ހުޅުމާލޭގައި ސަރުކާރުން ހިންގުމަށް ނިންމާފައިވާ ޕްރީ ސްކޫލް "މުޙައްމަދު ޤާސިމް ޕްރީ ސްކޫލް"އަށް ދަރިވަރުން ވެއްދުމުގެ މުއްދަތު އެޑިއުކޭޝަން މިނިސްޓްރީއިން އިތުރުކޮށްފިއެވެ. އެ ސްކޫލް ހުޅުވުމަށް ނިންމާފައިވަނީމިމަހުގެ 24ގައެވެ.
750 ކުދިންގެ ޖާގައިގެ އެ ޕްރީ ސްކޫލް ހިންގުމަށް އެޗްޑީސީން އެޑިއުކޭޝަން މިނިސްޓްރީއާ ހަވާލުކުރީ 2019 ވަނަ އަހަރުގެ ޖެނުއަރީ މަހުގައެވެ. އެތަން ހިންގާނެ ބަޔަކު ހޯދަން އެޑިއުކޭޝަން މިނިސްޓްރީން ހަތަރު ފަހަރެއްގެ މަތިން އިއުލާންކުރުމަށްފަހު، ފަހުން ނިންމާފައިވަނީ ސީދާ މިނިސްޓްރީގެ ދަށުން އެސްލޫލް ހިންގުމަށެވެ. ޕްރީ ސްކޫލްގެ ކިޔެވުން މިމަހުގެ 24ވަނަ ދުވަހު ފެށުމަށް ނިންމާ، ސްކޫލަށް ދަރިވަރުން ރަޖިސްޓްރީކުރުމުގެ ފުރުސަތު ފުރަތަމަ ހުޅުވާލީ މިމަހުގެ 14ވަނަ ދުވަހުގެ ނިޔަލަށެވެ. ނަމަވެސް މިހާރުވަނީ ވަކި މުއްދަތެއް ނެތްގޮތަށް މި ފުރުޞަތު ހުޅުވާލާފައެވެ.
ޕްރީސްކޫލްގެ ކިޔެވުން ފެށުމަށް ވާންޖެހޭ ތައްޔާރީތައް މިނިސްޓްރީން މިހާރުވަނީ ފަށާފައެވެ. އެގޮތުން އިމާރާތުގެ މަރާމާތުތައް 45 ދުވަހުގެތެރޭގައި ނިންމުމަށް ކުންފުންޏަކާ ހަވާލުކުރީ އޮގަސްޓްމަހުގެ ތެރޭގައެވެ. އެ ޕްރީ ސްކޫލްގައި 10 ކްލާސްރޫމް ހިމެނެއެވެ. އަދި އެ ސްކޫލްގައި 20 ޓީޗަރުން ކިޔަވައިދޭނެއެވެ.
ސްކޫލްގައި ކުރިއަށްގެންދާނީ އެލް.ކޭ.ޖީ އާއި ޔޫ.ކޭ.ޖީގެ ކްލާސްތަކެވެ. މިނިސްޓްރީން ވިދާޅުވީ މި ޕްރީ ސްކޫލަށް ވައްދާ ދަރިވަރުންގެ ޔުނިފޯމްގެ ގޮތުގައި، މިހާރު ދަރިވަރު ކިޔަވަމުންދާ ސްކޫލްގެ ޔުނިފޯމް މިއަހަރުގެ ޑިސެމްބަރުމަހުގެ ނިޔަލަށް ބޭނުންކުރެވޭނެ އިންތިޒާމް ހަމަޖައްސާފައިވާކަމަށެވެ. އަދި ބެލެނިވެރިން ބޭނުންނަމަ، ސްކޫލް ފެށޭއިރު "މުޙައްމަދު ޤާސިމް ޕްރީ ސްކޫލް"ގެ ޔުނީފޯމްވެސް ބޭނުންކުރެވޭނެކަމަށް އެޑިއުކޭޝަނުން ބުނެއެވެ.މިނިސްޓްރީން ބުނީ ސްކޫލްގެ ދަންފަޅިތައް ހަމަޖައްސާނީ ގްރޭޑްތަކަށް ދަރިވަރުން ރަޖިސްޓްރީވާ ނިސްބަތުންކަމަށެވެ.
