މިއަހަރުގެ ސާފް ޗެމްޕިއަންޝިޕް ވެގެން މިދިޔައީ ހުރިހާ ގޮތަކުންވެސް ދިވެހި ރާއްޖެއަށް ޚާއްސަ މުބާރާތަކަށެވެ. ސަބަބަކީ، މި މުބާރާތް ދިވެހި ފަސްގަޑުގައި ކުޅެ، އަދި މިފަހަރު ދިވެހި ޓީމު މި މުބާރާތަށް ނިކުމެފައިވަނީ، ދިވެހި ފުޓްބޯޅާގައި ކުރިއަރަމުން އަންނަ އުއްމީދީ ޒުވާން އެތައް ތަރިންނަކާ އެކީ، ތަށި ދިފާޢު ކުރުމުގެ ވަރުގަދަ އުއްމީދުގައި ކަމަށް ވާތީއެވެ.
އަދި މިއީ ގިނަ ދުވަސްތަކަކަށް މެދު ކެނޑުމަށްފަހު، ފަހުގެ ތާރީޚެއްގައި ރާއްޖޭގައި ބާއްވާ ބައިނަލް އަގުވާމީ ފެންވަރުގެ ފުރަތަމަ ފުޓް ބޯޅަ މުބާރާތަށް ވުމުގެ އިތުރުން، މިފަހަރުގެ ސާފް ޗެމްޕިއަންޝިޕް ރާއްޖެއަށް ޚާއްސަވެގެންދިޔަ އަނެއް ސަބަބަކީ، އެންމެ ފަހުގެ ޗެމްޕިއަނުންގެ ގޮތުގައި ރާއްޖެ މުބާރާތުގެ ތަށި ދިފާއު ކުރަން ނިކުތް ނިކުތުމެވެ. މި ފުރުސަތަކީ އަމިއްލަ ދަނޑުގައި، އަމިއްލަ ސަޕޯޓަރުންގެ ކުރިމަތީގައި ކުޅެ ރާއްޖެއަށް މިހާތަނަށް ހޯދިފައި ނުވާ ކާމިޔާބީއެއް އަދި ޝަރަފެކެވެ. މި މުބާރާތް ރާއްޖޭގައި ކުޅުނު އެއްވެސް ފަހަރެއްގައި މިހާތަނަށް އަމިއްލަ ސަޕޯޓަރުންގެ ކުރިމަތީގައި ރާއްޖެއަށް އަދި މުބާރާތުގެ ތަށި އުފުލާލެވިފައެއް ނުވެއެވެ. އަދި މީގެ އިތުރުން މިފަހަރު ރާއްޖޭގައި ބޭއްވިގެން މިދާ ސާފް ޗެމްޕިއަންޝިޕަކީ ރާއްޖޭގައި ގައުމީ ޓީމު ވާދަކޮށްގެން ބާއްވާ ސީނިއާ ލެވަލްގެ ހަތަރު ވަނަ މުބާރާތްވެސް މެއެވެ.
އެހެންނަމަވެސް، މިހުރިހާ ސަބަބަތައްވެސް މިގޮތުގއަި ހުރެމެ، އަދި ދިވެހި ގައުމީ ޓީމުގެ ކުޅުންތެރިންނާއި ސަޕޯޓަރުން ދެއްކި ހިތްވަރާއި ފޯރީއާއި، ވަރުގަދަ ޖޯޝާއި އެކީވެސް، މުބާރާތުގައި ރާއްޖެ ކުޅުނު 5 މެޗުގެ ތެރެއިން 2 މެޗުން ބަލިވެ، މުބާރާތުގެ ފައިނަލުގައި ކުޅުމަށް ޓީމުގެ ކުޅުންތެރިންނާއި ދިވެހި ސަޕޯޓަރުން ކުރި އުއްމީދުތައް ވިއްސި ވިހާލިވެ، ރާއްޖެ މުބާރާތަށް އަލްވަދާޢު ކިޔަންޖެހިފައިވަނީ، ރޭ އިންޑިއާއާއި ދެކޮޅަށް ކުޅުނު މެޗް 3-1 އިން އިންޑިއާ އަތުން ބަލި ވެގެންނެވެ.
