އައްޑޫގައި ހުންނަ އިކުއަޓޯރިއަލް ހޮސްޕިޓަލުން ފަރުވާ ދިނުން ލަސް ކުރި ކަމަށް އާއިލާއިން ބުނާ ތިން މަހުގެ ތުއްތު ކުއްޖަކު މާލެ ގެނެސް ފަރުވާދެމުން ދަނިކޮށް ނިޔާވެއްޖެއެވެ.
ތިން މަހުގެ ކުއްޖާ ނިޔާވީ އެކުއްޖާ ހާލު ސީރިއަސްވެ މާލެ ގެނެސް އައިޖީއެމްއެޗްގެ އެމަޖެންސީގައި ފަރުވާ ދެމުންދަނިކޮށެވެ. އެއީ ދުވަސް ނުުފުރާ، ބަނޑަށް އަށް މަހުގައި ސިޒޭރިއަން ހަދައިގެން ނެގި ކުއްޖެކެވެ. އަށް މަހުގެ ސިޒޭރިއަން ހަދައިގެން އެ ކުއްޖާ ނަގަން ޖެހުނީ ހާޓްބީޓް ދަށް ވެގެންނެވެ.
ތިން މަހުގެ ކުއްޖާ އާއިލީ މީހަކު ބުނީ އެކުއްޖާ، މަންމަގެ ގާތުން ބުއިން ހުއްޓާލުމުން ހޮސްޕިޓަލަށް ދެއްކީ މިމަހުގެ 19 ވަނަ ދުވަހުގެ ކަމަށެވެ. ހޮސްޕިޓަލަށް ދިޔުުމުން، ކުއްޖާ ގާތުން ބުއިން ހުއްޓާލި ސަބަބު އެގޭނީ ޓެސްޓްތަކެއް ހަދައިގެން ކަމަށް ބުނެ އެކުއްޖާއަށް އެއްވެސް ފަރުވާއެއް ނުދީ ބޭއްވީ ކަމަށެވެ. އަދި އެކުއްޖާއަށް ފަރުވާ ދޭން ފެށީ އެރޭ އިރާކޮޅު ހޮސްޕިޓަލަށް ގޮސް ހަޅޭއްލަވައި ގަތުމުން ކަމަށެވެ.
ކުއްޖާގެ ހާލަތު ފަހުން ގޯސްވީ ވޯޑުގައި އޮއްވާއެެވެ. ދެން ޑޮކްޓަރުގެ އިރުޝާދުގެ ދަށުން އެމާޖެންސީގައި އެ ކުއްޖާ މާލެ ފުރުވާލިއެވެ. އެ ކުއްޖާ އެމާޖެންސީގައި މާލެ ގެނެސްފައި ވަނީ އިއްޔެ ނޫން ކުރީ ދުވަހުއެވެ. އައިޖީއެމްއެޗްގެ ކުޑަކުދިންގެ ހާއްސަ ޑޮކްޓަރު، ފައިސަލްއާ ހަވާލާދީ ކުއްޖާގެ މަންމަގެ އާއިލާ މެންބަރު ބުނީ، އެ ކުއްޖާއަށް ކުރިން ފަރުވާދެވުނު ނަމަ ރަނގަޅުވާނެ ކަމަށް ވިދާޅުވި ކަމަށެވެ.
މިއަދު މިފަދަ މައްސަލައެއް ފެންމަތިވިއިރު، މިދިޔަ ހަފްތާ ތެރޭގައި ގދ.ތިނަދޫގައި ތިން މަހުގެ ތުއްތު ފިރިހެން ކުއްޖަކު ވަނީ ފަރުވާ ނުލިބިގެން ނިޔާވެފައެވެ. އެ ކުއްޖާ ނިޔާވީ އެރަށު ހޮސްޕިޓަލްގެ އިހުމާލުން ކަމަށް އެ ކުއްޖާގެ އާއިލާއިން ބުނެފައި ވެެއެވެ.
One Response
ހުރިހާ ތަނެއްގަ އިހުމާލު. އެމީހަކަށް ކެވުނު ވަރަކަށް ކައިގެން ހުންނަނީ. ޚިދުމަތަށް އެދިގެން ފުރާނަ އަތްމަތްޗަށް ލައިގެން ދިއަޔަސް މަރަށްތެޅިތެޅި އޮވެ މަރުވާން ދޫކޮށްލަނީ. އިންސާނިއްޔަތުގެ ޒައްރެއްގެ މިންވަރުވެސް ނެތްބައެއް. މިއަށްވުރެ ވަލުޖަނަވާރުންވެސް މާ ޚުލްގު ހެޔޮ.