ކުރީގެ ރައީސް އަބްދުﷲ ޔާމީން ފަސް އަހަރަށް ޖަލަށް ލާން ކްރިމިނަލް ކޯޓުން ހުކުމް އިއްވި ބެންޗްގައި ހިމެނިވަޑައިގެންނެވި ގާޒީ އަލްއުސްތާޛު ޙުސައިން ފާއިޒު ރަޝާދު ސަސްޕެންޑް ކުރަން ޖުޑީޝަލް ސާވިސް ކޮމިޝަނުން ނިންމައިފިއެވެ.
ޖޭއެސްސީ އިން ދެންމެ ނެރުނު ބަޔާނެއްގައި ވިދާޅުވީ ކްރިމިނަލް ކޯޓުގެ ފަނޑިޔާރުންގެ އޯޑިއޯ ރެކޯޑިންގ ތަކެއް ކަމަށް ބުނެ މީޑިއާގައި ދައުރުވި އޯޑިއޯތަކުގެ ފޮރެންސިކް އެނާލިސިސްއިން، އެ އޯޑިއޯތަކުގައި ހިމެނޭ އޯޑިއޯއެއްގައިވާ އަޑާއި ކްރިމިނަލް ކޯޓުގެ ޤާޟީ އަލްއުސްތާޛު ޙުސައިން ފާއިޒު ރަޝާދުގެ އަޑާ ދިމާވާކަމަށް އޯޑިއޯ އެނާލިސިސްގައި ކަނޑައަޅާފައި ވާތީ ކޮމިޝަނުން އެކަން ތަޙުޤީޤުކުރަން ނިންމާފައިވާ ކަމަށެވެ.
އަދި އެ މައްސަލައިގެ ބާވަތަށާއި ތަޙުޤީޤަށް ހޯދިފައިވާ މަޢުލޫމާތަށް ބަލައި، ޝަރުޢީ ދާއިރާގެ އިތުބާރު ނެގެހެއްޓުމުގެ އަސާސްގެ މައްޗަށް ބިނާކޮށް، ޖުޑީޝަލް ސާރވިސް ކޮމިޝަންގެ ޤާނޫނުގެ 25 ވަނަ މާއްދާގެ (ތ)ގެ ދަށުން، ކޮމިޝަނުން ވަކިގޮތެއް ކަނޑައަޅަންދެން، މިމަހުގެ 05 ވަނަ ދުވަހުން ފެށިގެން ވަގުތީގޮތުން 60 (ފަސްދޮޅަސް) ދުވަހަށް ވަޒީފާއަށް ނުނިކުމެ މަޑުކުރުމަށް، ޤާޟީ އަލްއުސްތާޛު ޙުސައިން ފާއިޒް ރަޝާދަށް އެންގުމަށް ވަނީ ނިންމާފައެވެ.
ޖޭއެސްސީން މިމަހުގެ ދެވަނަ ދުވަހު މިމައްސަލަ ބާލަން ހާމަކޮށް ނެރުނު ބަޔާނުގައި ބުނެފައިވަނީ ކްރިމިނަލް ކޯޓުގެ ޤާޟީ އަލްއުސްތާޛު ޙުސައިން ފާއިޒު ރަޝާދުގެ އޯޑިއޯ ކަމަށް ބުނާ އޯޑިއޯއަކީ ވެސް ވަކި ނައިބައި ޑީލްޓްކޮށް ގުޅުވައިގެން ހަދާފައިވާ އޯޑިއޯއެއްކަމަށް އެގޭކަމަށެވެ. އެހެންނަމަވެސް އެ އޯޑިއޯގައިވާ އަޑާއި މެދު ޤާޟީ އަލްއުސްތާޛު ޙުސައިން ފާއިޒު ރަޝާދު އިންކާރުކުރެއްވި ނަމަވެސް އެއީ ފާއިޒުގެ އަޑުކަން އޯޑިއޯ އެނާލިސިސުން ކަނޑައަޅާފައިވާކަމަށް ޖޭއެސްސީން ވިދާޅުވެއެވެ. އެހެންކަމުން އެ މައްސަލަ ކޮމިޝަނުން ތަޙްޤީޤުކުރުމަށް ނިންމާ ތަޙްޤީޤު ކޮމިޓީއެއް މިހާރު އެކުލަވާލާފައިވާކަމަށް ޖޭއެސްސީން ވިދާޅުވެއެވެ.
ޖޭއެސްސީގެ ބަޔާނުގައިވަނީ ޤާޟީ އަލްއުސްތާޛު ޙުސައިން ފާއިޒު ރަޝާދުގެ އަޑާ ދިމާވާ އޯޑިއޯގައި ދައްކާފައިހުރި ވާހަކަތަކަށް ބާލައިރު، ރައީސް ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް ކްރިމިނަލް ކޯޓުގައި ހިންގި ޝަރީޢަތާ ގުޅިގެން އެއްވެސް ފަރާތަކުން އެއްވެސް ފަނޑިޔާރަކާ ބައްދަލުކޮށްފައިވާކަމަށް، ނުވަތަ ބައްދަލު ކުރަން އެދިފައިވާކަމަށް ނުވަތަ އެ ޝަރީޢަތަށް ނުފޫޒު ހިންގުމަށް އެއްވެސް މަސައްކަތެއް ކޮށްފައިވާ ކަމަށް ބުނެފައި ނުވާކަމަށް ކޮމިޝަނުން ވަނީ ފާހަގަކޮށްފައެވެ. އެހެންނަމަވެސް އެ އޯޑިއޯގައި ޝަރީއަތާއި ގުޅޭ ވާހަކަތަކެއް ކޯޓުން ބޭރުގައި ދައްކާފައިވާތީ އެހެން ފަނޑިޔާރުންގެ އިތުބާރު ގެއްލުމުގެ ފުރުސަތު އޮތްކަންވެސް ޖޭއެސްސީގެ ބަޔާނުގައިވެއެވެ.
