އިމްތިހާނަކާއި ނުލައި ބިދޭސީންނަށް ލައިސަންސް ދިނުމަކީ ނުރައްކާ އިތުރުވާނެކަމެއްކަމަށް މޯލްޑިވްސް ޓްރޭޑް ޔޫނިއަންގެ ނާއިބު ރައީސް ސަައުދުﷲ އަހުމަދު ވިދާޅުވެއްޖެއެވެ. ސަޢުދު މިހެން ވިދާޅުވީ، ރާއްޖޭގެ ޓްރާންސްޕޯޓް މިނިސްޓްރީން ޤަބޫލުކުރާ ބޭރުގެ އެއްގަމު އުޅަނދު ދުއްވުމުގެ ލައިސަންސްތަކުގެ ތެރޭގައި ބަންގްލަދޭޝްގެ ލައިސަންސް ހިމުނާއި ގުޅިގެންނެވެ. މިކަމާއި ގުޅިގެން އެތައް ބަޔަކު އަންނަނީ ކަންބޮޑުވުން ފާޅުކުރަމުންނެވެ.
މިގޮތުން ސަޢުދު ކުރެއްވި ޓްވީޓެއްގައި ވިދާޅުވީ، ރާއްޖޭގެ ފަސްގަނޑުގައި ދިވެހީން ލައިސެންސް ނަގަން ޓެސްޓް ހަދަން ޖެހޭއިރު، ބިދޭސީން އެމީހުންގެ އަމިއްލަ ނަން ކަށަވަރު ނުކުރެވޭ ހާލަތުގައި ޓެސްޓް ނެތި އަދި ޤަވާއިދު ނޭނގި ލައިސަންސް ދިނުމަކީ މި މުޖުތަމަޢުގައި އުޅޭ އެތައް ބަޔަކަށް އޭގެ ނުރައްކާ ކުރިމަތިވެދާނެ ކަމެއްކަމަށެވެ.
ސަޢުދު ވިދާޅުވީ، ރާއްޖެއަކީ ނިސްބަތުން ޤަވައިިދާއި ޚިލާފަށް އެތައް ބިދޭސީން އުޅޭ ޤައުމެއްކަން ފާހަގަކުރައްވާ ސަޢުދު ވިދާޅުވީ، ވަރަށް ބޯޑު ޓްރެފިކެއް އޮންނަ ޤައުމަކަށް ރާއްޖެވާއިރު، މިގޮތަށް ލައިސަންސް ދޫކުރުމަކީ އިންތިހާއަށް ކަންބޮޑުވާކަމެއްކަމަށެވެ. ސަޢުދު ވިދާޅުވީ، މިކަން އެގޮތަށް ވެގެން ނުވާނެކަމަށެވެ.
ރާއްޖޭގެ ޓްރާންސްޕޯޓް މިނިސްޓްރީން ޤަބޫލުކުރާ ލައިސަންސްތައް ރާއްޖޭގައި ވަކި މުއްދަތަކަށް ބޭނުންކުރުމުގެ ހުއްދަ ދޭން ފެށީ އެއްގަމު ދަތުރުފަތުރުގެ ޤާނޫނަށް ގެނައި އިސްލާހާއެކުއެވެ.
ޓްރާންސްޕޯޓް މިނިސްޓްރިއިން ވިދާޅުވީ މިނިސްޓްރީއިން ޤަބޫލުކުރާ ޤައުމުތަކުން ދޫކޮށްފައިވާ ސައްޙަ ލައިސަންސްއެއް އޮތް މީހުންނަށް، އިތުރު ލައިސެންސެއް ހޯދުމަކާއިނުލާ ރާއްޖޭގައި އެއްގަމު އުޅަނދު ދުއްވޭނެކަމަށެވެ. މި ހުއްދަ ދެނީ 90 ދުވަހުގެ މުއްދަތަށްކަމަށް ޤަވާއިދުގައިވެއެވެ.
މިނިސްޓްރީން ހުއްދަ ދޫކުރި ޤައުމުތަކުގެ ލިސްޓް ފުރަތަމަ އާއްމުކޮށްފައި ވަނީ މިއަހަރުގެ އޮގަސްޓްމަހުގެ 3 ވަނަ ދުވަހުއެވެ. ފުރަތަމަ އާއްމުކުރި ލިސްޓުގައި އެއްގަމު އުޅަނދު ދުއްވުމުގެ ހުއްދަ ދީފައިވަނީ 25 ޤައުމަކަށެވެ. މީގެތެރޭގަ ޔޫރަޕާއި އޭޝިއާގެ ޤައުމުތައްވެސް ހިމެނެއެވެ.
ރާއްޖޭގައި މަސައްކަތް ކުރާ ބިދޭސީންގެ އެންމެ ބޮޑު އާބާދިއެއް ހިއްސާކުރަނީވެސް ބަންގްލަދޭޝްގެ ރައްޔިތުންނެވެ. މޯލްޑިވްސް ބިއުރޯ އޮފް ސްޓެޓިސްޓިކްސްގެ ތަފާސް ހިސާބުތަކުން ދައްކާގޮތުގައި ރާއްޖޭގަ 177،000އަށްވުރެ ގިނަ ބިދޭސީ މަސައްކަތްތެރިން ވަޒީފާ އަދާކުރެއެވެ. މީގެތެރެއިން %63 ޙިއްސާކުރަނީ ބަންގްލަދޭޝްންގެ ރައްޔިތުންނެވެ. އެއީ 112،000އަށްވުރެ ގިނަ މީހުންނެވެ.
މި ލިސްޓުގައި ބަންގްލަދޭޝް މިހާރު ހިމަނާފައިވާއިރު، މިލިސްޓުގައި ހިމެނޭ އަވަށްޓެރި ޤައުމުތަކުގެ ތެރޭގަ އިންޑިއާ، ސްރީލަންކާ، ބަންގްލަދޭޝް، ނޭޕާލް އަދި ބޫޓާން ހިމެނެއެވެ. މީގެއިތުރުން އެމެރިކާ އިނގިރޭސިވިލާތް ޖަރުމަނު އަދި ސަޢުދީ ޢަރަބިޔާފަދަ ޤައުމުތަކުގެ ލައިސަންސްގައިވެސް ރާއްޖޭގަ އެއްގަމު އުޅަނދު ދުއްވުމުގެ ހުއްދަވަނީ ދީފައެވެ.
ދިވެހިރާއްޖޭގައި އެއްގަމުގެ ލައިސަންސްގެ ޚިދުމަތް ދިނުމުގެކަންކަން ރޭވިފައިވާގޮތުން ރައްޔިތުންގެ ޝަކުވާތައް ވަނީ ވަރަށް ބޮޑަށް އިތުރުވެފައެވެ. ޚާއްޞަކޮށް ވޭތުވެދިޔަ ހަތަރު އަހަރުގެ ތެރޭގައި މި ޚިދުމަތް ލިބުން ލަސްވެފައިވާތީވެ، ރައްޔިތުންގެ ނުރުހުމާއި ހިތްހަމަނުޖެހުން ވަނީ ވަރަށް ބޮޑުވެފައެވެ. އެހެންކަމުން މިކަން ރަނގަޅުކޮށް ރައްޔިތުން އެދޭފަދަ ޚިދުމަތެއް ސަރުކާރުން ފޯރުކޮށް ދޭން މަސައްކަތް ކުރަންޖެހެއެވެ.
