ރައީސް ޔާމީންގެ ވެރިކަމުގައި ރައްޔިތުންނަށް ބޯހިޔާވަހިކަން ހޯދައި ދިނުމަށް، އެޅި ހިޔާ މަޝްރޫޢުން ރައްޔިތުންނަށް ހިޔާ ވަހިކަން ނުލިބޭ ކަމުގައި ރައްޔިތުންގެ މަޖިލީހުގެ ހޯރަހުށީ ދާއިރާގެ މެމްބަރު އަހުމަދު ސަލީމް ވިދާޅުވެއްޖެއެވެ.
ހުޅުމާލެ ދެވަނަ ފިޔަވަހީގައި ބޯހިޔާވަހިކަމަށް ހިންގި ހިޔާ މަޝްރޫގެ ދަށުން އިމާރާތްކޮށްފައިވާ ފްލެޓުތަކުގެ ކުލީގެ ގޮތުގައި ކުރީ ސަރުކާރުގައި ހައުސިން މިނިސްޓްރީން އަގު ކަނޑައެޅުމުގައި ގަސްތުގައި މަކަރު ހަދާފައިވާ ކަމަށް ތުހުމަތުކޮށް އެކަމުގައި އިހުމާލުވާ ފަރާތްތަކަށް ފިޔަވަޅު އެޅުމަށް ގޮވާލައި ރައްޔިތުންގެ މަޖިލީހަށް ހުށެހެޅި މައްސަލައިގެ ބަހުސް މަރުހަލާގައި ވާހަކަފުޅު ދައްކަވަމުން ސަލީމް ވިދާޅުވީ، ހިޔާ މަޝްރޫއާއިއެކު ތަކުރާރުކޮށް ހިންތަނަ މުޖެހުނު ސަބަބު އޮޑިޓް ރިޕޯޓަށް ބަލައިލުމުން ސާފު ވާނެކަމަށެވެ.
އޮޑިޓް ރިޕޯޓުން ސާފުކޮށް އެގެން އޮތް ގޮތުގައި މިމަޝްރޫއު ފުރަތަމަ ހަވާލު ކުރީވެސް ކުރިމަތިލީ ފަރާތްތަކުގެ ތެރެއިން އެންމެ ބޮޑު އަގު ހުށަހެޅި ފަރާތްތަކަށް ކަމަށެވެ. ތަނުގެ އިންޓަރެސްޓުގެ ގޮތުގައި އެތައް މިލިޔަނުން ފައިސާ ދައްކަންޖެހޭއިރު ތަން ނިންމައި ކުރީ ސަރުކާރުން ހަވާލުކީ ހަތަރު ފާރުކަމަށް ސަލީ ވިދާޅުވިއެވެ. ރައްޔިތުން ހިޔާ ފްލެޓްތަށް ދިޔައީ ބޯހިޔާވަހިކަން ހޯދުމަށް ކަމަށާއި، ނަމަވެސް ހިޔާވަހިކަން ނުލިބޭ ތަނަށް އެތަން ވުމުން ރައްޔިތުންގެ ޝަކުވާ މިއަދު އިންތިއަށް އޮތްކަމަށެވެ.
މިމައްސަލަ އާއިމެދު ހިތްހަމަ ނުޖެހެނީ ބޯހިޔާވަހިކަން ނުލިބި، ބޯހިޔާވަހިކަން ހޯދުމުގެ ނަމުގައި ހެދިތަނުން ހިޔާ ވަހިކަން ނުލިބޭތީ. ބޮޑު އަގުގައި އެތަން ބަޔަކަށްދީ، އެމަޝްރޫޢުގެ ސަބަބުން ދައުލަތް ދަރާ ވިކިފައިވާތީ. މިމަޝްރޫޢުގެ ތެރެއިން ރަނގަޅަށް ހިނގާފައިވާ އެންމެ ކަމެއްވެސްނެތް.
