މި ހަފްތާގެ ހޮނިރު ދުވަހު ރަޝިއާގައި ރެކޯޑް އަދަދަކަށް ކޯވިޑަށް މީހުން ޕޮޒިޓިވްވެ، ފާއިތުވި 24 ގަޑިއިރު ތެރޭގައި ކޯވިޑަށް ޕޮޒިޓިވް ވީ މީހުންގެ އަދަދު 40,251 އަށް އަރައިފިއެވެ. މިއީ ކޯވިޑް ކާރިސާ ފެށުނު ފަހުންވެސް އެއް ދުވަހެއްގައި ރަޝިއާގައި އެންމެ ގިނަ އަދަދަކަށް ކޯވިޑަށް މީހުން ޕޮޒިޓިވް ވީ ދުވަހެވެ.
ރަޝިއާ ސަރުކާރުން އެކުލަވާލާފައިވާ ކޮރޯނާ ވައިރަސް ޓާސްކްފޯސްއިން ވަނީ ހޮނިހިރު ދުވަހު ކޯވިޑް ބަލީގައި 1,160 މީހުން މަރުވެފައިވާކަން އިއުލާން ކޮށްފައެވެ. މިއީ އޭގެ ކުރީ ދުވަހު މަރުވެފައިވާ 1,163 މީހުންނަށްވުރެ 3 މީހުން މަދު އަދަދެކެވެ.
ރަޝިއާގައި ކޯވިޑްގެ ހާލަތު އާދަޔާ ޚިލާފަަށް ގޯސްވާން ފަށާފައި ވުމާއިގުޅިގެން، ނޮވެމްބަރު މަހުގެ ފުރަތަމަ ހަފްތާގައި، މަސައްކަތް ކުރާ ހުރިހާ ތަނެއް ލޮކްޑައުން ކުރުމަށް ވަނީ ހަމަޖެހިފައެވެ. އަދި ވެރިރަށް މޮސްކޯގެ ބޮޑުބައެއް ވަނީ އަނެއްކާވެސް، ފާއިތުވެދިޔަ ހަފްތާގެ ބުރާސްފަތި ދުވަހުން ފެށިގެން ލޮކްޑައުން ކޮށްފައެވެ. މި ލޮކްޑައުންގައި ހުޅުވާފައި ހުންނަ ވިޔަފާރި ތަކަކީ ހަމައެކަނި ސުޕަރމާރކެޓް ތަކާއި ފާމަސީތަކެވެ.
