ރާއްޖޭގައި އޮތް ވެރިކަމުގެ ނިޒާމަކީ، ތިންބާރު ވަކިވެފައިވާ ފުރިހަމަ ނިޒާމެއްކަން އެހެން މީހުން ގަބޫލުކުރާ ފަދައިން މުސްތަފާބެވެސް މިހާރު ގަބޫލުކުރަން ވެއްޖެއެވެ. މިނިޒާމްގެ ފުރިހަމަކަން ރައްޔިތުންނަށް ފޯރުކޮށްދޭން ތިބި ބަޔަކީ އެކިއެކި މަގާމްތަކާ ހަވާލުވެގެން ސަރުކާރު ހިންގަން ތިބި ވެރިންނޫންތޯއެވެ. ވެރިކަމުގެ ނިޒާމް ހަރުދަނާކަމާއެކު ހިގަމުންދާނަމަ، ރައްޔިތުންގެ އިތުބާރާ ލޯބި ސަރުކާރަށް ލިބެމުންދާނެއެވެ. އެހެން ނޫންމަ ސަރުކާރާ ދިމާއަށް ރައްޔިތުން ބަލަމުންދާނީ ރުޅިވެރިކަމާ ނަފްރަތުގެ ލޮލަކުންނޫންތޯއެވެ.
މުސްތަފާބެއެވެ. ރައްޔިތުންނަށް އިތުބާރުކުރެވޭ ނިޒާމެއްކަން އަންގައިދޭން ތިބި ބަޔަކީވެސް ސަރުކާރުގެ ވެރިން ނޫންތޯއެވެ. ވެރިކަމުގެ ނިޒާމްގެ ހަރުދަނާކަމާއި ބަލިކަށި ކަމަކީވެސް ވެރިންގެ ފަރާތުން ރައްޔިތުންނަށް ވާރުތަވެގެން އަންނަ ކަންކަން ނޫންތޯއެވެ.
ވެރިކަމުގެ ނިޒާމަކީ ކޮންމެ ނިޒާމެއްކަމަށްވިޔަސް، ރައްޔިތުންނަށް ލާބައާއި މަންފާ ލިބޭނަމަ، ރައްޔިތުންނަށް މައްސަލައެއް ނޯންނާނެ ނޫންތޯއެވެ. ދުނިޔޭގެ އެކި ގައުމުތަކުގައި އެކި ނިޒާމަށް ވެރިކަން ހިންގާއިރު، ކޮންމެ ނިޒާމެއްގެވެސް މައްސަލަތައް ހުރިކަމަށް މީހުން އެބުނަނީ ނޫންތޯއެވެ. އަނެއްކާ، މުސްތަފާބޭ ތިޔަ ވަކާލާތު ކުރައްވާ ނިޒާމުގައި ވެރިކަން ހިންގާއިރު، އެ ވެރިކަން ހިންގަންތިބޭ މީހުންނަށް، ކަންކަން ރާވާ ހިންގާން، ނުވަތަ ވިސްނަން އިތުރު ސިކުނޑިއެއް ލިބެނީތޯއެވެ. ނޫނީ ކުޅަނދުކޮޅެއް އިތުރަށް ލިބެނީތޯއެވެ.
ނިމިދިޔަ ސަރުކާރުން ކޮރަޕްޝަންގެ ވާހަކައާ އަނިޔާވެރިކަމާއި ގޮތްނޭގޭ މަރުތަކުގެ ވާހަކައާއި ޢަދުލު އިންޞާފު ނެތް ކަމުގެ ބަދުނާމުތައް ކުރީގެ ސަރުކާރުގެ ވެރިންގެ ބޮލުގައި އަޅުވަމުން، އެވާހަކަތަކުން ރައްޔިތުންގެ ހިތްތައް ލަންބުވަމުން، މުސްތަފާބޭމެން ވެރިކަން ބަދަލުކޮށް، ތިމަންނާމެންގެ ސަރުކާރުގައި ކޮރަޕްޝަނެއް ނޯންނާނޭ ޒީރޯ ޓޮލަރެންސޭ، ރައްޔިތުންނަށް އަދުލު އިންސާފު ގާއިމުކޮށްދޭނަމޭ، ގޮތްނޭގޭ މަރުތަކަށް އިންސާފު ހޯދައިދޭނަމޭ ބުނަމުން ނުގެންދަމު ތޯއެވެ.
ރައްޔިތުން މުސްތަފާބޭމެންނަށް އިތުބާރުކޮށް، ވެރިކަން ޙަވާލުކުރިއެވެ. ވެރިކަން ލިބި ހަމައިސްކޮޅަށް ދެމިލުމުން ދެނެކާ ދެނެއްނެތެވެ. ރޯމަސްކާން ބުޅާ އުޅޭގޮތް މުސްތަފާބޭ ހިތްމައްޗަށް ގެނެސްބަލާށެވެ. ހަމައެގޮތަށެވެ.
