ކޮންމެ ގައުމެއްގައިވެސް އެންމެ އަގުހުރި ރައުސުލްމާލަކީ އެގައުމެއްގެ މިއަދު ގެ ކުދަކުދިންނެވެ. އެއީ މާދަމާގެ ގައުމުގެ މުސްތަގުބަލް ކަމަށްވާތީއެވެ. އަދި އޭގެ އިތުރުން، މާދަމާގެ ބޮޑތި މީހުންނަށްވެ، ގައުމު އަންނަން އޮތް ޖީލުތަލާ ހަމައަށް ވާސިލް ކޮށްދިނުމުގެ ބޮޑު ޒިންމާއާއި ހަވާލުވާން ތިބީވެސް މިއަދު ކުޑަކުދިން ކަމުގައިވާތީއެވެ.

އެހެންކަމުން، ކޮންމެ ގައުމަކުންވެސް އެންމެ ބޮޑު އިސްކަމެއް ދޭއް އެއް ކަމަކަށް އަބަދުވެސް ވެފައި އޮންނަނީ ރަގަޅު ޒުވާން ޖީލެއް ބިނާކުރުމެވެ. ކުޑަކުދިންނަށް ރަގަޅު ތަރުބިއްޔަތެއް ފޯރުކޮށްދީ، އަދި ދުޅަހެޔޮ ސިއްހަތެއްގެ މަތީގައި އެކުދިން ބޮޑުކޮށް، ދީނާއި ގައުމަށް ވަފާތެރި، ގައުމުދެކެ ލޯބިވާ ޒުވާން ޖީލެއް އުފެއްދުމެވެ.

މިގޮތުން، އަދުގެ ބަވަނަ ވެފައިވާ ދުނިޔޭގައި، އަދި ވަކީން ޚާއްސަކޮށް މީޑިއާއި އަދި އެނޫން ގޮތްގޮތުންވެސް ތަފާތު އެތަކެއް ނުފޫޒަކާއި އަދި ވަސްވާހުގެ ތެރޭގައި ދުނިޔެވަނިކޮށް، ހުރިހާ ގައުމަކަށްވެސް ރަގަޅު ޖީލެއް ބިނާކުރުމުގައި ކުރިމަތިވެފައިވާ އެންމެ ބޮޑު ގޮންޖެހުމަކަށް ވެގެން ގޮސްފައިވަނީ ނުރަގަޅު އާދަތަކާއި އެބައެއްގެ ދީނާއި ސަގާފަތާއި ބީރައްޓެހި ނުފޫންޒުން މިންޖުވެފައިވާ ޒުވާން ޖީލެއް ގައުމަށްޓަކާ އުފެއްދުމެވެ.

އެހެންކަމުން ގައުމުތަކުން ސަރުކާރުތަކުން ރާވާ ސިޔާސަތުތަކާއި، އަދި އެކުލަވާލާ ތައުލިމީ މުގައްރަރުތަކުގައި މިކަންކަމަށް އިންތިހާއަށް ސަމާލުކަން ދެމުންދާއިރު، އިސްވެ ދެންނެވުނު މަތިވެރި މަގުސަދުތައް ހާސިލް ކުރުމަށްޓަކާ ކުރެވޭ މަސައްކަތްތަކުގެ އެންމެ ކުރީ ސަފުގައި ތިއްބަވަނީ ދަރީން ތަރުބިއްޔަތު ކުރުމުގެ އެންމެ މުހިންމު މަސްއޫލިއްޔަތި އުފުލަމުންދާ މުދައްރިސުންނެވެ. ނުވަތަ މުޅި ތައުލީމީ ނިޒާމުގެ އެންމެ މުހިންމު ބިންގާ ކަމުގައިވާ، ސްކޫލުތަކުގައި މަސައްކަތް ކުރަމުންދާ ޓީޗަރުންނެވެ.

ނަތިޖާއެއްގެ ގޮތުން، ދަރީންނަށް ރަގަޅު ތަރުބިއްޔަތެއް ފޯރުކޮށް ދިނުމަށްޓަކާ އެކުލަވާލެވޭ ސިޔާސަތުތަކުގެ ހަގިގީ ކުރި ބޯއްޓަށް އަބަދުވެސް ވެގެންގޮސްފައިވަނީ، ޓީޗަރުންނަކީ ފެނަވަރު ރަގަޅު ބަޔަކަށް ހަދާ، އެމީހުންނަށް ރަގަޅު މުސާރައާއި އިނާޔަތްތައް ފޯރުކޮށްދީ، އަދި އޭގެ އިތުރުން އެންމެ އެކަށިގެންވާ މަސައްކަތުގެ މާހައުލެއް މުދައްރިސުންނަށްޓަކާ ތަނަވަސް ކޮށްދިނުމެވެ. އެއީ ދަރީންނަަށް ރަގަޅު ތަޢުލީމާއި ތަރުބިއްޔަތު އުގަންނައި ދިނުމުގައި މުދައްރިސުން އަދާކުރަންޖެހޭ ދައުރުގެ ފުޅާކަމާއި އަދި މުހިންމުކަމުގެ ބޮޑު ކަމުންނެވެ.

