ޖުޑީޝަލް ސާވިސް ކޮމިޝަން، ޖޭއެސްސީއަށް ބަދަލު ގެންނަންޖެހޭ ކަމަށް އެމްޑީޕީގެ މެނިފެސްޓޯގައި ލިޔެފައިވާނެ ކަމަށާއި، އެހެންނަމަވެސް، އެއީ ކޮން ބަދަލެއްކަމެއް މެނިފެސްޓޯގައި ނޯންނާނޭކަމުގައި، އެމްޑީޕީގެ ރައީސް، އަދި ރައްޔިތުންގެ މަޖިލިހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވީ، ބޭސް ފަރުވާއަށް ރާއްޖެއިން ބޭރުގައި ހުންނެވުމަށްފަހު، މިމަހުގެ 11 ވަނަ ދުވަހު އެބުރި ރާއްޖެ ވަޑައިގެން، މިއަދު ރައްޔިތުންގެ މަޖިލިހުގައި ބޭއްވި ނޫސްވެރިންގެ ބައްދަލުވުމުގައެވެ.
މި ބައްދަލުވުމުގައި ޖޭއެސްސީއަށް ބަދަލު ގެނައުމަކީ އެމްޑީޕީގެ ވައުދަކަށްވާއިރު، މި ވައުދު ފުއްދަވާނީ ކޮންއިރަކުންތޯ ނޫސްވެރިއަކު ނަޝީދާއި ކުރެއްވި ސުވާލުގެ ޖަވާބުގައި ނަޝީދު ވިދާޅުވީ، އެމްޑީޕީގެ މެނިފެސްޓޯގައި އޮންނާނީ ހަމައެކަނި ޖޭއެސްސީއަށް ބަދަލު ގެންނަންޖެހޭ ކަމުގެ ވާހަކަ އެކަނި ކަމުގައެވެ. އެހެންނަމަވެސް، މެނިފެސްޓޯގަ، ސީދާ އެއީ ކޮންބަދަލެއްކަމެއް ލިޔެފައި ނެތްކަމުގައި ވިދާޅުވަމުން ނަޝީދު ވިދާޅުވީ، އެއީ ސިޔާސީ ބޭފުޅުން ހިމަނާނީތޯ، ޖުޑިޝަރީގެ ބޭފުޅުން ހިމަނާނީތޯ، އަދި އެއީ ސިޓިން ޖަޖުން ތިބޭ ތަނެއްތޯ، މިކަކަން ސާފުވާން ނެތްކަމުގައިވެސް ނަޝީދު ވިދާޅުވިއެވެ.
ޖޭއެސްސީއަށް ބަދަލު ގެންނާން ޖެހޭކަމަށް އަޅުގަޑުމެންގެ މެނިފެސްޓޯގަވެސް ވާނީ ކަނޑައަޅާފަ، ލިޔެފަ. އެހެންނަމަވެސް މެނިފެސްޓޯއަކުވެސް އޭރަކުވެސް ނެތް ސީދާ އެއީ ކޮންބަދަލެއްތޯ
– ނަޝީދު ވިދާޅުވިއެވެ.
މި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ނަޝީދު ވިދާޅުވީ ޖޭއެސްސީއަށް އިސްލާހުތަކެއް ބޭނުންވާކަމުގެ ވާހަކަ ފާއިތުވެދިޔަ އިންތިޚާބަށް ދިޔައިރު އެމްޑީޕީ ދިޔައީ އެވާހަކަ ދައްކަމުން ކަމަށާއި، އެހެންނަމަވެސް މިހާރު ގިނަ ބަޔަކު އުފައްދާ ސުވާލަކީ ޖޭއެސްސީގައި "މުހައްމަދު ނަޝީދު" އިންނަވަން ޖެހޭތޯ ކަމަށާއި، އެހެންނަމަވެސް ރައްޔިތުންގެ މަޖިލިހުގެ ރައީސަކީ އެއްވެސް ހާލެއްގައި ސިޔާސީ ބޭފުޅޭއް ނޫންކަމަށެވެ. އަދި ރާއްޖޭގަ މިއޮތް ނިޒާމުގެ ތެރެއިން، ރައްޔިތުންގެ މަޖިލިހުގެ ރައީސަކީ ސިޔާސީ ބޭފުޅެއްގެ ގޮތުގައި ފާހަގަ ކޮށްގެން ނުވާނެކަމުގައެވެ.
އެހެންނަމަވެސް ސިޔާސީ ހަގީގަތް ހުރިހާ އެންމެންނަށްވެސް ފެނިވަޑައިގަންނަވާނެ ކަމަށާއި، މިއަދު ރައްޔިތުންގެ މަޖިލިހުގެ ރައީސްކަމުގަ އިންނެވީ އެމަނިކްފާނިކަމުގައި ނަޝީދު މި ނޫންވެރިންގެ ބައްދަލުވުމުގައި ވިދާޅުވިއެވެ. އެހެންކަމުން އެމަނިކްފާނަކީ ސިޔާސީ މީހެއް ނޫންކަމުގައި ދެންނެވެން ނޯނާނެކަމުގައި ނަޝީދު ވިދާޅުވިއެވެ.
ޖޭއެސްސީއަށް ގެންނާނީ ކޮން ބަދަލެއްކަމެއް އެމްޑީޕީގެ މެނިފެސްޓޯގައި ލިޔެފައި ނޯންނާނެ ކަމަށް ނަޝީދު ވިދާޅުވިނަމަވެސް، ސިޔާސީ ބޭފުޅުން ޖޭއެސްސީގައި ނުތިބުމަށް އެންމެ ބޮޑަށް ވަކާލާތު ކުރައްވާފައިވަނީ އެމްޑީޕީގެ ލީޑަޝިޕުންކަން ފާހަގަ ކޮށްލެވެއެވެ. އަދި ރައީސް ޔާމިންގެ ވެރިކަމުގައި ޖޭއެސްސީއަށް އޭރުގެ ސަރުކާރުން ނުފޫޒު ފޯރުވަމުންދިޔަ ކަމުގެ ތުހުމަތުގައި، ރައްޔިތުންގެ މަޖިލިހުގެ ރައީސް ޖޭއެސްސީގައި އިންނަވާ އިނުމަށް އެންމެ ބޮޑަށް ފާޑު ވިދާޅުވަމުން ގެންދެވި އެއް ބޭފުޅަކީވެސް ނަޝީދުކަން ފާހަގަ ކޮށްލެވެއެވެ.