އެމީހަކާ އެމީހެއް ސަރުކާރުގެ ބައިތުލްމާލުން ކެވުނުގޮތަކަށް، ދެމުނު ގޮތަކަށް ދަމަމުން، ކަމުން ތިޔަ ގެންދަނީ އެއްވެސް އެއްޗެއް ހިތަށް އަރުވާލުމެއް ނެތިނޫންތޯއެވެ. އަދި މިކަމުގައި ދެރައީ މީގައި ކުޑައެއް ބޮޑެއްނެތް ކަމެވެ. ހީވަނީ ދަހި އައިނަކުން މަސްބާނަމުން ދާހެނެވެ. ވައްކަމާ ކޮރަޕްޝަނަށް އޮތީ ލޯކަނުކަމެވެ. ބީރުކަންފަތެކެވެ. ބަލާނެ މީހަކު އަޅާލާނެ މީހަކު ނެތެވެ. ކޮންމެ މީހަކުވެސް ދެ އަތުން ކަނީއެވެ. އެހެންނަމަވެސް މުސްތަފާބޭ ތިޔަ ބުންމުން ދަނީ، މުސްތަފާބޭގެ ޕާޓީގައި ކާނެ މީހަކު ނުހުންނާނޭ ކަމަށެވެ. މުސްތަފާބޭއަށް އީ އަޅެފަހެ އަޖައިބަކަށް ނުވަނީތޯއެވެ.
މުސްތަފާބޭއެވެ. ގޮތްނޭގޭ މަރުތަކަށް އިންސާފު ލިބިއްޖެތޯއެވެ. ރިޔާސީ ކޮމިޝަންތައް ހަދައިގެން ރައްޔިތުންގެ ފައިސާ ބޭކާރު ކުރުންނޫން އެހެން ކަމެއް ކުރެވުނުތޯއެވެ. ވެރިކަމަށް އަދިވެސް އެއްދުވަސް ނުވަނީތޯއެވެ. ތިމާމެންނަށް ނުކުރެވޭ ވަރުގެ ކަންކަމުގެ މައްޗަށް ހޮޅިވާހަކަތަކުން މާފަތިތައް ގަތަމުން ރައްޔިތުން ކަރަށް ވައްޓާލުމުގެ ނަތީޖާ މިދަނީ ފެންނަމުން ނޫންތޯއެވެ. ރައްޔިތުން އަބަދުވެސް ވިސްނަމުންދާނީ، ވެރިން އެމީހުންނާ މެދު އަޅާލުމާ އޯގާތެރިކަމާއި، ޒަރޫރަތްތައް ފުއްދުމުގައި ދޭ އިސްކަމެއްގެ މައްޗަށެވެ. މުސްތަފާބޭ ޢަމަލުކުރަމުންދާ ގޮތް މިހާރު ރައްޔިތުންގެ ތިލަފަތުން ކިރަމުންދާނެކަން ނިކަން ރަގަޅަށް ގަބޫލުކުރައްޗެވެ.
މުސްތަފާބޭމެންގެ ޢަމަލުތައް ބަހައްޓާ ގޮތުން ހުރިހާވެސް ގެއްލުމެއް ލިބެމުންދަނީ ނިކަމެތި ރައްޔިތުންނަށް ނޫންތޯއެވެ. ރަށްރަށުގެ ތަރައްގީއަށް ކުރަންޖެހޭ މަސައްކަތްތައް "ސްލޯ"ވެ، ފިނިހަކަ ދުވެއްޔަށް ވެއްޓުނީއެވެ. ޖެހި ކަނޑަތަކުން ގަސް ރޯވެއްޖެއެވެ. ރަށްރަށުގެ ތަރައްގީއަށް ކުރަންޖެހޭ މަސައްކަތް އިންތިހާއަށް އެބަހުއްޓެވެ. ތިން ކަތީބުންނަން އެޅި ރަށުއޮފީސްތަކުގައި ޖާގަނެތިގެންގޮސް ކައުންސިލަރުންނާއި އިދާރީ މުވައްޒަފުން ކޮޅަށްތިބެންޖެހޭ ޙާލަތުގައި ހުރި ކައުންސިލް އިދާރާތައް މަދެއްނޫނެވެ.
