އަނިޔާވެރި ގޮތަކަށް މަރާލާފައި އޮއްވައި ފެނުނު އދ.ދަނގެތީ މޮނަލާޒް، މަހްމޫދު އަބޫބަކުރުގެ މަރަށް މިއަށް މިވަނީ 3 ދުވަސް ވެފައެވެ.
މަރާއި ގުޅިގެން ދައުލަތުގެ ތަހުގީގީ މައި އިދާރާ ފުލުހުންގެ މުވައްސަސާއިން ގެންދަނީ އެބޭފުޅުންގެ ޤާނޫނީ ޒިންމާ އަދާކުރަމުންނެވެ. ނަމަވެސް މަރަށް 3 ދުވަސް ވެފައިވާއިރުވެސް ގިނަ ބައެއްގެ ސަމާލުކަން ހުއްޓުނީ ދައުލަތުގެ ކަމާއި ގުޅުންހުރި އެއްވެސް ވެރިއެއްގެ ފަރާތުން މިމަރާއި ގުޅިގެން އެއްވެސް ބަހެއް އަޑު ނީވުމެވެ.
މީގެކުރިން މިފަދަ އަނިޔާވެރި ގޮތަކަށް ހިނގާ މަރުތަކާއި ގުޅިގެން ހޯމް މިނިސްޓަރ އިމްރާން އަބްދުﷲ އާއި، ސީޕީ ހަމީދުގެ އިތުރުން، ރައީސުލްޖުމްހޫރިއްޔާއާއި ބައެއް އިސް މަޤާމުތަކުގައި ތިއްބަވާ ބޭފުޅުންގެ މިފަދަ އަމަލުތައް ކުށްވެރިކޮށް، މިކަންކަމުގެ އިންސާފު ގާއިމް ކޮށްދެއްވާނެކަމަށް ގެންދިޔައީ ވިދާޅުވަމުންނެވެ. ނަމަވެސް މިފަހަރު މިމަރަށް 3 ދުވަސް ވެގެންދާއިރުވެސް ކަމާއިބެހޭ އެއްވެސް ބޭފުޅެއްގެ ހިލަމެއް ނެތެވެ.
މިމަރާއި ގުޅިގެން ރާއްޖޭގެ ރައްޔިތުންނަށްވެސް ބޮޑު ސިހުމެއް ލިބިފައިވާއިރު، ވެރިންގެ ސަމާލުކަމަށް އެއީ މުޅިން އެހެން މަރެކެވެ. އިނގިރޭސި ވިލާތުގެ މަޖިލިސް މެމްބަރަކަށް ވަޅިން ހަމަލާދީ މަރާލުމާއި ގުޅިގެން ރާއްޖޭގެ ހުރިހާ ވެރިން ގެންދަނީ މިކަމުގައި ކަންބޮޑުވުން ފާޅުކޮށް، އެއާއިލާއަށް ތައުޒިޔާ ދަންނަވަމުންނެވެ. ނަމަވެސް މިއަދާއި ހަމައަށްވެސް މަހުމޫދުގެ އާއިލާއަށް ވެރިންގެ ފަރާތުން ތައުޒިޔާ ވިދާޅުވެ، ހިތްވަރު ދިނުމުގެ މެސެޖެއްވެސް ފެނިފައިނުވެއެވެ.
I am shocked and appalled at the news that @amessd_southend has been attacked and killed while carrying out his constituency duties. He was a good friend of the Maldives over many years, head of the Maldives All Party Parliamentary Group, and will be sorely missed.
— Mohamed Nasheed (@MohamedNasheed) October 15, 2021
އަނިޔާވެރި ގޮތަކަށް މަރާލާފައި އޮއްވައި އިއްޔެ ފެނުނު އދ.ދަނގެތީ މޮނަލާޒް، މަހްމޫދު އަބޫބަކުރުގެ ޖަނާޒާ ބާއްވައިފައިވަނީ އިއްޔެ އަސްރު ނަމާދަށްފަހުއެވެ. މި މަރުގެ ތަޙުޤީޤާގުޅޭ އެއްވެސް މަޢުލޫމާތެއް މިހާތަނަށް ފުލުހުން ހާމަކުރައްވާފައެއް ނުވެއެވެ. އަދި މިމައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައެއްވެސް ނުވެއެވެ.
ނަމަވެސް މަޙުމޫދު މަރާލިކަމަށް، ރަށުގެ ރައްޔިތުން ޝައްކުކުރާ 3 މީހަކު ވަނީ ފުލުހުންނާ ހަވާލުކޮށްފައެވެ. މީގެތެރޭގައި ހިމެނެނީ 2 ފިރިހެނުންނާ އަންހެނެކެވެ. މި 3 މީހުން އަދިވެސް ތިބީ ދަނގެތީ ފުލުހުންގެ ބެލުމުގެދަށުގައެވެ. ފުލުހުން ގެންދަނީ މިހާރުވެސް ޝައްކު ކުރެވޭ ބިދޭސީއެއް ދިރިއުޅޭ ގެއް ބަލާ ފާސްކުރަމުންނެވެ.
ކޮމެންޓު ފޮނުވާ