އެހެންނަމަވެސް ގަބޫލު ކުރަންޖެހޭ ހަގީގަތަކީ، ރޭގެ މެޗްގައި މިސްޓޭކްތައް ހެދި، ބަލިވެ، ރާއްޖެ މުބާރާތާއި އަލްވަދާޢު ކިޔަންޖެހުނު ކަމުގައިވި ނަމަވެސް، ދިވެހި ކުޅުންތެރިން މުޅި މުބާރާތުގައި ދަނޑު މަތީގައި ކުރި މަސައްކަތާއި، ދެއްކި ހިތްވަރާއި އަދި ކުޅުންތެރިންނަށް ހިތްވަރު ދިނުމުގެ ގޮތުން ދިވެހި ސަޕޯޓަރުން ދެއްކި ލާމަސީލު މިސާލަށް އައްސަރިބަހާއި ސާބަސް ހައްގު ކަމެވެ.
ކުޅިވަރުގައި މޮޅުވުމާއި ބަލިވުމަކީ ތަބީއީ ކަމެކެވެ. ބަލިވާ ކޮންމެ ފަހަރަކު އަލުން ހިތްވަރު ގަދަކޮށް، ތެދުވެ، އާ އުއްމީދަކާއެކު ދުއްވައިގަންނަން އަޒުމް ކަޑައެޅުމަކީ، އެއީ ކުޅިވަރުގައި ކާމިޔާބީގެ ހަގީގީ ތަޅުދަނޑި ކަމުގައި ގަބޫލުކޮށް، އެމަގުން ކުރިޔަށް ދިއުމަށް މިއަދު އަޒުމް ކަޑައަޅަން ޖެހެއެވެ.
މުބާރާތުގެ އިންތިޒާމްތައް ރަގަޅުތަ؟
މިފަހަރުގެ ސާފް ޗެމްޕިއަންޝިޕާ ދިވެހިން ކުރިމަތިލީ، ދަށި ދިފާޢު ކުރުމުގެ ފޮނި އުއްމީދާއެކީއެވެ. އަދި އެއީ އަމިއްލަ ފަސްގަޑުގައި ކުޅެ، މިތަށި އަދި މިހާތަނަށް އުފުލާލެވިފައި ނުވާތީއާއިއެކީ، މިފަޚުރުވެސް ހޯދައިގަތުމުގެ ވަރުގަދަ އަޒުމުގައެވެ.
ނަތީޖާއެއްގެ ގޮތުން، މުބަރާތަށް ޚާއްސަ ޝިއާރުތަކެއް އެކުލަވާލާ، ސޯޝަލް މީޑިއާގައި ޓީމަށް ތާޢީދުކުރުމުގެ ގޮތުން، ދިވެހި ފުޓުބޯޅައަށް ލޯބިކުރާ އެތައް ބަޔަކު ވަނީ އެތައް ގޮތަކުން ޝުއޫރު ފާޅު ކޮށްފައެވެ. އަދި ހަމަ އެފަދައިން، ސަރުކާރު އޮފީސްތަކުންނާއި، އަމިއްލަ ބައެއް ފަރާތްތަކުން، މި އުސޫލުން ދިވެހި ގައުމީ ޓީމަށް ތާއީދު ކުރުމުގެ ގޮތުން ރަތްކުލާގައި ބައެއް ހަރަކާތްތައް އިންތިޒާމް ކުރުމުގެ އިތުރުން، ދަނޑަށް ހާޒިރުވެ ދިވެހި ޓީމަށް ސަޕޯޓު ކޮށްފައިވާކަން މިފުރުސަތުގައި ފާހަގަ ކޮށްލަން ޖެހެއެވެ.
