ސައުދީ އަރަބިއާގެ އަމާޒަކީ 2060 އަންނަން ވާއިރަށް އެގައުމަކީ ކާބަން ނިއުޓްރަލް ގައުމަކަށް ވުން ކަމުގައި، ސައުދީ ވަލީ އަހުދު، އަދި ސައުދީ އަރަބިއާގެ ހަޔަރ ކޮމިޓީ ފޯރ ދަ ސައުދީ އިނިޓިއޭޓިވް (SGI)ގެ ވެރިޔާ މުހައްމަދު ބިން ސަލްމާން ވިދާޅުވެއްޖެއެވެ.
އޭނާ މިހެން ވިދާޅުވީ، ސައުދީ އަރަބިއާގައި ބޭއްވުނު ތިމާވެއްޓާ ބެހޭ ކޮންފަރެންސްގައި މިހަފްތާގެ ހޮނިހިރު ދުވަހު ވާހަކަ ދައްކަވަމުންނެވެ.
ކުރިން ރެކޯޑް ކޮށްފައިވާ ވީޑިއޯއެއްގައި، މި ކޮންފަރެންސްގައި ވާހަކަ ދައްކަވަމުން، ސައުދީ ވަލީ އަހުދު ވިދާޅުވީ، ސައުދީ އަރަބިއާގެ މިހާރުގެ އަމާޒަކީ، ސައުދީ ގްރީން އިނީޝީއޭޓިވްގެ ދަށުން، ކޮންމެ އަހަރަކުންވެސް، ޖައްވަށް ދޫކުރާ ގެދަބުޅީގެ މިންވަރު އަހަރަކަށް 270 މިލިއަން ޓަން މަދުކުރުން ކަމުގައެވެ. އަދި ސައުދީ އިނިޓިއޭޓިވް (SGI)އިން ތިމާވެށި ހިމާޔަތްކުރުމަށް 700 ބިލިއަން ރިޔާލް (186.63 ބިލިއަން އެމެރިކާޑޯލަރ) އިންވެސްޓް ކުރުމަށް ހަމަޖެހިފައި ވާކަމަށްވެސް އޭނާ ވިދާޅުވެފައި ވެއެވެ.
އެމްބީއެސް އިތުރަށް ވިދާޅުވި ގޮތުގައި، ސައުދީ އިނިޓިއޭޓިވް (SGI)އިން އެންމެ ފުރަތަމަ ހާސިލް ކުރުމަށް ބޭނުންވާ އަމާޒަކީ، 2030ގެ ކުރިން، ޖައްވަށް ދޫކުރާ ގެންދަބުޅީގެ މިންވަރުން އަހަރަކު 278 މިލިއަން ޓަނަށްވުރެ މަތީ އަދަދަކުން މަދު ކުރުމެވެ.
