ކ.ގުޅިފަޅު ބިންހިއްކުމުގެ މަސަައްކަތް ނިމިއްޖެއެވެ.
ގުޅިފަޅު ބިންހިއްކުމުގެ މަސައްކަތް ނިމިފައިވަނީ މިދިޔަ ސެޕްޓެންބަރު މަހުގެ 13 ވަނަ ދުވަހުއެވެ. ގުޅިފަޅު ބިންހިއްކުމުގެ މަސައްކަތުގެ ދަށުން 1.8 މީޓަރުގެ ސަރަހައްދެއްގެ ބިން ހިއްކިއެވެ. އަދި ގޮނޑުދިށް ހިމާޔަތް ކުރުމަށްޓަކައި 183 މީޓަރު ސަރަހައްދެއްގައި ރިވެޓްމަންޓް ޖެހުމުގެ މަސައްކަތް ވެސް ކުރިއެވެ. މިއީ 8.9 މިލިޔަން ރުފިޔާގެ މަސައްކަތެއް ކަމަށް އެމްޓީސީސީ ބުނެފައިވެއެވެ.
ކ. ގުޅިފަޅު ބިންހިއްކުމުގެ މަޝްރޫޢު 13 ސެޕްޓެމްބަރ 2021 ވަނަ ދުވަހު ނިމިއްޖެ. މި މަޝްރޫޢުގެ އަގަކީ 8.9 މިލިއަން ރުފިޔާ #MTCCProjects #RayyithungeKunfuni pic.twitter.com/SfxNeufBJT
— MTCC Plc (@MTCCPlc) November 1, 2021
މާލޭ ވިޔަފާރި ބަނދަރު ގުޅިފަޅަށް ބަދަލުކުރުމުގެ މަޝްރުޢޫގެ ޢަމަލީ މަސައްކަތް މިދިޔަ އަހަރު ފެށުމަށް ނިންމިނަމަވެސް ކޯވިޑްގެ ޙަލަތާއި ގުޅިގެން އެ މަސައްކަތަށްވަނީ މަޑުޖެހުމެއް އައިސްފައެވެ. މި މަޝްރޫއަށް ބޭނުންވާ 476 މިލިއަން ރުފިޔާ ވަނީ މިއަހަރަށް ދައުލަތުން ފާސްކުރި ބަޖެޓްގައި ހިމަނާފައެވެ.
ސަރުކާރުގެ ޢަމާޒަކީ ޖާގައިގެ ގޮތުން ތަނަވަސް ޒަމާނީ، ބައިނަލްއަޤްވާމީ ވިޔަފާރި ބަނދަރަކަށް މި ބަނދަރު ހެދުމެވެ. އަދި މާލޭގައި މި ޚިދުމަތް ދިނުމަށް އޮތް ދަތިތަކަށް ހައްލެއް ހޯދައިދިނުމެވެ. މުޅި މި ސަރަޙައްދަށް ބޮޑު ބަދަލެއް އަންނާނެ މި މަޝްރޫޢު ގުޅެނީ މާލޭ ކަނެކްޓިވިޓީ ބްރިޖް މަޝްރޫއުއާއެވެ. ބްރިޖްގެ މަސައްކަތް ނިމޭއިރު، ގުޅިފަޅުވާނީ އިޤްތިޞާދީ މައި ހަބަކަށެވެ.
މި ޓްރާންސްޝިޕްމަންޓް ބަނދަރުގެ މަސައްކަތް ނިމުމުން ބަނދަރު ހިންގުމުގެ މަސައްކަތް ހަވާލުކުރާނީ، މިހާރުވެސް މާލޭ ވިޔަފާރި ބަނދަރު ހިންގަމުން އަންނަ މޯލްޑިވްސް ޕޯޓްސް ލިމިޓެޑާކަމަށް ސަރުކާރުންވަނީ ހާމަކުރައްވާފައެވެ. މި ބަނދަރާއި އެކު މާލޭ ވިޔަފާރި ބަނދަރުގައި މުދާ ބާލަން ބޯޓު ފަހަރުތައް ތޮއްޖެހޭ ޖެހުމަށް ލުއިަތަކެއް އަންނާނެއެވެ.
މާލޭ ވިޔަފާރި ބަނދަރު ގުޅިފަޅަށް ބަދަލުކުރުމުގެ މަޝްރޫޢުއަކީ މިފަދަ މައްސަލަތަކަށްވެސް ހައްލެއް ގެންނާނެ މަޝްރޫއެކެވެ. އޭގެ ސަބަބުން މާލޭ އުތުރު ފަރާތު ފަޅުން ބޮޑު ބައެއް ހުސްވާނެއެވެ. އެސަރަޙައްދު އޮޑިވެރިންނާއި ދަތުރުވެރިންނަށް ބޭނުންކުރަން ދިނުމުގެ ފުރުޞަތު ބޮޑެވެ. އަނެއްކޮޅުން ގުޅިފަޅަށް ވިޔަފާރި ބަނދަރު ބަދަލުކުރުމުން މާލޭ ފަޅަށް މުދާ ބަލާ އަންނަ އޮޑިދޯނި ފަހަރުތައް އެއްކޮށް މަދުވާނެއެވެ. އެއީ މުދާ ބާލަން ސީދާ ގުޅިފަޅަށް އޮޑި ދޯނިފަހަރުތައް ދާންޖެހޭނެތީއެވެ. އަދި ގުޅިފަޅުން ވިޔަފާރިވެރިންނަށް ގުދަންކުރުމުގެ ފުރުޞަތު އޮތުމުން، މުދާ ބަލާ އައިސް މާލެ ފަޅުގައި އޮންނަންޖެހޭ އެއްވެސް އުޅަނދެއް ނޯންނާނެއެވެ. މިހާރު އޮތް ބަނދަރަށްވުރެ ދެ ގުނަ ބޮޑު ބަނދަރަކަށްވުމުން މުދާ އަވަހަށް ބާލާ، ކްލިއަރކުރެވޭނެއެވެ. އަދި މާލެއަށް ގުދަން ނުކޮށް، ގުޅިފަޅުން ރާއްޖޭގެ އެކި ސަރަޙައްދުތަކަށް މުދާ ފޮނުވޭނެކަމަށްވެސް ކަމާބެހޭ ފަރާތްތަކުން ބުނެއެވެ.