އެހެންނަމަވެސް ފާހަގަ ކޮށްލަންޖެހޭ އެންމެ މުހިންމު އެއް ނުކުތާއަކީ، މުޅި މުބާރާތް އިންތިޒާމްކޮށް، އަދި އޭގެ އިތުރުން، ގައުމީ ޓީމަށް ހިތްވަރު ދިނުމުގެ ހުރިހާ ސްޓްރަޖީއެއް އެކުލަވާލާ، ކަންކަން ފަސޭހަކޮށް، އަދި އެއިދާރާއެއްގެ ބަޖެޓުން ބޮޑެތި ޚަރަދުތަކެއް ކުރުމުގެ ޒިންމާއާއި މަސްއޫލިއްޔަތުތަކާވެސް ހަވާލުވެ އޮތް މުވައްސަސާއަކީ ފުޓްބޯޅަ އެސޯސިއޭޝަން އޮފް މޯލްޑިވްސް، އެފްއޭއެމް ކަމެވެ.
މިގޮތުން، ސާފް ޗެމްޕިއަންޝިޕް ދިވެހިރާއްޖެއަށް ނިމި، ދިވެހި ފިޓްބޯޅަ ޓީމު މި މުބާރާތާ އަލްވަދާޢު ކިޔަންޖެހިފައިވާއިރު، މިފަދަ ބޮޑު މުބާރާތެއް ރާއްޖޭގައި ނިމިގެން ދިޔައިރު، ޓީމަށް ތާއީދުކުރާ އެތައްކެއް ބަޔަކު މިއަދު ފާހަގަކުރާ މުހިންމު ކަންތައްތަކެއް ހުރިކަން ފާހަގަ ކޮށްލަން ޖެއެވެ. އެއީ އެތައް ސަތޭކަ ދިވެހި ރައްޔިތުންނެއް ދިވެހި ފުޓްބޯޅަ ޓީމަށް އެތައް ގޮތަކުން ސަޕޯޓު ކުރުމަށް ކުރި އެތައް އުއްމީދަކާއި ގުޅިފައިވާ ޝަކުވާތަކެވެ. އިސްލާހުކުރަން ބޭނުން ކަންތައްތަކެވެ. މިފަދަ ބޮޑު މުބާރާތަކަށް ފުރިހަމަ ކުރަންޖެހޭނެކަމަށް ގިނަބަޔަކު ގަބޫލުކުރާ، އެހެންނަމަވެސް، ދޯދިޔާކޮށް ހިގައިގެން ގޮސްފައިވާ އެތައް ކަމެއްގެ ވާހަކަތަކެވެ.
ޓިކެޓް ނެގުން ބޮޑު ތަކުލީފަކަށް!
ގަބޫލުކުރަންޖެހޭ ހަގީގަތަކީ، ދިވެހި ޓީމު، ދިވެހި ސަޕޯޓަރުންގެ ކުރިމަތީގައި، އަމުދުން ވާދެވެރި އަވައްޓެރި ގައުމުތަކާއި ވާދަކުރާއިރު، ކުޅިބަލަން ދަނޑަށް ވަންނަން ބޭނުންވާ އެތައް ބަޔަކު ތިބޭނޭކަމެވެ. އެހެންނަމަވެސް، މިއަދުގެ ހާލަތަކީ، ގަލޮޅު ދަނޑުގައި އެވަރުގެ ކެޕޭސިޓީއެއް ނެތްކަމެވެ. މި ޒަމާނުގެ، ބައިނަލްއަގުވާމީ ފެންވަރުގެ ކުޅިވަރު މުބާރާތެއް މެނޭޖުކުރުމުގެ ހަގީގީ ގާބިލްކަމެއް ގަދީމީ ގަލޮޅު ދަނޑުގައި ނެތްކަމެވެ.
