ސައުދީ ވަލީ އަހުދު މުހައްމަދު ބިން ސަލްމާން (އެމްބީއެސް)، އޭނާގެ ބައްޕަގެ ކުރިން އެގައުމުގެ ރަސްގެފާނުގެ މަގާމުގައި ހުންނެވި، އޭނާގެ ބޮޑުބޭބެ، އަބުދުﷲ ރަސްގެފާނު އަވަހާރަ ކޮށްލާނެކަމުގެ އިންޒާރު ދިންކަމަށް ސައުދީގެ ކުރީގެ އިންޓެލިޖެންސް އޮފިސަރަކު ވިދާޅު ވެއްޖެއެވެ.
އެމެރިކާއާއި ސައުދީ ގުޅިގެން ހިންގުނު ކައުންޓަރ ޓެރަރިޒަމް ހަރާކާތްތައްވެސް ބަލަހައްޓާފައިވާ ސާދު އަލް ޖަބުރީ، ސީބީއެސް ނިއުސް ޕްރޮގްރާމްގައި ވާހަކަ ދައްކަވަމުން ވިދާޅުވެފައިވަނީ، 2014ވަނަ އަހަރު، މިހާރުގެ ވަލީ އަހުދު މުހައްމަދު ބިން ސަލްމާނު އޭރުގެ ރަސްގެފާނު އަވަހާރަ ކޮށްލެވިދާނެކަމަށް ވިދާޅުވެފައިވާ ކަމުގައެވެ.
އޭރު އެމްބީއެސްއަކީ، ސައުދީ ރަސްކަމުގެ އެއްވެސް އިސް މަގާމެއްގައި ހުންނެވި ބޭފުޅެއް ނޫނެވެ. އޭރު އޭނާ ހުންނެވީ، އޭރުގެ ވަލީއަހުދު، އެމްބީއެސްގެ ބައްޕާފުޅު، އަދި މިހާރުގެ ރަސްގެފާނު ކިންގ ސަލްމާން ރޯޔަލް ކޯޓުގެ އިސް ވެރިއެއްގެ ގޮތުގައި ހުންނެވި އިރު ބައްޕާފުޅުގެ ދޮރުވާނެއްގެ ގޮތުގައެވެ.
މިހާރުގެ ރަސްގެފާނު ސަލްމާން ސައުދީ އަރަބިއާގެ ރަސްކަމަށް އިސްވެ ވަޑައިގަތީ، 2015ވަނަ އަހަރު، އޭރުގެ ރަސްގެފާނު، އޭނާގެ ބޭބޭފުޅުން ކިންގ އަބުދުﷲ އަވަހާރަ ވުމާއި ގުޅިގެންނެވެ.
ސީބީއެސްއަށް ދިން މިއިންޓަވިއުގައި ޖަބުރީ ވަނީ، ސައުދީ ޝާހީ އާއިލާގެ ބޮޑެތި ސިއްރުތަކާއި، އަދި އެމެރިކާގެ ބައެއް ސިއްރުތައްވެސް ހިމެނޭ، އޭނާގެ ވީޑިއޯ ރެކޯޑިންގެއެއް މިހާރު ހަދާފައިވާކަމުގެ އިންޒާރުވެސް އެމްބީއެސްއަށް ދީފައެވެ.
“The warning I received… ‘don’t go to the consulate. Don’t go to the embassy,’” says a former Saudi spy. In legal filings, he says a team was sent to Canada to kill him after Jamal Khashoggi’s murder in a Saudi Consulate in Turkey. https://t.co/VS0BR9D369 pic.twitter.com/5OJHnsm56B
— 60 Minutes (@60Minutes) October 24, 2021
އަދި ޖަބުރީ ވަނީ، އޭނާ މަރާލައިފިނަމަ، އެ ވީޑިއޯ އާންމު ކުރެވިގެންދާނެ ކަމަށްވެސް ވިދާޅުވެފައެވެ.
މިހާރު އަމިއްލައަށް ކެނެޑާއަށް އަރުވާލެވިގެން ހުންނެވި ޖަބުރީގެ ދެދަރިންވަނީ ސައުދީ އަރަބިއާގައި ގޭގައި ބަންދު ކުރެވިފައެވެ. އޭނާގެ ދެކުދިން ސައުދީ އަރަބިއާގައި ހައްޔަރު ކުރެވިފައިވަނީ، ޖަބުރީ އެބުރި ގައުމަށް ވަޑައިގަތުމަށް މަޖުބޫރު ކުރެވުމުގެ ގޮތުންނެވެ.
ޖަބުރީ ގައުމަށް އެބުރި ވަޑައިގެންފިނަމަ، އޭނާ ޖަލަށް ލުން، ނުވަތަ ގޭން ބަންދުކުރާނެ ކަމުގައި ވަނީ ބެލެވިފައެވެ. ޖަބްރީ ސައުދީ ސަރުކާރުގައި މަސައްކަތް ކުރެއްވިއިރު، އޭނާގެ ވެރިއެއްގެ ގޮތުގައި އޭރު ހުންނެވި، އޭރުގެ އިންޓީރިއަރ މިނިސްޓަރ، ކުރީގެ ވަލީއަހުދު، ޕްރިންސް މުހައްމަދު ބިން ނަޔަފްވެސް ފަހުންވަނީ ގޭގައި ބަންދު ކުރެވިފައެވެ. ސައުދީ ރަސްކަމަށް، އިސްވާނެ މީހެއްގެ މަގާމުގައި ހުންނަވަނިކޮށް، މުހައްމަދު ބިން ނަޔަފް ވަލީ އަހުދުކަމުން ދުރުކޮށް، ވަލީއަހުދު ކަމަށް ވަޑައިގެންނެވީ އެމްބީއެސްއެވެ.
މި އިންޓަވިވްގައި އަލް ޖަބްރީ ވިދާޅުވެފައިވަނީ، އޭނާ މަރާ ނުލެވެނީސް އެމްބީއެސްއަށް ހަމަޖެހުމެއް ނުލިބޭނެކަމަށެވެ. އަލްޖަބްރީއަކީ ސައުދީ ސަރުކާރުގެ ވަރަށް އެތެރޭގައި އަދި އެމްބީއެސްގެވެސް ވަރަށް އަރިސް ބޭފުޅެއްގެ ގޮތުގައި މަސައްކަތް ކުރައްވާފައިވާ ބޭފުޅެކެވެ.