ޓީޗަރުންގެ ދުވަސް ފާހަގަ ކުރަމުންދާއިރު، ޓީޗަރުންގެ ޚިދުމަތުގެ އަގު ވަޒަން ކުރެވޭތަ؟

ދިވެހިރާއްޖޭގައި މިވަގުތު އޮތް އެންމެ ބޮޑު ލާބަރ ފޯރސްއަކީ ސިވިލް ސާވިސްއެވެ. އަދި ސިވިލް ސާވިސްގެ ތެރެއިންވެސް، އެންމެ ގިނަ އަދަދެއްގެ މުވައްޒިފުންނަކީ މުދައްރިސުންގެ ގޮތުގައި މާލެއާއި ރާއްޖޭގެ އެކި ކަންކޮޅުތަކުގެ ސުކޫލްތަކުގައި ޓީޗަރުންގެ ގޮތުގައި މަސައްކަތް ކުރާ ފަރާތްތަކެވެ.

2020ވަނަ އަހަރުގެ ރަސްމީ ހިސާބުތަކަށް ބަލާއިރު، ރާއްޖޭގެ ހުރިހާ ސްކޫލެއްގައި ތިބި ޖުމްލަ ޓީޗަރުންގެ އަދަދަކީ 10,615 ޓީޗަރުންނެވެ. މީގެތެރޭގައި، 2,913 ޓީޗަރުން މާލޭގެ ސްކޫތަކުގައި މަސައްކަތް ކުރަމުން ދާއިރު، 7,702 ޓީޗަރުންނަކީ ރާއްޖެތެރޭގައި މަސައްކަތް ކުރަމުންދާ ޓީޗަރުންނެވެ. އަދި ރައްޖޭގެ ސްކޫލްތަކުގައި ކިޔަވާ ދިނުމުގައި ހަރަކާތްތެރި ވަމުންދާ ޓީޗަރުންގެ ނިސްބަތަށް ބަލާއިރު، ޓީޗަރުންގެ ބޮޑު އިންސައްތައެއް ހިއްސާ ކުރަމުންދަނީވެސް އަންހެން ޓީޗަރުންކަންވެސް ފާހަގަ ކޮށްލެވެއެވެ. މިގޮތުން ރާއްޖޭގެ ސްކޫލްތަކުގައި ކިޔަވާދިނުމުގައި މަސައްކަތް ކުރަމުންދާ ޓީޗަރުންގެ 72 އިންސައްތައަކީ އަންހެން ޓީޗަރުންކަން ފާހަގަ ކޮށްލަން ޖެހެއެވެ.

އަދި މީގެ އިތުރުން، ފާއިތިވެދިޔަ މުއްދަތުގައި، ތަމްރީން ލިބިފައި ތިބޭ ޓީޗަރުން ސްކޫލްތަކުގައި ކިޔަވާ ދިނުމުގައި ހަރަކާތްތެރި ވުމަށް، ފާއިތުވެދިޔަ ހުރިހާ ސަރުކާރެއްގައިވެސް ކޮށްފައިވާ މަސައްކަތްތަކާއި އަދި އެކަށައަޅާފައިވާ ސިޔާސަތުތަކާއެކީވެސް، 2020ވަނަ އަހަރު ނިމިގެން ދިޔައިރުވެސް، އެކި ސަބަބުތަކާހެދި ނަމަވެސް، އެޑިއުކޭޝަން މިނިސްޓްރީއަށް ހާސިލް ކުރެވިފައި ނުވާ ލަނޑުދަޑިއެއްކަންވެސް މިފުރުސަތުގައި ފާހަގަ ކޮށްލަންޖެހެއެވ.

މިގޮތުންބަލާއިރު، އެންމެ ފަހުން، 2020ވަނަ އަހަރު ސަރުކާރުން އާންމު ކޮށްފައިފާ ތަފާސް ހިސާބުތަކަށް ބަލާއިރު، ރާއްޖޭގެ އެކި ކަންކޮޅުތަކުގައި މަސައްކަތް ކުރަމުންދާ އަންހެން ޓީޗަރުންގެ ތެރެއިން 24 އިންސައްތައަކި ތަމްރީން ނުލިބި ތިބި ޓީޗަރުންނަށް ވާއިރު، ފިރިހެން ޓީޗަރުންގެ ތެރެއިން 9 އިންސައްތަ ޓީޗަރުންނަކީ އަދިވެސް ވަޒީފާ އަދާކުރުމަށް ބޭނުންވާ އެކަށީގެންވާ ތަމްރީން ލިބިފައި ނެތް ޓީޗަރުންކަން ފާހަގަ ކޮށްލެވެއެވެ.