ނަތީޖާއަކަށް ވެގެންދަނީ، ދަނޑަށް ވަންނަން ބޭނުންވާ އެތައްހާސް ދިވެހި ސަޕޯޓަރުންނަށް ދަނޑަށްވަދެ، ދިވެހި ގައުމީ ޓީމަށް ސަޕޯޓުކުރުމުގެ ފުރުސަތު ގެއްލިގެން ގޮސްފައިވާ ކަމެވެ. އެހެންނަމަވެސް، މިއީ މި މުބާރާތަށް އެކަނި ހައްލުކުރެވޭ ވަރަށްވުރެ ބޮޑު މައްސަލައެއް ކަމުގައިވެސް ގަބޫލުރަން ޖެހެއެވެ. އަދި މިމުބާރާތަށްފަހު ބައިނަލް އަގުވާމީ ފެންވަރުގެ ފުޓުބޯޅަ ދަނޑެއް ދިވެހިރާއްޖެއަށް ބޭނުންޖެހިފައިވާ މިންވަރުގެ ބޮޑުކަން ވަރަށްވެސް ރަގަޅަށް އިހުސާސް ކުރެވިގެންވެސް ހިގައްޖެއެވެ. އަދި ހަމައެއާއެކި، ކުޅިވަރާބެހޭ ވަޒީރު ވިދާޅުވެފައިވަނީ، މިފަދަ ދަނޑެއް ހެދުމަށް މިހާރު ބަޖެޓްވެސް ހަމަޖެހިފައިވާ ކަމަށެވެ. އެހެންކަމުން، އެސަރުކާރުގެ ވާހަކައާއި، މިސަރުކާރުވެ ވާހަކަ އެކި މޭރުމުން ދެއްކުން މިވަގުތަށް ފަސް ކޮށްލުން އެންމެ ރަގަޅުކަމުގައި ދެކެމެވެ.
އެހެންނަމަވެސް، އެފްއޭއެމްއިންނާއި ޔޫތު މިނިސްޓްރީން ކޮންމެ މެޗަކަށްވެސް ކުޅި ބަލާ މީހުންނަށް ވިއްކި ކަމަށް ބުނާ ފަސް ހާހެއް ޓިކެޓް ގަތުމަށް، ދިވެހި ރައްޔިތުން އުފުލަންޖެހުނު ތަކުލީފުތަކާއި، އަދި ނުވިތާކަށް ކުރަންޖެހުނު މުޒާހިރާތައް ފެނި، މިމުބާރާތަށް އެފްއޭއެމްއިން އެއްވެސް ވަރަކަށް ތައްޔާރުވިތޯ، ނުވަތަ ޕްލޭންތަކެއް ކުރިތޯ މިއީ މިއަދު ބައެއް ފަރާތްތަކުން ކުރަމުންދާ ސުވާލެކެވެ. ސަބަބަކީ، ޓިކެޓް ގަތުމަށް ބައެއް ފަރާތްތަކުން 18 ގަޑިއިރު ހޭދަ ކޮށްފައިވާ ކަމަށް، ޚުދު ޔޫތު މިނިސްޓަރުވެސް ވިދާޅުވެފައި ވާތީއެވެ.
އެހެންނަމަވެސް، ޓެކްނޮލޮޖިއާއި އަދި ވަސީލަތްކުގެ މިފަދަ ޒަމާނެއްގައި، މިއީ، ދިވެހި ސަޕޯޓަރުން ކުޅިވަރަށް ހުރި ފޯރިއެއްގެ ވަރުގަދަކަމާއި، އަދި އެމީހުންގެ ހިތްތަކުގައި ކުޅިވަރަށް ހުރި ވަރުގަދަ ޖޯޝާއި ފޯރި ހާމަ ކޮށްދީ، އެކަމަށް ފަޚުރުވެރި ވުމުގެ ގޮތުން ދެއްކިދާނެ ވާހަކައެއްތޯ މިއީ މިއަދު ކޮށްލުން އެންމެ ރަގަޅު ސުވާލެކެވެ.
