އެއާ ޓްރެފިކް ސާވިސަސް (އޭޓީސީ) ހިންގަމުންދާ ގޮތާ މެދު މުވައްޒަފުންގެ ހުރި ކަންބޮޑުވުންތަކަށް ހައްލެއް ނުލިބޭތީ ޕެޓިޝަނެއްގައި ސޮއިކުރުމަށްފަހު ކަމާ ގުޅުންހުރި އިދާރާތަކަށް ހުށަހަޅައިފިއެވެ.

މުވައްޒަފުން ތައްޔާރުކޮށްފައިވާ ޕެޓިޝަންގައި އަށް ކަމެއް ވަނީ ފާހަގަކޮށްފަ އެވެ، އެގޮތުން އެ މުވައްޒަފުންނަށް މަގާމާއި މުސާރައިގެ ކުރިއެރުން ލިބޭނެ އޮނިގަނޑެއް ހަދާފައި ނުވާތީ އެ މައްސަލަ އެންމެ ބޮޑު ކަންބޮޑުވުމުގެ ގޮތުގައި ފާހަގަކޮށްފައިވެ އެވެ. 2019 ވަނަ އަހަރު އެފަދަ އޮނިގަނޑެއް އެކުލަވައިލި ނަމަވެސް އެ އޮނިގަނޑު ރައީސް އޮފީހަށް ފޮނުވާފައި ވަނިކޮށް ކޮވިޑް-19ގެ ބަލިމަޑުކަމާ ގުޅިގެން އޮނިގަނޑުގެ ވާހަކަ ހުއްޓިފައިވާ ކަމަށް ފާހަގަކޮށްފައިވެއެވެ.

ފާއިތުވެދިޔަ ތިން އަހަރު ތެރޭގައި ރައީސުލްޖުމުހޫރިއްޔާގެ އޮފީހާއި، މިނިސްޓްރީ އޮފް ޓްރާންސްޕޯރޓް އެންޑް ސިވިލް އޭވިއޭޝަނާއި، މޯލްޑިވްސް ސިވިލް އޭވިއޭޝަން އޮތޯރިޓީ އަދި މޯލްޑިވްސް އެއާޕޯޓްސް ކޮމްޕެނީ ލިމިޓެޑާއި ބައްދަލުކޮށް، މުވައްޒަފުންގެ ހުރި ކަންބޮޑުވުންތައް، އެ މުއައްސަސާތަކުގެ ވެރިންގެ ސަމާލުކަމަށް ގެނެސް، އެކަންކަން ޙައްލު ކޮށްދިނުމަށް އެދިފައިވާނެ ކަމަށްވެސް ޕެޓިޝަންގައި ވަނީ ބުނެފައެވެ. އެހެންނަމަވެސް މިއަދާ ހަމައަށްވެސް މިއިން އެއްވެސްކަމަކަށް އެދެވޭ ޙައްލެއް ލިބިފައިނުވާކަން ޕެޓިޝަންގައި ފާހަގަ ކޮށްފައި ވެއެވެ.

މުވައްޒަފުން ހައްލު ކޮށްދޭން އެދިފައިވާ އެއްކަމަކީ އޭޓީސީ މުވައްޒަފުންނަށް މަޤާމާއި މުސާރައިގެ ކުރިއެރުން ލިބޭނެ ރަނގަޅު އޮނިގަނޑެއް މިހާތަނަށް ހެދިފައި ނުވާތީ، މަޤާމާއި މުސާރައިގެ ކުރިއެރުން ލިބިދެވޭނެ ހަރުދަނާ އޮނިގަނޑެއް އެކުލަވައިލަދިނުމަށެވެ.

އޭޓީސީގެ ކޮންޓްރޯލަރުން، ޕައިލެޓުންނާއި ޑޮކްޓަރުން ފަދަ ވަޒީފާތަކާއި އެއް ގިންތިއެއްގައި ގިންތިކޮށްފައިވީ ނަމަވެސް މުސާރައާއި އެހެނިހެން އިނާޔަތްތައް ދިނުމުގައި އެ ޕްރޮފެޝަންތަކާއި އެއްހަމައެއްގައި އޭޓީސީގެ މުވައްޒަފުންނާ މެދު އަމަލުނުކުރާ ކަން ޕެޓިޝަންގައި ފާހަގަކޮށްފައިވެއެވެ. އަދި އެ ޕްރޮފެޝަންތަކުން ގިނަ ދުވަހު ހިދުމަތްކުރުމުން ރިޓަޔާކޮށް އިނާޔަތްތައް ދޭ ގޮތަށް އޭޓީސީގެ މުވައްޒަފުންނަށް އިނާޔަތް ނުލިބޭ ކަން ވެސް ވަނީ ހިމަނާފައެވެ.

ޕެޓިޝަނުގައިވާ ގޮތުން އޭޓީސީގެ މުވައްޒަފުންނަށް ތަމްރީނު ދިނުމުގެ ހަރުދަނާ އުސޫލެއް ނެތެވެ. އަދި މުވައްޒަފުންނަށް އެއްވެސް ތަމްރީނެއް ނުލިބޭ ކަމަށްވެސް ބުނެފައިވެއެވެ. ޕެޓިޝަންގައި ބުނެފައި ވަނީ ސަލާމަތާ ގުޅުންހުރި ޝަކުވާތައް ނުވަތަ މައްސަލަތައް ކަމާބެހޭ ފަރާތްތަކަށް ރިޕޯޓުކުރަން ކޮންޓްރޯލަރުން ޖެހިލުންވާ ކަމަށެވެ. އެހެންވެ ހަރުދަނާ ސޭފްޓީ ރިޕޯޓިން ސިސްޓަމެއް ގާއިމުކުރުމަށްވެސް އެދިފައިވެއެވެ.

ކޮންޓްރޯލަރެއްގެ ބަލި ހާލަތު ނިޔާކުރާ ގޮތުން ލައިސަންސް ދޫކޮށްލަން ޖެހިއްޖެ ހާލަތެއްގައި ވަޒީފާގައި ދެމި ހުރެވޭނެ އެހެން ގޮތެއް ކަނޑައެޅިފައި ނެތުމަކީ ވެސް މުވައްޒަފުންގެ ކަންބޮޑުވުމެކެވެ. އޭވިއޭޝަން ދާއިރާގެ ތަޖުރިބާ އާއި މަތީ ތައުލީމު ލިބިފައިވީ ނަމަވެސް ކުންފުނީގައި މުވައްޒަފުން ހިފަހައްޓާނެ ހަރުދަނާ ޕޮލިސީއެއް ނެތުމަކީ ވެސް މުވައްޒަފުންގެ ކަންބޮޑުވުމެކެވެ.

ޕެޓިޝަންގައި ބަޔާންކޮށްފައިވާ ކަންކަން ޙައްލުކުރުމަކީ މުހިއްމުކަމެއް ކަމުގައި ދެކޭތީ، މިކަންކަން ޙައްލުކޮށްދިނުމަށް އެދި އަޑުއުފުލުމުގެ ގޮތުން ޕެޓިޝަންގައި ސޮއި ކުރީ ކަމަށް ޕެޓިޝަންގައި ބުނެފައިވެއެވެ.