އދ.ގެ ޢާންމު މަޖިލީހުގެ ރައީސް ޢަބްދުﷲ ޝާހިދާއި ރައްޔިތުންގެ މަޖިލީހުން ރައީސް މުޙައްމަދު ނަޝީދަކީ ދައުލަތުގެ ޒިންމާ އަދާކުރައްވާ ބޭފުޅުން ނޫންތޯ ވިދާޅުވެ ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަޙްމަދު ޠާރިޤް ސުވާލު އުފައްދައިފިއެވެ.
ޠާރިޤް މި ސުވާލު ކުރައްވާފައިމިވަނީ، އދ.ގެ ޢާންމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރ ރާއްޖެއަށް ކުރެއްވި ދަތުރުފުޅު ނިންމަވާލެއްވުމަށްފަހު ފުރާވަޑައިގަތުމުންނާއި، ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ތިން ދުވަހަށް ރާއްޖެ ވަޑައިގަތުމުންނެވެ.
ޠާރިޤް ވިދާޅުވީ، އދ.ޢާންމު މަޖިލީހުގެ ރައީސް، ރަސްމީ ދަތުރުފުޅެއް ނިންމަވާލައްވާފައި ފުރާވަޑައިގެންފައިވާކަމަށާއި، ރައްޔިތުންގެ މަޖިލީހުގެ ރައީސް 3 ދުވަހުގެ ޗުއްޓީއަކަށް ރާއްޖެ ވަޑައިގެންފައިވާކަމަށެވެ. މިއީ ދިވެހި ދައުލަތު ޒިންމާތަކެއް އަދާކުރާ ފަރާތް ތަކެއް ނޫންބާއޭ ހިތަށް އަރާކަމަށްވެސް ޠާރިޤް ވިދާޅުވިއެވެ.
އދ.ޢާންމު މަޖިލީހުގެ ރައީސް، ރަސްމީ ދަތުރުފުޅެއް ނިންމަވާލައްވާފައި ފުރާވަޑައިގެންފި. ރައްޔިތުންގެ މަޖިލީހުގެ ރައީސް 3 ދުވަހުގެ ޗުއްޓީއަކަށް ރާއްޖެ ވަޑައިގެންފި. އަޅުގަނޑު ހިތަށް އަރައެވެ. މިއީ ދިވެހި ދައުލަތު ޒިންމާތަކެއް އަދާކުރާ ފަރާތް ތަކެއް ނޫންބާއެވެ.
— Ahmed Thariq (@AhmedThaariq) October 11, 2021
ރާއްޖޭގެ ފޮރިން މިނިސްޓަރ ރާއްޖެ ވަޑައިގަތީ 4 ދުވަހުގެ މުއްދަތަށް އދ.ގެ ޢާންމު މަޖިލީހުގެ ރައީސްގެ ހައިސިއްޔަތުންނެވެ. މަޢުލޫމާތު ލިބިފައިވާގޮތުން ފޮރިން މިނިސްޓަރ ޢަބްދުﷲ ޝަހިދު 1 އަހަރު ދުވަހުގެ މުއްދަތަށް ދިރިއުޅުންވަނީ ނިއުޔޯކަށް ބަދަލުކުރައްވާފައެވެ.
މީގެ އިތުރުން މަޖިލީހުގެ ރައީސް މުޙައްމަދު ނަޝީދު އަވަހާރަކޮށްލުމަށް މެއި 6ގައި ދިން ޓެރަރިސްޓް ހަމަލާއާއި ގުޅިގެން 5 ފަސް ދުވަހު ރާއްޖެއިން ބޭރުގައި ހުންނެވުމަށްފަހު ރާއްޖެ ވަޑައިގަތީ މިއަދުއެވެ. މަޢުލޫމާތު ލިބިފައިވާގޮތުގައި ރައީސް ނަޝީދު ރާއްޖެ ވަޑައިގަތީ ތިން ދުވަހަށެވެ.