އަދި އަމުދުން، ކޯވިޑް އާލަމީ ވަބާއަށްފަހު، ޚިދުމަތްތަކާއި، އަދި ކުރާ ވިޔަފާރިތައްވެސް، އޮންލައިންކޮށް، ސަރުރާކުންވެސް ދެމުންދާ އެތައް ޚިދުމަތެއް އޮންލައިކޮށް ދެމުންދާތާ އެތައް ދުވަހެއް ވެގެން ގޮސްފައިވާއިރު، ރަތްދަކަ އަވީގައި، އަވިން ހިޔާވާން ފޮށިގަޑުތައް ބޯމައްޗަށް ނަގައިގެން ކިއުގައި ދިވެހި ސަޕޯޓަރުން މެޗަށް ޓިކެޓް ގަންނަން ގޮސް ތިބިވާހަކަ، ލަދުވެތި ވުމެއް ނެތި، ފަޚުރުވެރިކަމާއެކު ދެއްކެވެން އެބައޮތްތޯ، މިއީ މި ވާހަކަތައް ދައްކަވާ ބޭބޭފުޅުން އަމިއްލަ ނަފްސާ ކޮށްލުން ހަމަ އެންމެ ރަގަޅު ސުވާލެއްކަމުގައި ދަންނަވަން ޖެހެއެވެ.
އޭގެ ބަދަލުގައި، އަދި އޮންލައިންކޮށް ޚިދުމަތް ނުދެވުނެއްކަމަކު، ޓިކެޓްގެ ބެލްކް މާރކެޓެއް އުފެދިގެން ދިޔަނުދީ، އެފްއޭމްއަށް ދުރާލާ މުބާރާތަށް އެކަށީގެންވާ ގޮތެއްގައި ތައްޔާރު ވެވުނުނަމަ، ޓިކެޓްތައް ދުރާލާ ވިއްކުމުގެ އިންތިޒާމްތައް ހަމަޖައްސާ، ސަރުކާރުގެ އިދާރާތަކުގެ ބޭނުންވެސް ފުރިހަމަ ގޮތުގައިކޮށް، އަދި އެނޫން އެތައް ގޮތަކުންވެސް، މިމުބާރާތުގައި ޓީމަށް ސަޕޯޓު ކޮށް ދިނުމަށް ފެންބޮވައިގެންފައި ތިބި އާންމު ދިވެހި ރައްޔިތުންނަށް ލުއިފަސޭކަމާއެކު ޚިދުމަތް ފޯރުކޮށް ދިނުމުގެ އިންތިޒާމްތައް ހަމަޖެއްސުނީސްކަމުގައި މިއަދު އެތައް ބަޔަކު ދަނީ ގަބޫލުކުރަމުންނެވެ.
ޓީމުގެ، އަސްލު ޖާޒީގެ ނަކަލެއް ހޯދުން ބޮޑު ގިލަންވެރި ކަމަކަށް! ބޮޑު ވިޔަފާރިއެއް!
މިފަދަ ކޮންމެ ފުޓްބޯޅަ މުބާރާތެއްގައިވެސް، ހުރިހާ ގައުމެއްގައިވެސް އޮންނަ އެންމެ ބޮޑު އެއް އާދައަކީ، ގައުމީ ދަނޑަށް ކުޅުންތެރިން ކުޅެންއަރާ އަސްލު ޖާޒީގެ ފުރިހަމަ ނަކަލްތައް، ސަޕޯޓަރުންނަށް ލިބޭނޭ އިންތިޒާމްތައް ދުރާލާ ހަމަޖައްސާ ދިނުމެވެ. ސަބަބަކީ، ޓީމްގެ ޖާޒީން މުޅި ދަނޑު ފުރާލާ، އަދި ޓީމުގެ ޖަޒީގައި ސަޕޯޓަރުން ތިބުމަކީ، އެންމެން އެއް ރޫޙެއްގައި ޓީމަށް ސަޕޯޓު ކުރުމަށް ލިބިގެންދާ ވަރަށް ބޮޑު ހިތްވަރަކަށް ވާތީވެސްމެއެވެ.