ދިވެހިރާއްޖޭގެ މަސައްކަތުގެ ބާޒާރުގައި ސްކޫލްތަކުގައި ކިޔަވާދެމުންދާ ޓީޗަރުންގެ ހިއްސާއަށް ބަލާއިރު، ރާއްޖޭގައި އޮތް އެންމެ ބޮޑު ލޭބަރ ފޯސްކަމަށްވާ، ސިވިލް ސަރވިސްގައި މަސައްކަތްކުރާ 44،838 މުވައްޒަފުންގެ ތެރެއިން، ތިންބައި ކޮށްފަ އެއްބައި މުވައްޒިފުންނަކީ ރައްޖާގެ ސްލޫތަުގައި މަސައްކަތް ކުރަމުންދާ ޓީޗަރުންނެވެ.

މިގޮތުން، ސިވިލް ސަރވިސްގައި މަސައްކަތްކުރާ 22،378 މުވައްޒަފުންނަކީ އަސާސީ މުސާރައިގެ ގޮތުގައި 6400 ރުފިޔާއަށްވުރެ ދަށް މުސާރައެއް ލިބޭ މީހުން ކަމަށް ފިނޭންސް މިމިނިސްޓްރީން ދާދިފަހުން އާންމު ކޮށްފައިވާ ހިސާބުތަކުން ދައްކާއިރު، ދިވެހި ސިވިލް ސަރވިސްގައި މަސައްކަތްކުރާ 44،838 މުވައްޒަފުންގެ ތެރެއިން އަސާސީ މުސާރައިގެ ގޮތުގައި 6،400 ރުފިޔާއަށް ވުރެ ބޮޑު މުސާރައެއް ލިބެނީ އެންމެ 478 މީހުންނަށްކަން ފާހަގަ ކޮށްލަން ޖެހެއެވެ.

އެހެންކަމުން، ދިވެހި ސިވިލް ސާވިސްއަކީ ރައްޖޭގައި މަސައްކަތް މުވައްޒަފުންގެ ޕްރޮފެޝަންތަކަށް ބަލާއިރު އަދިވެސް އެންމެ ދަށް މުސާރައެއް ލިބޭ، އެހެންނަމަވެސް އެންމެ ބުރަކޮށް މުޅި ދައުލަތް ހިންގާ ދިނުމުގައި މަސައްކަތް ކުރާފަރާތްތައް ކަމަށްވެފައި، އަދި ސިވިލްސާވިސްގެ ތިންބައި ކޮށްފަ އެއްބަޔަކީ ޓީޗަރުންކަމަށް ވުމުން، ސިވިލް ސާވިސްގެ މުވައްޒަފުންގެ މުސާރައިގެ ޝަކުވާތަކުގެ ބޮޑުބައެއް ސްކޫލުތަކުގައި މަސައްކަތްރަމުންދާ ޓީޗަރުން ހިސްކުރާނޭ ކަމީ ކަށަވަރުވެ ޔަގީންވާ ކަމެކެވެ.

މިގޮތުން ފާއިތުވެދިޔަ ތަނުގައި ހެދިފައިވާ ބައެއް ދިރާސާތަކަށް ބަލާއިރު، ރާއްޖޭގެ ސްކޫލްތަކުގައި މަސައްކަތް ކުރަމުންދާ ޓީޗަރުންގެ އެވްރެޖް މުސާރަ އަދިވެސް މަހަކަށް 10،000 ރުފިޔާއަށްވުރެ މައްޗަށް އަރާފައެއް ނުވެއެވެ.

