އދ. އިސްލާހު ކުރުމަކީ އެއް އަހަރުދުވަހުގެ މުއްދަތަށް ހޮވޭ ރައީސެއްގެ ބާރުގެ ތެރޭގައި ހިމެނޭ ކަމެއް ނޫންކަމުގައި ކުރީގެ އުއްތަަމަ ފަނޑިޔާރު ޑރ.އަހުމަދު އަބްދުﷲ ދީދީ ވިދާޅުވެއްޖެއެވެ.
ޑރ.އަހުމަދު އަބްދުﷲ ދީދީ ވިދާޅުވީ އދ. އިސްލާހު ކުރުމުގެ މަސައްކަތް، އދ. ގެ 76 ވަނަ އާންމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރު އަބްދުﷲ ޝާހިދު ކޮށް ދެއްވުމަށް ރައީސް ސޯލިހު އެދިވަޑައިގެންނެވުމާއި ގުޅިގެންނެވެ.
ކުރީގެ އުއްތަމަ ފަނޑިޔާރު އަހުމަދު އަބްދުﷲ ދީދީ ވިދާޅުވީ ދިވެހި ދައުލަތުން UN އިޞްލާޙު ކުރަން އެދުމަކީ އޭގެޒާތުގައި މައްސަލައެއް ނޫންކަމަށެވެ. ނަމަވެސް އެނގެންޖެހޭ ޙަޤީޤަތަކީ އެއް އަހަރުދުވަހުގެ މުއްދަތަށް ހޮވޭ ރައީސެއްގެ ބާރުގެ ތެރޭގައި ހިމެނޭ ކަމެއް ނޫންކަމަށެވެ.
އެކަން Rules of the Procedure of the General Assembly ގެ ރޫލް 35 އިން އެގޭ. UN އިޞްލާޙު ކުރުމުގެ ޙަޤީޤީ ބާރު ލިބިގެންވަނީ މެންބަރު ޤައުމު ތަކަށް އެކަނި އަދި އެކަން ކުރެވޭނީ ސެކިއުރިޓީ ކައުންސިލްގައި ހިމެނޭ ދާއިމީ 5 މެންބަރުން ބޭނުންވާނަމަ. އެހެންނަމަވެސް UNGA ގެ ރައީސް ހޮވުމަށް މެންބަރު ދައުލަތްތަކުން ނަންތައް ހުށަހަޅާއިރު ހުށަހަޅާ ޤައުމުތަކުގެ ދާޚިލީ ޤާނޫނުތަކާ ޚިލާފު ނުވާނޭ ހަމައެއްގެ މަތިން ނަންތައް ހުށަހެޅުން ލާޒިމްކޮށް އިޝާރާތްކުރެވުން “ރޫލްސް އޮފްދަ ޕްރޮސީޖަރ” އިޞްލާހު ކުރުމަކީ މުހިއްމު ކަމެއް ކަމުގައި ދެކެން.
– ކުރީގެ އުއްތަމަ ފަނޑިޔާރު ވިދާޅުވިއެވެ.
ރައީސް މިކަމަށް އެދި ވަޑައިގެންނެވީ އދ ގެ އާންމު މަޖިލީހުގެ ރައީސްގެ ހައިސިއްޔަތުން މިނިސްޓަރު ޝާހިދު ރާއްޖެ ވަޑައިގަތުމުން މިއަދު ބޭއްވި ދެ ބޭފުޅުންގެ ޖޮއިންޓް ޕްރެސް ސްޓޭޓެމެންޓްގައި ވާހަކަފުޅު ދައްކަވަމުން ނެވެ. ރައީސް ވިދާޅުވީ ރާއްޖެއާއި އދ. އާއި ދެމެދުގެ ގުޅުން ބަދަހިކޮށް، ގުޅުން އިތުރު ހަރުފަތަކަށް ގެންދިއުމާއި ގުޅޭ ގޮތުން ޝާހިދާއެކު މިއަދު މަޝްވަރާ ކުރެއްވި ކަމަށެވެ.
ރައީސް ވިދާޅުވީ ޒަމާނަށް އަންނަމުންދާ ބަދަލުތަކާއި އެއްގޮތަށް އދ. ގެ އެކިއެކު މުއައްސަސާތަކުގެ މަސައްކަތްތައް އިސްލާހު ކުރުމަކީ މުހިންމު ކަމެއް ކަމުގައި ދެކެ ވަޑައިގަންނަވާ ކަމަށާއި އދ. އިސްލާހު ކުރުމުގެ މަސައްކަތް ޝާހިދުގެ ދައުރުގައި ކުރެއްވުމަށް ވެސް އެދި ވަޑައިގެންފައި ވާނެ ކަމަށެވެ.