އެހެންނަމަވެސް، ރައްޖޭގައި މިފަދަ ބޮޑު މުބާރާތް ބޭއްވިގެން ދިޔައިރު، ގިނަބަޔަކު މިއަދު ބުންނަމުންދަނީ، ދިވެހި ގައުމީ ފުޓްބޯޅަ ޓީމުގެ އަސްލު ޖާޒީ ވެގެންދިޔައީ ލޮލު ބޭހަކަށްވުރެވެސް ތަދު އެއްޗަކަށް ކަމުގައެވެ. ސަބަބަކީ، ދިވެހި ޓީމުގެ އަސްލު ޖާޒީގެ ނަލަކަލެއް ހޯދުމަށް ބައެއް ފަރާތަކަށް މެދުނުކެޑި 4 ދުވަހުވެސް އެކި ގޮތްގޮތުން މަސައްކަތް ކުރަންޖެހި އެންމެ ފަހުން ރަނަށްވުުރެވެސް ބޮޑު އަގުގައި ޖާޒީ ގަންނަން ޖެހިފައި ވުމެވެ.
ތެދުފުޅެކެވެ. ދިވެހި ސަޕޯޓަރުން މުޅި ދަނޑު ފުރާލާފައިވަނީ ރަތް ކުލައިންނެވެ. ގިނަ ސަޕޯޓަރުންތިބީ ރައްކުލައިގެ ހެދުމުގައެވެ. އެހެންނަމަވެސް، އެއީ އެކި ޑިޒައިންތަކުގެ، އެހެންނަމަވެސް، ކޮންމެވެސް ގޮތަކުން ރަތްކުލައިގެ ޓީޝާޓެއް ނުވަތަ މުބާރާތާއި ގުޅޭގޮތުން ކޮންމެވެސް ބަޔަކު ޑިޒައިންކޮށަފައިވާ ޓީޝާޓެއް ކޮންމެވެސް ގޮތަކުން ހޯދާއިގެން ދިވެހި ސަޕޯޓަރުން ރަތްކުލައިން ދަނޑު ފުރާލަދިނީއެވެ. އެފްއޭއިމްއިން ކުރި އިންތިޒާމްތަކުގެ ތެރެއިން، ދިވެހި ސަޕޯޓަރުން ބޭނުންވި މިންވަރާ ގާތަށްވެސް ޓީމުގެ ޖާޒީތައް ސަޕޯޓަރުންނަށް ފޯރުކޮށް ދެވިފައެއް ނުވެއެވެ.
މައުލުމާތު ލިބިފައިވާ ގޮތުގައި މުބާރާތުގައި ދިވެހި ޓީމުން ބޭނުންކުރި ޖާޒީ ވިއްކުން އެފްއޭއެމްއިން ހަވާލުކޮށްފައިވަނީ އަމިއްލަ ފަރާތަކާއެވެ. އަދި އެނޫން ފަރާތްތަކުން ރަސްމީ ޖާޒީ ވިއްކުން އޮތީ މަނާވެސް ކުރެވިފައެވެ. އަދި ޓީމުގެ ޖާޒީ ވިއްކުން ވިޔަފާރީގެ އުސޫލުން ހަމަޖައްސާފަ އޮތް އިރު، އަދި އެވިޔަފާރީގެ ހަގީގަތް ކޮންމެ ގޮތަކަށް އޮތް ނަމަވެސް، އެ ޚިދުމަތްވެސް އެކަށީގެންވާ ގޮތެއްގައި ފޯރުކޮށް ދެވިގެން ނުދިއުމަކީ ވަރަށްވެސް ބޮޑު މަސައްލައެއްގެ ގޮތުގައި މިއަދު ގިނަބަޔަކު ގަބޫލުކުރާ އެއްކަމެކެވެ.
މޮޅުވެއްޖެއްޔާ ލިބޭނީ ކިހާވަރެއް! ބޯނަހުގެ ސަގާފަތް ބަދަލު ކުރަންޖެހޭ!
ބައެއް ބާވަތުގެ ސަގާފަތްތަަކަކީ އަބަދުވެސް އެއަށްވެސް ރަގަޅު ހެޔޮ ބަދަލުތައް އަންނަންޖެހޭ ކަމެކެވެ. ދުނިޔެވީ ކޮންމެ ކަމަކީވެސް، ކޮންމެ އުސޫލަކީވެސް، ކޮންމެ ސަގާފަތަކީވެސް ޒަމާނަށް އަންނަ ބަދަލުތަކާއި، ކުރިއެރުމާއި އެއް މިންގަޑަކުން ބަދަލުވާންޖެހޭ އަދި ބަދަލުވާ ކަންކަމަށް ވާތީވެސްމެއެވެ.
