ރައްޔިތުންގެ މަޖިލީހުގައި އިންސާފު ޤާއިމްކޮށް، ސަރުކާރުން ކުރަންޖެހޭ ކަންކަން ކުރުމަށް ގޮވާލުމުން ދާއިރާގެ ތަރައްޤީގެ މަޝްރޫޢުތަކަށް ހުރަސް އަޅަމުންދާކަމުގެ ތުހުމަތު ރައްޔިތުންގެ މަޖިލީހުގެ އުނގޫފާރު ދާއިރާގެ އެމްޑީޕީގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
ދިވެހިރާއްޖޭގެ އުއްތަމަ ފަނޑިޔާރު އަލްއުސްތާޛު އަޙްމަދު މުޢުތަޞިމް ޢަދުނާންގެ ގެކޮޅުގެ ސެކިއުރިޓީ ބްރީޗްވި ގޮތް ދެނެގަތުމަށް ރައްޔިތުންގެ މަޖިލީހަށް ހުށަހެޅި މައްސަލާގެ ބަހުސްގައި ވާހަކަ ދައްކަވަމުން ވަހީދު ވިދާޅުވީ ދައުލަތުގެ ތިންބާރުގެ ތެރެއިން ދެ ބާރުގެ ވެރިންގެ ސެކިއުރިޓީ ފޫއަޅާވާލާ ހިސާބަށް ދިޔައިރުވެސް މިކަން ސީރިއަސްކޮށް ނުނަގާ ކަމީ ކަންބޮޑުވާކަމެއްކަމަށެވެ.
އޭނާ ވިދާޅުވީ މިފަދަ ވާހަކަތައް މަޖިލީހުގައި ދެއްކުމުން، އޭނާގެ ދާއިރާގެ ތަރައްޤީގެ މަޝްރޫޢުތައް ހުއްޓުވުމަށް މަސައްކަތް ކުރަމުންދާކަމަށެވެ. މިއީ ވަރަށް ހިތާމަހުރި ކަމެއްކަމަށާއި، އަދި މިއަދު ދެކެވޭ ވާހަތަކަތަކައި ގުޅިގެންވެސް ތަރައްޤީގެ މަޝްރޫޢު ހުއްޓާލުމަކީ މިކަމަށް އިންސާގު ލިބޭނެ ކަމެއް ނޫންކަމަށެވެ.
މަޖިލިސް ރައީސް އަދިވެސް އެބަލި އެދުގައި އެއޮތީ. މަރާލަން އިންޒާރުދީގެން އަނެއްކާ ކޯޓުގައި ޝަރުއީ މަރުހަލާގެ އަޑުއެހުމުގައި އަނެއްކާވެސް އެބުނީ މަރާލާނަމޭ. ކޯޓު ހުރުމަތް ކަނޑައިގެން 15 ދުވަސް. ބޮޑު ޓެރަރިޒަމްގެ އަަމަލެއް ހިންގައި މަރާލަން ބުނުމުންވެސް މިކަން އާދައިގެ ކަމަކަށް ދެއްކުމަށް އަދި އެކަން ޓެސްޓް ކުރުމަށް އެކި މަރުހަލާތަކުގައި ޓެސްޓް ކުރަމުން ކުރަމުން އައިސް މިހާރު އަޅުގަނޑުމެން ރައީސުލްޖުމްހޫރިއްޔާއަށް މިހާރު ތިން ބާރުގެ ތެރެއިން ދެބާރާއޭ އެދިމާކުރީ. މާދަމާ ނޭގޭ މަނިކުފާނާ ނޫންކަމެއް ދިމާކުރަނީ. މިވާހަކަ ދެއްކީމާ އަޅުގަނޑުގެ ދާއިރާގެ މަޝްރޫޢު ހުއްޓުވަންވީކީ ނޫނޭ. މިކަމާއި ސީރިއަސް ވާންވީ. މިކަމައި ފިޔަވަޅު އަޅަންވީ.
– ވައްޑެ ވިދާޅުވިއެވެ.
ވައްޑެ ވިދާޅުވީ ސަރުކާރެއް އެކުލަވާލައި ކެބިނެޓެއް އެކުލަވާލަނީ ރައްޔިތުންގެ މަސްލަހަތު ހިމާޔަތް ކުރުމަށް ކަމަށެވެ. އެއީ އާބާދީގެ ތެރެއިން 11 މީހަކު ނަމެއްގައި ކަނޑައަޅާތަނެއް ނޫންކަމަށް ވަހީދު ވިދާޅުވިއެވެ. އޭނާ ވިދާޅުވީ އޮއިވާލު ކަނދުފޮއްޗެއް ކަނޑައިގެން ގޮސްގެން އެކަން ހައްލު ކުރުމަށް ވަގުތު ކޮޅެއް ނެގުމުންވެސް މައްސަލައެއް ނޫންކަމަށާއި، ނަމަވެސް މީހަކު މަރަން ތަކުރާތުކޮށް ބުނަމުންދާއިރު އެކަން ސީރިއަސްކޮށް ނުނަގައި ނުތިބެވޭނެކަމަށެވެ.
ވަހީދު ވިދާޅުވީ ސަރުކާރެއް އޮވެގެން ރައްޔިތުންގެ ސަލާމާތާއި ރައްކާތެރިކަން ކަށަވަރު ކޮށްދޭންޖެހޭކަމަށާއި، އެކަން ނުވާނަމަ ދައުލަތެއް އޮތުމުގެ ބޭނުމެއް ނެތްކަމަށެވެ.
