ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު މާލެ ވަދައިގަންނަވާއިރު އެމަނިކުފާނަށް މަރުހަބާ ދެންނެވުމަށް ރައީސް ޞާލިހު އެއާޕޯޓަށް ވަޑައިގަތުމަށް ހަމަޖެހިއްޖެއެވެ.
ރައީސް ނަޝީދު މިއަދު ރާއްޖެ ވަޑައިގަތުމަށް ހަމަޖެހިފައިވަނީ 2:30 ކަން ހާއިރުއެވެ. ރައީސް ނަޝީދު މިއަދު މެންދުރުފަހު ރާއްޖެ ވަޑައިގަންނަވާއިރު، އެމަނިކުފާނު ވަނީ ބޭސްފަރުވާއަށް ރާއްޖެއިން ބޭރުގައި 4 ވަރަކަށް މަސް ދުވަސް ހޭދަކުރެއްވުމަށްފަހުއެވެ.
ރައީސް ނަޝީދު މިއަދު ރާއްޖެ ވަޑައިގަންނަވަން ހަމަޖެހިފައިވާއިރު، އެމަނިކުފާނު މިހާރު ހުންނެވީ ދުބާއީގައި މިހާރު ކުރިއަށްދާ އެކްސްޕޯއަށް ވަޑައިގެންނެވެ. އޭގެކުރިން އެމަނިކުފާނު ވަނީ އިނގިރޭސިވިލާތުންނާއި ޖަރުމަންވިލާތުން ފަރުވާ ހޯއްދަވާފައެވެ. މޭމަހުގެ 6 ވަނަ ދުވަހު ރައީސް ނަޝީދަށް ދިން ހަމަލާއާ ގުޅިގެން އެމަނިކުފާނަށް ވަނީ ބޮޑެތި ޒަހަމްތަކެއް ލިބިވަޑައިގެންފައެވެ.
ރައީސް ނަޝީދަށް ދިން ހަމަލާއަށްފަހު މަޖިލީހުން ވަނީ ހަމަލާގެ ކަންކަން ހިނގައިދިޔަ ގޮތުގެ އިންކުއެރީއެއް ހަދާފައެވެ. މި އިންކުއަރީގައި ފާހަގަކޮށްފައިވާ ގިނަ ކަންތައްތަކެއް ސަރުކާރުން ދަނީ ތަންފީޒު ކުރަމުންނެވެ. އެގޮތުން ދައުލަތުގެ ވެރިންގެ ސަލާމަތާއި ރައްކާތެރިކަން ކަށަވަރުކުރުމަށް މަޖިލިސް ރައީސްއަށް ޚާއްސަ ގެކޮޅުވެސް ވަނީ ހަމަޖައްސާފައެވެ.