ރައީސް މައުމޫނުގެ ވެރިކަމުގެ ދުވަސްވަރުއްސުރެ ދިވެހިރާއްޖޭގެ ގައުމީ ޓީމު ކުޅޭ މުބާރާތްތަކާ ގުޅިފަ އޮތް އެއް ސަގާފަތަކީ، ގައުމީ ޓީމަށް އިނާމް ދިނުމުގެ ސަގާފަތެވެ. ހަދިޔާ ދިނުމުގެ ސަގާފަތެވެ. މެޗަކުން މޮޅުވުމުން ބޯނަސް ދިނުމުގެ ސަގާފަތެވެ. އެއީ ގައުމީ ޓީމަށް ހިތްވަރު ދިނުމުގެ ބޭނުމުގައެވެ. މުބާރާތް ކާމިޔާބުކުރުމުގެ ޝައުގުވެރިކަން ކުޅުންތެރިންގެ ހިތްތަކުގައި އަށަގެންނެވުމުގެ ބޭނުމުގައިވެސް މެއެވެ. އަދި މިއުސޫލުން ބަލާއިރު، ގައުމީޓީމު ގައުމަށް ރީތި ނަން ހޯދާ ދިނުމުން، އޭގެ އަގުވަޒަން ކުރުމުގެ ގޮތުން ޓީމުގެ ކުޅުންތެރިންނަށާއި ޓީމަށް އިނާމް ދިނުމުން ނުވަތަ އެނޫން ގޮތަކުންނަމަވެސް އަގު ވަޒަންކުރުމަކީ އޮވެގެން ނުވާނެ އުސޫލެކޭ ނުދެންނެވޭނެއެވެ.
އެެހެންނަމަވެސް، ޒަމާނުއްސުރެ، މިފަދަ ކޮންމެ މުބާރާތެއް ފެށުމުގެ ކުރިން ގައުމުގެ ވެރިންނާއި ވަޒީރުން ޓީމަށް ހަދިޔާ ދޭނެކަމަށާއި، ބޯނަސް ދޭނެކަމަށާއި، އަދި މިނޫން ގޮތްގޮތުން، ޓީމަށް ވައުދުތަކާއި އަހުދުތައް ވުމުން، މިކަންކަމާ ގުޅޭގޮތުން މިއަދު އުފެދިގެންދާ އެތައް ސުވާލެއް އެބަހުއްޓެވެ.
މިގޮތުން އުފެދޭ އެންމެ ބޮޑު އެއް ސުވާލަކީ، ޓީމުގެ ކުޅުންތެރިން ކަށިން ހިތްވަރު ނެރެގެން ކުޅެންވީ މި ހަދިޔާތައް ހޯދުމަށް އަމާޒު ކޮށްގެންތޯއެވެ. އަދި މެޗަކުން ބަލިވެގެން މި އަގުބޮޑު ހަދިޔާތައް ނުލިބިދާނެ ކަމުގެ ކަންބޮޑުވުން ހިތްތަކުގައި އުފެދި، މިއީ ކުޅުންތެރިން ތަހައްމަލް ކުރަންޖެހޭ އިތުރު ޕްރެޝަރއަކަށް ވެގެން ނުދާނެތޯވެސް މިއީ މިއަދު ބައެއް ފަރާތްތަކުން ކުރާ ސުވާލެކެވެ. އަދި ހަމަ ހަގީގަތުގައިވެސް، މެޗަކުން ބަލިވެ، މޮޅުވިނަމަ ލިބެން އޮތް ހަދިޔާއެއް ނުލިބި ދިއުމުން، އިންސާނީ ތަބީއަތުގެ ތެރެއިން ދެން އިހުސާސްވާ ކަންކަން ކުޅުންތެރިންގެ ހިތްތަކަށް އިހުސާސްވެގެން ދިއުމުން، ނަފްސާނީގޮތުން ކުރިމަތިވެދާނޭ ކަންކަމުގެ އަސްލު ހަގީގަތްތަކަކީވެސް، ހަދިޔާއާއި ބޯނަސް ދިނުމަށް ސިޔާސީ ފަރާތްތަކުން ކޮންމެ މުބާރާތަކާ ދިމާކޮށްވެސް ވާވައުދުގެ މިސަގާފަތާއި ގުޅޭގޮތުން އިތުރަށް މިއަދު ވިސްނާލަން ޖެހިފަ އޮތް ކަމެއްކަމީވެސް ކަށަވަރުވެ ޔަގީންވާ ކަމެކެވެ.
