ރާއްޖޭގެ އިގްތިސާދު ޓޫރިޒަމަށް އެކަނި ބިނާވުން ހުއްޓުވުމަށް، އިހަވަންދިއްޕޮޅުގައި އާގުބޯޓުފަހަރަށް ހިދުމަތްދެވޭނެ މަގު ތަނަވަސްކޮށްދިނުމަށް ސަރުކާރަށް ގޮވާލައި ރައްޔިތުންގެ މަޖިލީހަށް މިއަދު ގަރާރެއް ހުށަހަޅައިފިއެވެ.
މި ގަރާރުގައި ވަނީ ކޯވިޑް-19 ގެ ޢާލަމީ ވަބާގެ ތެރޭގައި ގައުމުތަކުގެ ބޯޑަރުތައް ބަންދުވެ، ދުނިޔޭގެ އިގްތިސާދު ހުއްޓުމަކަށް އައި ހިނދު، ދިވެހިރާއްޖޭގެ އިގްތިސާދު އެ ކަމަކަށް ބަރޯސާވެފައި އޮތް، ފަތުރުވެރިކަން ހުއްޓި، އަދި އެ ސިނާޢަތަށް ބަރޯސާވެފައިވާ އާމްދަނީ ލިބޭން އޮތް ދޮރުތައް ބަންދުވުމުގެ ސަބަބުން، ދިވެހިރާއްޖޭގެ އިގްތިސާދީ ރޭވުންތެރިކަން އައު ވިސްނުންތަކަށް ބައްޓަން ކުރުމުގެ މުހިއްމުކަން ބޮޑުވެފައިވާކަމަށް ބުނެފައެވެ.
ފަތުރުވެރިކަމަކީ ދުނިޔެއަށް އަންނަ ކިތަންމެ ކުޑަ ލޮޅުމަކުންވެސް، އޭގެ ނޭދެވޭ އަސަރު، ޚާއްސަކޮށް ރާއްޖޭގެ އިގްތިސާދަށް ކުރަމުންދާ ކަމެއްކަން، ކޮވިޑުގެ ޢާލަމީވަބާގެ އިތުރުން، ގަލްފު ހަނގުރާމައިގެ ތެރޭގައިވެސް، އަދި 9/11 ގެ ތެރޭގައިވެސް ދިވެހިރާއްޖެ ތަޖުރިބާކޮށްފައިވާ ކަމަށް އެ ގަރާރުގައި ބުނެފައެވެ.
އެހެންކަމުން، ފަތުރުވެރިކަމަކީ، މިފަދަ ކޮންމެ ކަމަކުން، ވަރަށް ބޮޑު ބަދަލެއް އަތުވެދާނޭ ކަމާއި އެ ސިނާއަތަށް އެކަނި ބަރޯސާވެގެން އޮތުމަކީ، ގައުމެއްގެ ގޮތުގައި ކުރަން ހެޔޮވެސް ނުވާނޭ ކަމެއްކަން ކޮވިޑުގެ ފިލާވަޅުން އެކަނިވެސް މިވަނީ، އެނގި ދަސްވެފައެވެ.
– އެ ގަރާރުގައި ބުނެފައެވެ.
ދިވެހިރާއްޖެއަކީ ދުނިޔޭގެ ހުޅަނގާއި އިރުން މުދާހިފައިގެން ދަތުރުކުރާ އާގުބޯޑުފަހަރު ނުވަތަ އިންސަންޓް ޕެކެޖުގެ މަގުތަކެއް އޮތް ގައުމަކަށްވެފައި، ޚާއްސަކޮށް ރާއްޖޭގެ އުތުރުގައި އޮތް 8 ޑިގްރީ ޗެނަލަކީ، ކާގޯ ބޯޓުފަހަރު ރާއްޖެ ހުރަސްކޮށް ދަތުރުކުރާ މަޝްހޫރު މަގަކަށް ވެފައި އޮތް ހިނދު، މިކަމުން ރާއްޖެއަށް ހޯދެން އޮތް ނަފާ ހޯދާ ލިބިގަތުމަކީ، މި ސަރަޙައްދުގެ އެހެން ގައުމު ތަކެކޭ ރާއްޖެއަށްވެސް އަމާޒު ހިފިދާނެ އައު ސިނާޢަތެއްކަން ސަލީމް ހުށަހެޅުއްވި ޤަރާރުގައި ފާހަގަކުރައްވާފައިވެއެވެ.
އަދި ފަޅުވެރިން ބަދަލުކޮށް އެމީހުން ފުރުވާލުމާއި ގެނައުމާއި ސަޕްލައި ފޯރުކޮށްދިނުމާއި ސެކިއުރިޓީ ޚިދުމަތަކީ ދިވެހިންނަށް އަމިއްލަ މަސައްކަތަކުން ފެށިދާނޭ ކަމެއްކަމަށާއި، އޭގެ އިގްތިސާދީ މަންފާ ރަށްރަށުގެ ރައްޔިތުންނަށް މިހިނދުން މިހިނދަށްވެސް ގެނެވިދާނޭ ކަމެއްކަން ގަރާރުގައި ފާހަގަކުރައްވާފައިވެއެވެ.
އިހަވަންދިއްޕޮޅުގައި ބައިނަލްއަގުވާމީ ޓްރާންސްޝިޕްމަންޓް ބަނދަރެއް ތަރައްޤީ ކޮށްދޭނެ ބަޔަކު ހޯދުމަށް އިއުލާންކުރީ މިއަހަރުގެ ކުރީ ކޮޅުއެވެ. މި މަޝްރޫއު ކުރިއަށް ގެންދިޔުމަށް ރާވާފައިވަނީ ދުނިޔޭގެ އެންމެ ބޮޑެތި ކޮންޓެއިނަރ ބޯޓުފަހަރަށް ޚިދުމަތް ދިނުމުގެ ޤާބިލުކަން ލިބިފައިވާ ޒަމާނީ ޓްރާންޝިޕްމެންޓް ބަނދަރެއްގެ ގޮތުގައެވެ. އިކޮނަމިކް މިނިސްޓްރީން ވިދާޅުވީ މި މަޝްރޫއުގެ ފުރަތަމަ ފިޔަވަހީގައި 900 މީޓަރުގެ މަގަތު ފާލަމެއް ޤާއިމްކުރުމަށް ރާވާފައިވާކަމަށެވެ. އަދި އަހަރަކު 1.8 މިލިޔަން ކޮންޓެއިނަރު ހެންޑްލް ކުރުމުގެ ކެޕޭސިޓީ ޤާއިމްކުރުމަށް އަމާޒު ހިފާފައިވާކަމަށާއި މި މަޝްރޫއުއަށް 466 މިލިޔަން ޑޮލަރުގެ އިންވެސްޓްމަންޓެއް ބޭނުންވާނެކަމަށް އަންދާޒާ ކުރެވޭކަމަށްވެސް ސަރުކާރުން ވިދާޅުވެއެވެ.
