މިނިވަން މުއައްސަސާތަކުގެ ނިންމުންތަކަށް މަޖިލިސް ރައީސަށް ނުފޫޒު ނުފޯރުވޭނެ: ހައިލަމް

ރާއްޖޭގެ މިނިވަން މުއައްސަސާތަކުން ނިންމާ ނިންމުންތަކަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ނުފޫޒު ނުފޯރުވޭނެކަމަށް ކްރިމިނަލް ކޯޓުގެ ކުރީގެ އިސްޤާޞީ އަހުމަދު ހައިލަމް ވިދާޅުވެއްޖެއެވެ.

ކުޑަކުދިންގެ ހިޔާގައި 2017 ވަނަ އަހަރު ހިނގި ހާދިސާއަކާއި ގުޅިގެން އޭރުގެ ޖެންޑާއާއި، ފުލުހުންގެ ވެރިންނަށް ތިބި ބޭފުޅުންނަށް ދައުވާ ކުރުމަށް އެޗްއާރުސީއެމްއިން ފޮނުވި މައްސަލާގައި ރައީސް ނަޝީދުވަނީ މިއަދު ފާޑުވިދާޅު ވެފައެވެ. ރައީސް ނަޝީދު ވަނި މިމައްސަލާގައި ދައުވާ ކުރުމަށް ފޮނުވާފައިވާ ކުރީގެ މިނިސްޓަރ ޒެނީޝާގެ ދިފާއުގައި ވިދާޅުވީ ޒެނީޝާއަށް ދައުވާކޮށްގެން ދިވެހި މުޖުތަމައަށް ލިބޭނެ އިތުރު ރަނގަޅެއް ނުފެންކަމަށެވެ. މިކަމުގައި އެންމެ ބުއްދިވެރި ގޮތަކީ ޒެނީޝާއަށް ކުރާ ދައުވާ އެޗްއާރުސީއެމްއިން އަނބުރާ ގެންދިއުންކަމަށް ރައީސް ނަޝީދު ވިދާޅުވިއެވެ.

ރައީސް ނަޝީދުގެ މިވާހަތަކާއި ގުޅިގެން ހައިލަމް ވިދާޅުވީ މިނިވަން މުއައްސަސާތަކުގެ ނިންމުންތަކަށް މަޖިލީހުގެ ރައީސް ނުފޫޒުފޯރުވުމަކީ ބަލައިގަނެވޭނެ ކަމެއް ނޫންކަމަށެވެ. ކުޑަކުދިންގެ ހައްގުތައް ހިމާޔަތްކުރުމުގެ ޒިންމާ މަތިކުރެވިފައިވާ ފަރާތްތަކުން އިހުމާލުވާނަމަ ދައުވާކުރުމަކީ އެފަރާތަތައް ޒިންމާދާރުކުރުމަށް ކޮންމެހެން ކުރަންޖެހޭ ކަމެއް ކަމަށް ހައިލަމް ވަނީ ވިދާޅުވެފައެވެ.

ކުޑަކުދިންގެ ހައްގުތައް ހިމާޔަތްކުރުމުގެ ޒިންމާ މަތިކުރެވިފައިވާ ފަރާތްތަކުން އިހުމާލުވާނަމަ ދައުވާކުރުމަކީ އެފަރާތަތައް ޒިންމާދާރުކުރުމަށް ކޮންމެހެން ކުރަންޖެހޭ ކަމެއް. މިނިވަން މުއައްސަސާތަކުގެ ނިންމުންތަކަށް މަޖިލީހުގެ ރައީސް ނުފޫޒުފޯރުވުމަކީ ބަލައިގަނެވޭނެ ކަމެއް ނޫން.

– ހައިލަމް ވިދާޅުވިއެވެ.

ޒެނީޝާއަށް ކުރާ ދަޢުވާ އަނބުރާ ގެންދެވުމަކީ އެންމެ ބުއްދިވެރި ގޮތް: ނަޝީދު

މިމައްސަލާގައި އެޗްއާރުސީއެމްއިން ވަނީ ބަޔާނެއް ނެރެފައެވެ. އެޗްއާރުސީއެމްގެ ބަޔާނުގައި ބުނެފައިވަނީ އެންޓި ޓޯޗަރ ޤާނޫނާއި ހިއުމަން ރައިޓްސް ކޮމިޝަނުގެ ޤާނޫނުގެ ދަށުން އެކޮމިޝަނަށް މަތިކޮށްފައިވާ ޒިންމާތައް އަދާކުރުމުގައްޔާއި، ހުށަހެޅޭ މައްސަލަތައް ތަހުގީގުކުރުމުގައި، އެއްވެސް ފަރާތަކާމެދު ޒާތީ ތަޢައްޞުބެއް ނޯންނާނޭކަމުގެ ފުރިހަމަ ޔަޤީންކަން އަރުވާކަމަށެވެ. އަދި މައްސަލަތަކުގައި ގޮތް ނިންމަނީ ހަމައެކަނި ކުރިމަތީގައިވާ ހެކީގެ މައްޗަށް ބުރަވެ، އިންސާފުވެރިކަމާއި، ޢަދުލުވެރިކަމާ އަދި ނަޒާހާތްތެރިކަމާ އެކުގައިކަމަށެވެ.

އަދި ހަމައެހެންމެ، އެންޓި ޓޯޗަރ ޤާނޫނުގެ ދަށުން އެކޮމިޝަނުގެ ފަރާތުން ތަހުގީގުކޮށް ޕްރޮސިކިއުޓަރ ޖެނެރަލްގެ އޮފީހަށް ހުށަހަޅާފައިވާ މައްސަލަތަކާ ގުޅޭގޮތުން މީޑިއާތަކުން އެދިގެން މިކޮމިޝަނުން މިހާތަނަށް ފޯރުކޮށްދީފައިވާ އެއްވެސް މަޢުލޫމާތެއްގައި އެއްވެސް ފަރާތެއްގެ ނަމެއް ނުވަތަ ޒާތީ މައުލޫމާތެއްވެސް ހާމަކޮށްފައި ނުވާނެކަމަށް އެޗްއާރުސީއެމްއިން ވަނި ބުނެފައެވެ. އަދި ވަކި މައްސަލައެއްގެ ތަހުގީގު ނިންމައި މައްސަލައިގެ ލިޔުންތައް ޕްރޮސިކިއުޓަރ ޖެނެރަލްގެ އޮފީހަށް ފޮނުވުމުން، މީޑިއާތަކުން ޚަބަރުތައް ގެނެސްދެއްވުމުގައި، އެ މައްސަލައެއްގައި ތުހުމަތު ކުރެވޭ ފަރާތްތަކުގެ ޙައްޤަކަށް އެއްވެސް އަސަރެއް ނުކުރާނޭ މޭރުމަކުން ޚަބަރުތައް ގެނެސްދެއްވުމަށް ވަނީ އިލްތުމާސް ކުރައްވާފައެވެ.