ސަބަބަކީ، ޒަމާން ބަދަލުވެ، އަންނަމުންދާ ހޭލުންތެރިކަމާއި، ގައުމާއި ކުޅުންތެރިންގެ ކެރިފޯރުންތެރިކަމާއި ގުޅޭ އަދި، މިނޫންވެސް، ބައެއް އާދަތައް އަލުން މުރާޖައާކޮށް، ދޫކޮށްލަންޖެހޭ އާދަތައް ދޫކޮށް، ސަގާފަތުގެ ތެރެއިން އިތުރަށް ފުރިހަމަ ކޮށްލަންޖެހޭ ކަންކަން ފުރިހަމަ ކޮށްލުމުން ހަގީގަތުގައިވެސް މުޅި މަންޒަރަށް ހެޔޮ ބަދަލެއް އަންނާނޭކަމުގައި ގަބޫލުކުރަން ޖެހޭތީއެވެ.
އެހެންކަމުން، ކުރިހާ ގޮތަކުން ބެލިކަމުގައިވިނަމަވެސް، މިފަހަރު ރާއްޖޭގައި ބޭއްވިގެންދިޔަ ސާފް ޗެމްޕިއަންޝިޕް ފުޓުބޯލަ މުބާރާތަކީ، އަމިއްލަ ފަސްގަޑުގައި ކުޅެ ތަށި ހޯދަން ދިވެހި ކުޅުންތެރިންނާއި ސަޕޯޓަރުން ކަށިން ހިތްވަރު ނެރުނު މުބާރާތަކަށް ވެގެންދިޔަ ނަމަވެސް، މިއަދު ގިނަބަޔަކު ގަބޫލުކުރާ، އަދި ގަބޫލުކުރަން ޖެހިފައޮތް އެއް ހަގީގަތަކީ، ޓީމަށް ހިތްވަރު ދިނުމަށް ކުރަންޖެހޭ މަސައްކަތްތައް އެފްއޭއެމްއިން ކުރިޔަށް ގެންގޮސްފައިވަނީ ވަރަށްވެސް ދޯދިޔާކޮށް ކަމެވެ. އަދި އެމަސައްކަތް އެކަށީގެންވާ ވާރާއި ގާތަށްވެސް އެފްއޭއެމްއަށް ފުރިހަމަކޮށް ހަމަޖައްސާ ދެވިފައި ނުވާކަމީ، މުބާރާތަށް ދިވެހިން އަލްވަދާއު ކިޔާފައިވާއިރު، ގިނަބަޔަކު މިއަދު ފާހަގަ ކުރާކަމެކެވެ.
އަދި މިހަގީގަތް އެފްއޭއެމްގެ ލީޑަރުޝިޕުން ގަބޫލުވެސް މިއަދު ކުރަންޖެހެއެވެ. އެއީ ކަންކަން އިސްލާހުކުރުމަށް އެޅޭނެ ބާރަކަށްވެސް ވެގެންދާނެ ތީއެވެ. އަދި އެއީ ފުޓުބޯޅަ ފަދަ، ދިވެހިންގެ މެދުގައި މަގުބޫލުކަން ބޮޑު ކުޅިވަރެއްގެ، ކުޅިވަރު ކޮމިއުނިޓީގެ ތެރޭގައި އޮންނަންޖެހޭނޭ ރިވެތި އާދައެއްވެސް މެއެވެ.
