މިހާރު ރާއްޖޭގެ ރަސްމީ ފުޓްބޯޅަ ދަނޑުވަނީ ބާވެ ހަލާކުވެފައިކަމަށާއި، އައު ދަނޑެއް އެޅުމަށް މިހާރު ވަނީ ފައިސާ ހަމަޖެހިފައިކަމަށް މިނިސްޓަރ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙްމަދު މަޚްލޫފް ވިދާޅުވެއްޖެއެވެ.

މަޚްލޫފް މިހެން ވިދާޅުވީ، މިހާރު ކުރިއަށްދާ އުރީދޫ ސާފް ޗެމްޕިއަންޝިޕްގައި ގަލޮޅު ރަސްމީ ދަނޑުގައި ރާއްޖެ ކުޅޭ މެޗުތަކުގެ ޓިކެޓް ޑިމާންޑް ބޮޑުވެ، ގިނަބަޔަކަށް ދަނޑަށް ނުވަދެވި އެކަމުގެ ކަންބޮޑުވުން އުފެދިފައިވާ ދަނޑިވަޅެއްގައެވެ.

ގަލޮޅު ރަސްމީ ދަނޑަކީ 12،000 މީހުންގެ ޖާގައިގެ ދަނޑެކެވެ. ނަމަވެސް ފީފާއިން ޤަބޫލުކުރާ މިންގަނޑަށް ދަނޑު ބަދަލުކުރުމާއި، ގިނަދުވަސްވެ ދަނޑުގެ ބައެއް ސަރަހައްދުތައް ހަލާކުވުމުން، ސަޕޯޓަރުން ތިބުމަށް ރައްކާތެރި ނޫން ސަރަހައްދުތައް ވަނީ ބަންދުކޮށްފައެވެ. އެހެންކަމުން މިހާރު ދަނޑުގެ ޖާގައަކީ 5000 މީހުންގެ ޖާގައެވެ.

މާދަމާ ރާއްޖެއާއި އިންޑިއާ ބައްދަލުކުރާ މެޗުގެ ޓިކެޓް ގަތުމަށް އެތައް ގަޑިއިރެއްގެ ކުރިން ކިއުހަދާފައިވާއިރު، ޓިކެޓް ވިއްކޭނެ ފަސޭހަ އިންތިޒާމްތަކެއް ޔޫތު މިނިސްޓްރީއާއި އެފްއޭއެމް ގުޅިގެން ވަނީ އިންތިޒާމްކޮށްފައެވެ. މިނިސްޓަރ މަޚްލޫފް ވިދާޅުވީ، 3 ގަޑި 30 މިނެޓުން މިއަދު 3000 ޓިކެޓުވަނީ ވިއްކިފައިވާކަމަށެވެ. ދަނޑުވަނީ ބާވެ، ހަލާކުވެފއިކަމަށާއި، ކުރިން 12000 މީހުންނަށް ވަދެވޭއިރު މިހާރު ވަދެވެނީ 5000 މީހުންނަށްކަމަށްވެސް މިނިސްޓަރ ވިދާޅުވިއެވެ. އަދި އާދަނޑެއް އަޅަން ފައިސާ ވަނީ ހަމަޖެހިފައިކަމަށާއި، ސާފް އަށްފަހު އޮންލައިންކޮށް ޓިކެޓު ވިއްކުންކަހަލަ ބައެއް ބަދަލު ގެނެސްދޭން މަސަައްކަތްކުރައްވާނެކަމަށް މިނިސްޓަރ ވިދާޅުވިއެވެ.

އައު ދަނޑެއް އެޅުމަށް ފައިސާ ހަމަޖެހިފައިވާކަމަށް މިނިސްޓަރ ވިދާޅުވިނަމަވެސް އެކަމުގެ އިތުރު ތަފްސީލެއް ހާމަނުކުރައްވައެވެ.

ހުޅުމާލޭގައި ގަތަރު ސަރުކާރުން ތަރައްގީ ކުރަން ނިންމާފައިވާ އިންޓަނޭޝަނަލް ފުޓްބޯޅަ ސްޓޭޑިއަމްގެ ކޮންސެޕްޓް ޑިޒައިނިން ހަދާފައިވާ ކަމަށް ހައުސިން ޑިވްލޮޕްމަންޓް ކޯޕަރޭޝަން (އެޗްޑީސީ) ކުރިން ހާމަކޮށްފައިވެއެވެ. ރައީސް ޔާމީން ސަރުކާރުގައި އައު ސްޓޭޑިއަމްގެ ޓޭޑިއަމްގެ ކޮންސެޕްޓް ޑިޒައިނިން ހަދާފައިވާކަމަށް އެޗްޑީސީން ބުނެފައިވެއެވެ.

އުރީދޫ ސާފް ޗެންޕިއަންޝިޕްގައި ރާއްޖެ ކުޅޭ މެޗްތަކުގެ ޓިކެޓް ގަތުމަށް ކޮންމެ ދުވަހަކުވެސް ވަރަށް ގިނަ ސަޕޯޓަރުން ކިއު ހަދައެވެ. އަދި ޓިކެޓް ނުލިބުމާއެކު ގިނަ އަދަދެއްގެ ބަޔަކުވަނީ ވަރަށް ބޮޑަށް ހިންހަމަ ނުޖެހުން ފާޅުކޮށްފައެވެ. ދިވެހި ރާއްޖެ އާއި ސްރީލަންކާ ވާދަކުރި މެޗްގެ ޓިކެޓްތަށް ވިއްކުމަށް ފެށުމާއެކު، 3 ގަނޑިއިރެއްހާއިރުގެ ތެރޭގައިވަނީ ވަނީ ޓިކެޓް ވިކި ހުސްވެފައެވެ. މިއާއެކު ގިނަ ބަޔަކުވަނީ ހިތްހަމަ ނުޖެހުން ފާޅުކޮށް، ބޮޑު ހަމަނުޖެހުމެއްވެސް ހިންގާފައެވެ. އަދި އެއާއެކު އެފްއޭއެމްއިންވަނީ ފަހުން 1000 ޓިކެޓް ވިއްކާފައެވެ.