ބައިނަލް އަގްވާމީ އެއާ ޓްރެފިކް ކޮންޓްރޯލަރުންގެ ދުވަހާ ގުޅިގެން ރާއްޖޭގެ އޭޓީސީ މުވައްޒަފުން ކަޅު ހެދުމުގައި ވަޒީފާއަށް ނިކުމެ ހިމޭން އިހުތިޖާޖެއް ކޮށްފިއެވެ.
އޭވިއޭޓާސް އެމްވީ އިން ކޮށްފައިވާ ޓުވީޓެއްގައި ބުނެފައިވަނީ ކަޅު ހެދުމުގައި ވަޒީފާއަށް ނުކުތީ އެފަރާތްތަކުގެ ކަންބޮޑުވުންތައް ކަމާބެހޭ ފަރާތްތަކުގެ ސަމާލުކަމަށް ގެނައުމުގެ ގޮތުން ކަމަށެވެ. އެއާ ޓްރެފިކް ސާވިސަސް (އޭޓީސީ) ހިންގަމުންދާ ގޮތާ މެދު މުވައްޒަފުންގެ ހުރި ކަންބޮޑުވުންތަކަށް ހައްލެއް ނުލިބޭތީ ޕެޓިޝަނެއްގައި ސޮއިކުރުމަށްފަހު ކަމާ ގުޅުންހުރި އިދާރާތަކަށް މިމަހުގެ 18 ވަނަ ދުވަހު ވަނީ ހުށަހަޅާފައެވެ.
އޮކްޓޯބަރު 20 ވަނަ ދުވަހަކީ ބައިނަލްއަގްވާމީ އެއާ ޓްރެފިކް ކޮންޓްރޯލަރުންގެ ދުވަސް ކަމަށް ވާތީ ވެލާނާ އިންޓަނޭޝަނަލް އެއާޕޯޓާއި މާމިގިލީ އެއާޕޯޓުގައި ވަޒީފާ އަދާ ކުރާ މުވައްޒަފުން ވަޒީފާއަށް އިއްޔެ ނުކުތީ ކަޅު ހެދުމުގައެވެ.
Air traffic controllers working at Velana International Airport and Maamigili Airport reported to duty today on the occasion of International Air Traffic Controllers Day in all black outfits to make aware of concerns raised by ATCO’s. pic.twitter.com/lT2xV6JJUP
— AviatorsMaldives (@AviatorsMaldive) October 20, 2021
މުވައްޒަފުން ތައްޔާރުކޮށްފައިވާ ޕެޓިޝަންގައި އަށް ކަމެއް ވަނީ ފާހަގަކޮށްފަ އެވެ، އެގޮތުން އެ މުވައްޒަފުންނަށް މަގާމާއި މުސާރައިގެ ކުރިއެރުން ލިބޭނެ އޮނިގަނޑެއް ހަދާފައި ނުވާތީ އެ މައްސަލަ އެންމެ ބޮޑު ކަންބޮޑުވުމުގެ ގޮތުގައި ފާހަގަކޮށްފައިވެ އެވެ. 2019 ވަނަ އަހަރު އެފަދަ އޮނިގަނޑެއް އެކުލަވައިލި ނަމަވެސް އެ އޮނިގަނޑު ރައީސް އޮފީހަށް ފޮނުވާފައި ވަނިކޮށް ކޮވިޑް-19ގެ ބަލިމަޑުކަމާ ގުޅިގެން އޮނިގަނޑުގެ ވާހަކަ ހުއްޓިފައިވާ ކަމަށް ފާހަގަކޮށްފައިވެ އެވެ.
އޭޓީސީގެ ކޮންޓްރޯލަރުން، ޕައިލެޓުންނާއި ޑޮކްޓަރުން ފަދަ ވަޒީފާތަކާއި އެއް ގިންތިއެއްގައި ގިންތިކޮށްފައިވީ ނަމަވެސް މުސާރައާއި އެހެނިހެން އިނާޔަތްތައް ދިނުމުގައި އެ ޕްރޮފެޝަންތަކާއި އެއްހަމައެއްގައި އޭޓީސީގެ މުވައްޒަފުންނާ މެދު އަމަލުނުކުރާ ކަން ޕެޓިޝަންގައި ފާހަގަކޮށްފައިވެ އެވެ. އަދި އެ ޕްރޮފެޝަންތަކުން ގިނަ ދުވަހު ހިދުމަތްކުރުމުން ރިޓަޔާކޮށް އިނާޔަތްތައް ދޭ ގޮތަށް އޭޓީސީގެ މުވައްޒަފުންނަށް އިނާޔަތް ނުލިބޭ ކަން ވެސް ވަނީ ހިމަނާފައެވެ.
ޕެޓިޝަނުގައިވާ ގޮތުން އޭޓީސީގެ މުވައްޒަފުންނަށް ތަމްރީނު ދިނުމުގެ ހަރުދަނާ އުސޫލެއް ނެތެވެ. އަދި މުވައްޒަފުންނަށް އެއްވެސް ތަމްރީނެއް ނުލިބޭ ކަމަށްވެސް ބުނެފައިވެއެވެ. ޕެޓިޝަންގައި ބުނެފައި ވަނީ ސަލާމަތާ ގުޅުންހުރި ޝަކުވާތައް ނުވަތަ މައްސަލަތައް ކަމާބެހޭ ފަރާތްތަކަށް ރިޕޯޓުކުރަން ކޮންޓްރޯލަރުން ޖެހިލުންވާ ކަމަށެވެ. އެހެންވެ ހަރުދަނާ ސޭފްޓީ ރިޕޯޓިން ސިސްޓަމެއް ގާއިމުކުރުމަށްވެސް އެދިފައިވެއެވެ.
ކޮންޓްރޯލަރެއްގެ ބަލި ހާލަތު ނިޔާކުރާ ގޮތުން ލައިސަންސް ދޫކޮށްލަން ޖެހިއްޖެ ހާލަތެއްގައި ވަޒީފާގައި ދެމި ހުރެވޭނެ އެހެން ގޮތެއް ކަނޑައެޅިފައި ނެތުމަކީ ވެސް މުވައްޒަފުންގެ ކަންބޮޑުވުމެކެވެ. އޭވިއޭޝަން ދާއިރާގެ ތަޖުރިބާ އާއި މަތީ ތައުލީމު ލިބިފައިވީ ނަމަވެސް ކުންފުނީގައި މުވައްޒަފުން ހިފަހައްޓާނެ ހަރުދަނާ ޕޮލިސީއެއް ނެތުމަކީ ވެސް މުވައްޒަފުންގެ ކަންބޮޑުވުމެކެވެ.
އޭޓީސީ ހިންގުމުގެ އާ އޮނިގަނޑެއް މިދިޔަ ސެޕްޓެމްބަރު މަހު ފާސްކުރި ނަމަވެސް އެ އޮނިގަނޑުން މުވައްޒަފުންގެ އެއްވެސް ކަންބޮޑުވުމަކަށް ހަލެއް އައިސްފައި ނުވާ ކަމަށް ޕެޓިޝަންގައި ބުނެފައިވެ އެވެ. އެކަމަކު އޮނިގަނޑު ފާސްކުރުމާ ހިސާބުން ތަނުގެ އިސްވެރިންނަށް މަގާމުގެ ކުރިއެރުން ލިބުނު ކަމަށް މުވައްޒަފުން ބުނެއެވެ.
