ފުލުހުންގެ ބޯޑަށް ދިން ބާރުތަކުގެ ބޭނުންކޮށް ފުލުހުންގެ އިސް ހަތް އޮފިސަރަކު ވަޒީފާ އިން ވަކިކުރަން ނިންމާފައިވާ ފުލުހުންގެ ހަތް އޮފިސަރުންގެ ތެރެއިން 3 އޮފިސަރަކު ވަޒީފާއިން ވަކިނުކުރުމަށް ހައި ކޯޓުން އަމުރުކޮށްފިއެވެ.

މި ތިން ފުލުހުން މިރޭ 12:00 އިން ފެށިގެން ވަޒީފާއިން ވަކިވާނެ ކަމަށް ވަނީ ނޯޓިސް ދީފައެވެ. މިއަދު ބޭއްވި އަޑު އެހުމުގައި ޕޮލިސް ބޯޑުން ވަކިކުރަން ނިންމާފައިވާ ޗީފް ސުޕްރިންޓެންޑެންޓް އަބްދުﷲ ޝަރީފް އާއި، ސުޕްރިންޓެންޑެންޓް އިސްމާއިލް ޝަމީމްގެ އިތުރުން ސުޕްރިންޓެންޑެންޓް މުހައްމަދު ދާއޫދު ވަޒީފާއިން ވަކިކުރުން މަޑުޖައްސައިލުމަށް ހައިކޯޓުން ވަނީ އަމުރު ކޮށްފައެވެ.

ފުލުހުންގެ ގާނޫނުގެ ދަށުން އުފެދުނު ޕޮލިސް ބޯޑުގެ ލަފައާ އެކު، ފުލުހުންގެ އިސް ހަތް އޮފިސަރަކު ވަޒީފާއިން ވަކިކުރަން ނިންމުމުން އޭގެ ތެރެއިން ފަސް އޮފިސަރަކު ވަނީ އެ މައްސަލަ ސިވިލް ކޯޓަށް ހުށަހަޅައިފަ އެވެ. އެއީ އެސިސްޓެންޓް ކޮމިޝަނާ އޮފް ޕޮލިސް މުހައްމަދު ޖަމްޝީދާއި އެސިސްޓެންޓް ކޮމިޝަނާ އޮފް ޕޮލިސް އަހުމަދު މުހައްމަދާއި ޗީފް ސުޕްރިޓެންޑެންޓް އޮފް ޕޮލިސް އަބްދުﷲ ޝަރީފާއި ސުޕްރިޓެންޑެންޓް އޮފް ޕޮލިސް މުހައްމަދު ދާއޫދުގެ އިތުރުން ސުޕްރިޓެންޑެންޓް އޮފް ޕޮލިސް އިސްމާއިލް ޝަމީމެވެ.

އޮފިސަރުންގެ ފަރާތުން މި މައްސަލައިގައި ވަކާލާތުކުރައްވާ ދިފާއީ ވަކީލް އަދި ކުރީގެ ޑެޕިއުޓީ ޕްރޮސެކިއުޓާ ޖެނެރަލް މަރިޔަމް ނިހާޔަތު ވިދާޅުވެފައި ވަނީ އޮފިސަރުން ވަކިކުރަން ޕޮލިސް ބޯޑުން ނިންމާފައި ވަނީ އެމީހުންގެ މައްޗަށް އެއްވެސް ތަހުގީގެއް ނުހިންގައި ކަމަށެވެ. އަދި ޖަވާބުދާރީވުމުގެ ފުރުސަތު ވެސް ދީފައި ނުވާ ކަމަށެވެ. ކޯޓުން އެ އަމުރު ނެރެފައި ވަނީ އެ އޮފިސަރުންގެ ހައްގުތައް ގެއްލޭ ގޮތަށް ކަމަށާއި، މައްސަލަ ސިވިލް ކޯޓަށް ހުށަހެޅިއިރު އޮތް ހާލަތާ މިހާރު އޮތް ހާލަތާ ތަފާތުވެފައިވާ ކަމަށެވެ.

ސިވިލް ކޯޓަށް މައްސަލަ ހުށަހަޅާފައި ވަނިކޮށް މި މައްސަލައިގައި ހިމެނޭ އެސިސްޓެންޓް ކޮމިޝަނާ އަހްމަދު މުހައްމަދާއި، އެސިސްޓެންޓް ކޮމިޝަނާ މުހައްމަދު ޖަމްޝީދު މަގާމުން ވަކިކޮށްފައިވާ ކަމަށް ނިހާޔަތު ވަނީ ފާހަގަކުރައްވާފައެވެ. އަދި ސިވިލް ކޯޓަށް ހުށަހަޅާފައިވާ މައްސަލަ ނިމެންދެން އެ ނިންމުން ތަންފީޒުކުރުން ފަސްކޮށްދިނުމަށް ވެސް ވަނީ އެދިވަޑައިގެންފައެވެ.

އެ މައްސަލާގެ ޝަރީއަތް ހައި ކޯޓުން މިއަދު ފެށުމާ އެކު، ފަސް އޮފިސަރުންގެ ފަރާތުން އެދުނީ އެ މައްސަލަ ހައި ކޯޓުން ނިމެންދެން އެ ބޭފުޅުން ވަޒީފާއިން ވަކިކުރުން ހުއްޓުވައި ދިނުމަށެވެ. އަދި އެ މައްސަލަ ސިވިލް ކޯޓުގައި ހިނގަމުން ދަނިކޮށް ޖަމްޝީދާއި އަހުމަދު މުހައްމަދު ވަޒީފާއިން ވަކިކޮށްފައިވާ ކަން އެ ބޭފުޅުންގެ ވަކީލުން ފާހަގަ ކުރެއްވި އެވެ. އެހެން ނަމަވެސް އެފަދަ އަމުރެއް ނެރެން ދައުލަތުން ދެކޮޅު ހެދިއެވެ. މިއަދުގެ އަޑުއެހުމުގައި ހައި ކޯޓުން އަމުރުކުރީ ވަގުތީ އަމުރު ނެރުމާ މެދު ހައި ކޯޓުން ގޮތެއް ނިމެންދެން، ޝަރީފާއި ދާއޫދުގެ އިތުރުން ޝަމީމްގެ ވަކިކުރުމުގެ ނިންމުމަށް އަމަލު ކުރުން ފަސްކުރުމަށެވެ. އެކަމަކު މިހާރު ވަޒީފާއިން ވަކި ކޮށްފައިވާ ޖަމްޝީދާއި އަހުމަދު މުހައްމަދުގެ ބަޔާ މެދު އެއްވެސް އެންގުމެއް ހައި ކޯޓުން މިއަދު ނާންގައެވެ.