– ސަލީމް ވިދާޅުވިއެވެ.
ސަލީމް ވަނީ ހިޔާ ފްލެޓްތަކުގައި އަގު ކަނޑައަޅާފައިވާ ގޮތާއި އޮޑިޓް ރިޕޯޓުން ފެންނަން އޮތް ތަފްސީލްތަކަށްވެސް ބައްލަވާ ލައްވައި އެކަން ހިއްސާ ކުރައްވާފައެވެ. އޭނާ ވިދާޅުވީ މި ރިޕޯޓުން ރައްޔިތުންނަށް ސާފުވަނީ މިއީ ރައްޔިތުންނަށް ބޯހިޔާ ވަހިކަން ހޯދައި ދިނުމުގެ ނަމުގައި ވެފައިވާ ވަރަށް ބޮޑު ޚިޔާނާތެއްކަމަށް ސަލީމް ވަނީ ވިދާޅުވެފައެވެ.
ކުރީގެ ސަރުކާރުން ހިޔާ ހައުސިން ޔުނިޓަކަށް ކަނޑައަޅާފައި އޮންނަންވާނެ ސައްޙަ އަގަކީ ޔުނިޓަކަށް މަހަކު 10،419 ރުފިޔާކަމަށާއި، އޭރު ކަނޑައެޅިގޮތަށް މަހަކު 5،600 ރުފިޔާއަށް ހައުސިންގ ޔުނިޓެއް ވިއްކިނަމަ، އެޗްޑީސީއަށާއި ސަރުކާރަށް ލިބޭ މާލީ ގެއްލުން ބޮޑުވާނެކަމަށް އޮޑިޓް ރިޕޯޓުގައި ވަނީ ބުނެފައެވެ.
މި ރިޕޯޓުގައި އެޗް.ޑީ.ސީ އިން މި އަހަރު ކަނޑައެޅި 11،000 ރުފިޔާގެ އަގާއި، ކުރީގެ ސަރުކާރުގައި ހައުސިންގ މިނިސްޓްރީން 2018ވަނަ އަހަރު ކަނޑައެޅި 6،600 ރުފިޔާގެ ހިސާބާއި، މާލޭ ސިޓީ އައު ކައުންސިލުން މި އަހަރު ކަނޑައެޅި 5،548 ރުފިޔާގެ ހިސާބުގެ އިތުރުން ސަރުކާރުން ކަނޑައަޅާފައިވާ 8،500 އެކުލަވާލުމުގައި ގެންގުޅެފައިވާ އަސާސްތައްވަނީ ދިރާސާކޮށްފައެވެ.
މި ރިޕޯޓުގައިވާ ގޮތުން ކުރީގެ ސަރުކާރުން ނިންމާފައިވާ 6،600 ރުފިޔާއާއި މި އަހަރު މާލޭ ސިޓީ ކައުންސިލުން ހުށަހަޅާފައިވާ 6،500 ރުފިޔާއަށް ޔުނިޓުތައް ވިއްކައިފިނަމަ، 25 އަހަރުގެ މުއްދަތަކަށް ބަލާނަމަ، އެއްވެސް ޑީފޯލްޓެއް ނެތި، ހުރިހާ ޔުނިޓުތަކުން ޖުމްލަ ލިބޭނެކަމަށް އަންދާޒާކުރާ ފައިސާއިން ކުރަންޖެހޭ ޚަރަދުތައް ކެނޑުމުން ނެޓް-ކޭޝްފްލޯގެ ގޮތުގައި ގާތްގަނޑަކަށް ނުވަ ބިލިއަން ދުއިސައްތަ ނުވަ މިލިއަން ނުވަ ލައްކަ ހަތްދިހަ އެއް ހާސް ފަސް ސަތޭކަ ތިރީސް ދެ ރުފިޔާގެ ދަރަނި އަރާނެކަމަށް ވަނީ އަންދާޒާކޮށްފައެވެ.
