ކުރީގެ ޖެންޑަރ މިނިސްޓަރ ޒެނީޝާ ޝަހީދު ޒަކީއަށް ދައުވާކުރުމަށް ފޮނުވި ފޮނުވުން ވައްތަރީ ޒާތީ ކަމަކާއި ކަމަށް އެމްޑީޕީގެ ޕީޖީ ގްރޭޕްގެ ލީޑަރު އަލީ އާޒިމް ވިދާޅުވެއްޖެއެވެ.
އާޒިމް މިހެން ވިދާޅުވެފައިވަނީ ޒެނީޝާއަށް ދައުވާކުރަން ފޮނުވި މައްސަލަ އަބުރާ ގެންދެވުމަށް އެމްޑީޕީގެ ރައީސް މުހައްމަދު ނަޝީދުވެސް ވިދާޅުވެފައި ވަނިކޮށެވެ. އާޒިމް ވިދާޅުވީ މިމައްސަލައިގައި ދައުވާ ކުރަން ފޮނުވުމުން މިކަން ސިޔާސީ ކަމަކާއި ވައްތަރެއް ނޫންކަމަށެވެ. މިކަން ބޮޑަށް ވައްތަރީ ޒާތީ ކަމަކާއި ކަމަށް އާޒިމް ވަނީ ވިދާޅުވެފައެވެ.
މީސިޔާސީ ކަމަކާ ވައްތަރުކަމެއްނޫން، ވައްތަރީ ޒާތީކަމަކާ.
– އާޒިމް ވިދާޅުވިއެވެ.
އެޗްއާރުސީއެމްއިން ބުނެފައިވަނީ ކުޑަކުދިންގެ ހިޔާއާއި ގުޅުންހުރި މައްސަލަތަކެއް ތަހުގީގުކޮށް އެމައްސަލާގައި ދަޢުވާކުރުމަށް ޕީޖީ އޮފީހަށް ފޮނުވާފައިވާކަމަށެވެ. މިމައްސަލާގައި ފޮނުވާފައިވާ ލިޔެކިޔުންތަކާ ގުޅިގެން ޕީޖީ އޮފީހާ މަޝްވަރާ ކުރެވެމުންދާކަމަށްވެސް އެޗްއާރުސީއެމްއިން ވަނީ ބުނެފައެވެ. ނަމަވެސް މިމައްސަލާގައި ދައުވާކުރަން ފޮނުވި މީހުންގެ ނަމެއްވެސް އަދި އަދި މައްސަލައިގެ ތަފްސީލެއްވެސް ދެއްވާފައި ނުވެއެވެ.
މިމައްސަލާގައި ރައީސް ނަޝީދު މިއަދު ކުރެއްވި ޓްވީޓެއްގައި ވިދާޅުވީ ޒެނީޝާއަށް ދައުވާކޮށްގެން ދިވެހި މުޖުތަމައަށް ލިބޭނެ އިތުރު ރަނގަޅެއް ނުފެންކަމަށެވެ. މިކަމުގައި އެންމެ ބުއްދިވެރި ގޮތަކީ ޒެނީޝާއަށް ކުރާ ދައުވާ އެޗްއާރުސީއެމްއިން އަނބުރާ ގެންދިއުންކަމަށް ރައީސް ނަޝީދު ވިދާޅުވިއެވެ.
މިމައްސަލާހައި ޕީޖީ އޮފީހުން ވިދާޅުވީ އެޗްއާރުސީއެމްއިން ފޮނުވާފައިވާ މައްސަލަ އެއޮފީހުން ދިރާސާ ކުރަމުންދާކަމަށެވެ. އަދި އަންނަ ހަފްތާގައި މިމައްސަލާގައި ގޮތެއް ނިންމާނެކަމަށެވެ. ޕީޖީ އޮފީހުންވެސް މިމައްސަލާގައި ދައުވާ ކުރަން ފޮނުވި މީހުންގެ މައުލޫމާތެއް ހާމަކޮށްފައި ނުވެއެވެ.
