައިވާ ތާރީހަކީ ޑިސެމްބަރު 31 އެވެ.
