ވީއައިޕީ ބޭފުޅުންނަށް ރާއްޖޭގައި ދޭ ސެކިއުރިޓީގެ ކަންކަން ވިލަރެސް ކުރުމަށް އެމެރިކާގެ ސެކިއުރިޓީ ކޮންސަލްޓެންޓަކު ގެނެސްފިއެވެ.
ޑިފެންސް މިނިސްޓްރީން ބުނި ގޮތުގައި ރާއްޖޭގައި ވީއައިޕީއިންނަށް ދޭ ސެކިއުރިޓީ ހިދުމަތްތައް ވިލަރެސް ކުރުމުގައި ފަންނީ އެހީތެރިކަން ހޯދުމަށް ގެނެސްފައި ވަނީ ސެކިއުރިޓީ ކޮންސަލްޓަންޓް ޝީމަސް މިއުލާއެވެ. ޑިފެންސް މިނިސްޓަރު މާރިޔާ އަހުމަދު ދީދީ މިއަދު ވަނީ އޭނާއާ ބައްދަލުކުރައްވައިފައެވެ. ދައުލަތުގެ އިސްވެރިންނަށް ސެކިއުރިޓީ ދެނީ އެމްއެންޑީއެފްގެ ސްޕެޝަލް ޕްރޮޓެކްޝަން ގްރޫޕް (އެސްޕީޖީ) އިންނެވެ.
އަދި މިއުލާ މާލެ ވަޑައިގެން އުޅުއްވަނީ އެމްއެންޑީއެފް އިން ވީއައިޕީންނަށް ދޭ ސެކިއުރިޓީ ހިދުމަތްތައް ވިލަރެސް ކުރުމުގައި ފަންނީ އެހީތެރިކަން ފޯރުކޮށްދިނުމަށް ކަމަށެވެ.
ސިފައިން، ވީއައިޕީންއަށް ފޯރުކޮށްދޭ ސެކިއުރިޓީއާ ދޭތެރޭ ބަހުސެއް އުފެދި ސެކިއުރިޓީ ހަރުދަނާ ކުރުމުގެ މަސައްކަތް ފެށީ މެއި ހަވަނަ ދުވަހު ރައީސް ނަޝީދަށް އަމާޒުކޮށް ވަރުގަދަ ޓެރަރިސްޓް ހަމަލާއެއް ދިނުމުންނެވެ.
ސައިކަލެއްގެ މަޑިދަށުގައި އޮތް އައިއީޑީއެއް ގޮވާލައިގެން ނަޝީދުގެ ފުރާނަފުޅަށް ނުރައްކާވާ ވަރުގެ ހަމަލާއެއް ވަނީ ދީފައެވެ. އެ ހަމަލާގައި އެމަނިކުފާނަށް ބޮޑެތި ޒަހަމުތަކެއް ލިބިވަޑައިގަތެވެ. ރާއްޖެ އާއި ރާއްޖެއިން ބޭރުން ފަސް މަސް ދުވަހު ފަރުވާ ހޯއްދެވިއެވެ.
ކޮމެންޓު ފޮނުވާ