މަނީ ލޯންޑަރިންގެ ކުށް ސާބިތުވެފައިވާ ކުރީގެ ރައީސް ޢަބްދުﷲ ޔާމީނަށް ކަފާލާތު ނުލިބުނުނަމަވެސް، މި މައްސަލައިގެ ޙުކުމާއެކު އެމަނިކުފާނު މިނިވަންވާނެކަމަށް، ރައީސް ޔާމީންގެ ޤާނޫނީ ވަކީލް ޑރ.މުޙައްމަދު ޖަމީލް އަޙްމަދު ވިދާޅުވެއްޖެއެވެ.

ރައީސް ޔާމީން 5 އަހަރަށް ޖަލަށްލާ 5 މިލިއަން ޑޮލަރުން ޖޫރިމަނާކުރީ ރިސޯޓެއްގެ ގޮތުގައި ތަރައްޤީކުރަން ދޫކުރި ގއ. ވޮޑަމުލާ ދޫކުރުމުގެ މުއާމަލާތުގެ ތެރެއިން 1 މިލިއަން ޑޮލަރު ހޯއްދަވާ އަމިއްލަފުޅު އެކައުންޓަށް ޖަމާކޮށް އެ ފައިސާގެ އަސްލު އޮޅުވާލި ކުށް ސާބިތުވުމުންނެވެ. ރައީސް ޔާމީންގެ ފަރާތްޕުޅުން ވަނީ ކަފާލާތުގެ ދަށުން މިނިވަންކޮށްދެއްވުމަށް ސުޕްރީމް ކޯޓަށް ހުށައަޅާފައެވެ. އެ ހުށައެޅުމާއި ގުޅިގެން މިއަދު ސުޕްރީމް ކޯޓުން ވަނީ ރައީސް ޔާމީން ކަފާލާތުގެ ދަށުން ދޫކުރެވެން ނެތް ކަމަށް ޢަމުރުކޮށްފައެވެ. ނަމަވެސް ސުޕްރީމްކޯޓުން ވަނީ މަތީ ކޯޓުން މައްސަލަ ވަކި ގޮތަކަށް ނިމެންދެން އެ ފައިސާ ދެއްކުން ފަސްކޮށްދިނުމަށް އަމުރެއް ނެރެފައެވެ. އެ އަމުރުގައިވަނީ ޖޫރިމަނާ ފައިސާއާއި ގުޅިގެން ދައުލަތުގެ އެއްވެސް އިދާރާއަކުން ފިޔަވަޅު ނޭޅުމަށް އަންގާފައެވެ.

މިއަދު ސުޕްރީމް ކޯޓުގައި އޮތް އަޑުއެހުމަށްފަހު ނޫސްވެރިންނާއި ބައްދަލުކުރައްވާ ވާހަކަފުޅު ދައްކަވަމުން ޑރ.ޖަމީލް ވިދާޅުވީ، ރައީސް ޔާމީން ކަފާލާތުގެ ދަށުން ދޫކޮށްލުމަށް އެދުނީ ރާއްޖޭގެ ޤާނޫނީ ނިޒާމުން އެ ފުރުޞަތު ކަށަވަރުކުރުމަށްކަމަށެވެ. އެހެންކަމުން އެ މިންމުމާމެދު އެއްޗެއް ދަންނަވަން ބޭނުންފުޅު ނުވާކަމަށާއި، ނަމަވެސް އެމައްސަލަ ނިމިގެންދާއިރު، ކަފާލަތު ނުލިބުނަސް ރައީސް ޔާމީން މިނިވަންވާނެކަމުގެ އުއްމީދު އެބައޮތްކަމަށް ޑރ.ޖަމީލް ވިދާޅުވިއެވެ.

ޑރ.ޖަމީލް ވަނީ، އިސްތިއުނާފްގެ މަރުހަލާގައި ކަފާލާތު އޮންނަންޖެހޭނެކަމަށް ޤަބޫލުކުރައްވާކަމަށް ވިދާޅުވެފައެވެ.

ރައީސް ޔާމީންގެ ފަރާތުން ސުޕްރީމް ކޯޓަށް ހުށައެޅި އިސްތިއުނާފް މައްސަލައިގެ އަޑުއެހުންތައް މިހާރު ވަނީ ނިންމާލާފައެވެ.އަދި ސުޕްރީމްކޯޓްގެ މަރުހަލާގައި ޔާމީންގެ ފަރާތްޕުޅުން އައު ހެކިންގެ ގޮތުގައި ހުށައެޅި ދެ ހެކިން ބަލައިނުގަތުމަށް ވެސް ކޯޓުން ވަނީ ނިންމާފައެވެ. ސަބަބަކީ އެ ދެ ހެކިންނަކީ ދަށުކޯޓްގެ މަރުހަލާގައިވެސް ހުށައެޅުމުގެ ފުރުސަތު އޮތް ދެ ހެކިންނަށް ވާތީއެވެ. އައު ހެކިންގެ ގޮތުގައި ރައީސް ޔާމީން ހުށައެޅުއްވީ ރައްޔިތުން މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއީލާއި އައްޑޫ ހުޅުދޫ ދާއިރާގެ ކުރީގެ މެމްބަރު މުހައްމަދު ޝާހިދުއެވެ. މި ދެ ހެކިން ހުށައެޅުއްވީ ކުރީގެ ނާއިބު ރައީސް އަހްމަދު އަދީބު އަތުގައި ރައީސް ޔާމީންގެ ފައިސާ ހުންނާނެ ކަން ސާބިތުކޮށްދިނުމަށެވެ.

ސުޕްރީމްކޯޓް ރިސެސްއަށް ދިޔުމުގެ ކުރިން މ،ައްސަލަ ނިންމާ ހުކުމްކުރާނެކަންވެސް މައްސަލަ ބައްލަވާ ފަނޑިޔާރުންގެ ބެންޗުން ވަނީ އިއުލާންކޮށްފައެވެ.