އެތަންތަންވަނީ މުޑިކާއްޓެއްހެން ފުރިބާރުވެފައި ނޫންތޯއެވެ. މިކަން މުސްތަފާބެއަށް އެގޭތޯއެވެ. މުސްތަފާބެ ބަލަންތޯއެވެ. ހޮސްޕިޓަލްތައް މަރާމާތުކުރަން އެބަހުއްޓެވެ. އެތަންތަނަށް ބޭނުންވާ ވަޞީލަތްތައް ފުރިހަމަކުރަން ހުރީއެވެ. ރަށްރަށުގެ ރައްޔިތުންނަށް ދިމާވެފައިވާ ކުނީގެ މައްސަލައަށް ހައްލެއް ނުގެނެވުނެވެ. ކޮންމެ ރަށެއްގައިވެސް ކުނިގޮޑެއް އޮވެއެވެ. އެކަމަކު ކުނިނައްތާލެވޭނެ ގޮތެއް ނެތެވެ. މިއީ، ކިހާ ދެރަކަމެއްތޯއެވެ. އެކަމުގައި މުސްތަފާބޭމެން ގެންގުޅުއްވާ ސިޔާސަތަކީ ކޮބައިކަން އެގޭ އިންސާނަކު މިއުޑުދަށުގައި އެބަހުރި ތޯއެވެ.
މުސްތަފާބޭއެވެ. އެހެންވީމާ، މިހާރު ރައްޔިތުން ބުނަމުންދަނީ، ވެރިކަމަށް އަންނަން ވީވަޢުދުތައް ފުއްދުމުގައި މުސްތަފާބޭމެންގެ އިހުމާލު ބޮޑުތަނުންވެސް ބޮޑުކަމަށެވެ. ރާއްޖޭގެ ފަސް ސަރަހައްދެއްގައި އަޅަންބުނި ޓާޝަރީފެންވަރު ފަސް ހޮސްޕިޓަލް ވީތަނެއް އެގޭމީހަކު މިހާރަކު ނެތްކަމުގައި މީހުން ކިޔާތީވެސް އެބަ އަޑު އިވެއެވެ. ބަލިމީހުން ވީލް ބަރޯތަކުގައާއި ގާޑިޔާ ތަކުގައި ޞިއްޙީ މަރުކަޒަށް ގެންދަނީއެވެ. މިއީ ކޮންފަދަ ކަމެއްތޯއެވެ. މުސްތަފާބޭ މިކަމާ ދޭތެރޭ ބުނާނީ ކީކޭ ހެއްޔެވެ.
ސަރުކާރުން ރައްޔިތުންނަށް އޮޅުވާލުމުގައި ގެންގުޅޭ ތިރިއަރީއަކީ، ބޭރުގައުމުތަކުން ރާއްޖެއަށް އެހީތައް ލިބެނީ މުސްތަފާބޭމެންގެ ސިޔާސަތު ހަރުދަނާވެގެން ކަމަށްބުނާ ތިއަރީއެވެ. ސަރުކާރުން ބުނަމުން ގެންދަނީ، އަވަށްޓެރި އިންޑިޔާއިން ރާއްޖޭގެ ތާރީޚާ ޘަޤާފަތް ކުރިއެރުވުމަށާއި، ތިމާވެށި ހިމާޔަތްކުރުމާއި، ތަޢުލީމާ ޞިއްޙަތު ކުރިއެރުވުމަށް ބޮޑެތި އެހީތައް ދެމުން ގެންދާ ވާހަކައެވެ. މިވާހަކަތައް ސަރުކާރުގެ އިސްވެރިން މީޑިޔާތަކުގައި އަޑުހަރުކޮށް ފަތުރަމުން ގެންދެއެވެ. ފުރަތަމަ ކިޔަން ފަށަނީ ރާއްޖޭގެ ތަރައްގީގެ އެކިއެކި މަޝްރޫޢުތަކަށް ހިލޭ އެހީގެ ގޮތުގައި ލިބޭ ފައިސާގެ ވާހަކައެވެ. ދުވަސްކޮޅެއް ފަހުން ސަރުކާރުގެ ވެރިންގެ ރާގު ބަދަލުވެ ދެން ކިޔަން ފަށަނީ، މިހާރު ސަރުކާރުން މިނަގާ ލޯންތަކަކީ، ވަރަށް ކުޑަކުޑަ އިންޓަރެސްޓަކާއެކު ދިގު މުއްދަތަކަށް އަނބުރާ ދައްކާ ގޮތަށް ނަގާ ލޯން ތަކެއްގެ ވާހަކަ ނޫންތޯއެވެ.
އަނެއްކާވެސް ސަރުކާރުގެ ވެރިންގެ ރާގު ބަދަލުކޮށްލައެވެ. ނޫސްތަކުން ފެންނަން ފަށަނީ، ދައުލަތުގެ ތަންތަން މޯގޭޖް ކޮށްގެން ބޮޑެތި ޢަދަދުތަކުން ލޯން ނަގާވާހަކައެވެ. ކޮރަޕްޝަނޭ، އަނިޔާވެރިކަމޭ ކިޔައިގެން މުސްތަފާބޭގެ ބައިވެރިން ކުރަން ބޭނުންވި ކަމަކީ، ރާއްޖޭގެ ފަހު ތާރީޚްގައި ތަރައްގީގެ ބޮޑު އިންގިލާބެއް ގެނެސްދެއްވި ވެރިޔާ ހުރަގެއަށް ލުންނޫންތޯއެވެ.
މުސްތަފާބޭއެވެ. ރާއްޖޭގެ ޚާރިޖީ ސިޔާސާތަކީ ޒަމާނުއްސުރެ ވަރަށް ހަރުދަނާ އަސާސްތަކެއްގެ މަތީގައި ދެމިގެންދިޔަ ސިޔާސަތެކެވެ. ބައިނަލް އަގްވާމީ ގޮތުން ގައުމުތަކާއިއެކު ހަމަހަމަ އުޞޫލުތަކެއް ގެންގުޅޭ ގައުމެއްގެ ގޮތުގައި ދިވެހިރާއްޖެ ދުވަސްތަކެއް ހޭދަކޮށްފައިވެއެވެ. ނަމަވެސް ރާއްޖޭގެ ޚާރިޖީ ސިޔާސަތުގެ ރީތި އާދަތައް ގެއްލިގެން ނުދޭތޯއެވެ. އަވަށްޓެރި ގައުމެއްގެ އުގަށްވެއްޓި އަޑިނޭގޭ އެގްރީމެންޓްތައް ހަދައިގެން މުސްތަފާބޭމެން ތިޔަ ޖައްސަވަނީ ކޮން ސަކަރާތެއް ހެއްޔެވެ.
ދުނިޔޭގައި 195 ގައުމެއް އޮތްއިރު، ރާއްޖެއަށް އެހީއެއް ދިއްކޮށްލަނީ ހަމަ އެންމެ ގައުމަކުންކަމަށް މުސްތަފާބޭ ބުނާތީ އަހަރެން މި ހުންނަނީ ނިކަންބޮޑަށް ހައިރާން ވެފައެވެ. އެގައުމުގެ މޮޅުވާހަކަ ދައްކައި، ބޮލުގައި ރިއްސާލާ އިރަށްވެސް އެވެރިންނަށް ގޮވަންޖެހޭ ސަބަބެއް ހަމަ އެއްގޮތަކަށްވެސް ނުވިސްނުނެވެ. މިކަމާ ވިސްނާ ވިސްނާ އަހަރެން މިހާރު މިހުންނަނީ މޮޔަވާން ކައިރި ވެފައެވެ.
އެވެރިންނާ އެއްގޮތަށް ނިޒާމް ބަދަލުކުރަން މުސްތަފާބޭމެން އުޅޭއިރު، އެންމެ ހައިރާންވާ ކަމަކީ، އެގައުމުގެ އެހީގައި އަޅާ ބުރިޖެއްގެ ވާހަކަ ދައްކާއިރު، ތިޔަ ބުނާ ގައުމުގައި އަދި ހަދަންޖެހޭ މަގުތައްވެސް ހުރިކަމެވެ. ރާއްޖެއަށް ލެޑްލައިޓް ހަދިޔާކުރާއިރު، އެގައުމުގައި ކަރަންޓަކީ ކޮން އެއްޗެއްކަން ނޭގޭ މީހުން އަދިވެސް ތިބިކަމެވެ. ތައުލީމީ ގޮތުން އެހީވާން ނިންމާއިރު، އެގައުމުގައި ތިބި ލިޔަން ކިޔަން ނުދަންނަ މީހުންގެ ޢަދަދު މުސްތަފާބޭއަށް ހަމަ ނޭގެނީތޯއެވެ.
މުސްތަފާބޭއެވެ. މައްސަލައަކީ ނިޒާމެއް، ހަސަނެއް ކާސިމެއް ނޫނެވެ. މައްސަލައަކީ މުސްތަފާބޭގެ ހިތުގައި ވެރިކަމަށް އޮތް ލޯބި މާބޮޑީއެވެ. ކަން ކުރަންވީގޮތް ނޭގެނީއެވެ. ނުވަތަ ނޭގޭކަމަށް ހަދަނީއެވެ. ކަމެއް ހަވާލުކުރާ ކޮންމެ ފަހަރަކު މުސްތަފާބޭ ހަދަނީ ތިޔަ ހެނެވެ. މީ އަޅެފަހެ ދޮގެއްތޯއެވެ.