ގައުމުގައި އިންފްލޭޝަން އަހަރުން އަހަރަށް މައްޗަށް ދަމުން ދިއުމާއި، ތަންތަނުގެ ރެންޓާއި އަދި އެނޫނަސް ދިރިއުޅުމާއި ގުޅިފައިވާ ހުރިހާ ޚިދުމަތެއްގެ އަގުވެސް އަހަރުން އަހަރަށް އުފުލި، ގައުމު ދަރަނިވެރިވެ، އަދި އެންމެ ފަހުން ދުނިޔެއަށް ކުރިމަތިވެގެން ދިޔަ ކޯވިޑް ކާރިސާގެ ނަތީޖާއެއްގެ ގޮތުން ގައުމުގެ އިގްތިސާދީ ހާލަތު އިންތިހާއަށް ދަށަށް ގޮސް، ރައްޔިތުންނަށް އެތައް ނިކަމެތިކަމެއް ކުރިމަތިވެފައި މިހާލަތުގައި އަމުދުން މިފަދަ މުސާރައަކުން ދިރިއުޅުމުގެ މުހުތާދުތައް ހަމަޖެއްސުމުގައި ބޮޑެތި ގޮންޖެހުންތަކަކާ ކުރިމަތި ލާންޖެހޭނޭ ކަމީ، ކަމީ ޝަކެއް ނެތް މިންވަރަށް ސާފުކޮށް ފެންނާން އޮތް ހަގީގަތެކެވެ.

ޓީޗަރުންގެ މުސާރަ ބޮޑު ކޮށްދޭނޭ ކަމުގެ ވައުދު!

ރާއްޖޭގެ ސްކޫލްތަކުގައި މަސައްކަތް ކުރަމުންދާ ޓީޗަރުންނަކީ، ދިވެހި ސިވިލް ސާވިސްގެ އެންމެ ބޮޑުހިއްސާއެއް އަަދާ ކުރަމުންދާ މުވައްޒަފުންނަށް ވެފައި، އަދި ރައްޖޭގެ ސްކޫލްތަކުގައި ކިޔަވާދެމުންދާ ޓީޗަރުންގެ "ލޭބަރ ފޯރސް"އަކީ 10 ހާސް މުވައްޒަފުންނަށްވުރެ ވަރުގަދަ ލޭބާރ ފޯސްއަކަށް ވުމާއެކު، ދިވެހިއްޖޭގައި ބޭއްވޭ ހުރިހާ އިންތިޚާބެއްގައިވެސް ސްކޫލުތަކުގައި ޓީޗަރުންގެ ގޮތުގައި ވަޒީފާ އަދާކުރަމުންދާ މުވައްޒަފުން ވެގެންދަނީ އަދި އެމުވައްޒަފުންގެ ވޯޓު ކޮންމެ ރިޔާސީ އިްނތިޚާބެއްގައިވެސް ހުރިހާ ރިޔާސީ ކެނޑިޑޭޓުންނަށްވެސް ވެގެންދަނީ މާވާހަރެއް ކަމުގައެވެ. އަދި ފާއިތުވެދިޔަ ހުރިހާ ރިޔާސީ ކެމްޕޭނެއްގަވެސް، ހުރިހާ ރިޔާސީ ކެނޑިޑޭޓުންވެސް ވަނީ، ސްކޫލްތަކުގައި ޓީޗަރުންގެ ގޮތުގައި މަސައްކަތް ކުރަމުންދާ މުވައްޒަފުންގެ ހާލަތު ރަގަޅު ކުރުމަށް އެތަކެއް ވައުދުތަކެއް ވެވަޑައިގެންފައެވެ. މީގެ ތެރޭގައި، މުވައްޒިފުންގެ މުސާރައާއި މަސައްކަތުގެ މާހައުލާއި، އަދި މުވައްޒިފުންނަށް ލިބިދޭންޖެހޭ ހިމާޔަތާއި ރައްކާތެރިކަން ފޯރުކޮށް ދިނުމަށްވެސް ފާއިތިވެދިޔަ ތަނުގައި ވެރިކަމަށް ވަޑައިގަތުމަށް ކުރެއްވި ކެމްޕޭންތަކުގައި ރިޔާސީ ކެންޑިޑޭޓުން ވެވަޑައިގެންފައިވާ ވައުދުތައް ގުނާ އަދަދު ކުރެވޭކަށް ނެތެވެ.

އެހެންނަމަވެސް، ޓީޗަރުންގެ މުސާރައާއި އިނާޔަތުގެ ވާހަކައަކީ، ހަގީގަތުގައިވެސް ގިނަ ޓީޗަރުންނަށް ދައްކާ ކޮޅުން ނުލި ވާހަކައެއްގެ ގޮތުގައި ގިނަ މުވައްޒަފުން މިއަދުވެސް ފާހަގަ ކުރާ ވާހަކައެކެވެ. ސަބަބަކީ، މިއީ ފައިތުވެދިޔަ ތަނުގައި ވެރިކަމަށް ވަޑައިގެންނެވި ހުރިހަ ސިޔާސީ ވެރިންވެސް ވެވަޑައިގެންނެވި، އެހެންނަމަވެސް، ފުއްދާ ދީފައިނުވާ ވައުދަކަށް ވާތީވެސްމެއެވެ.

އެހެންނަމަވެސް، މުސާރައިގެ ތަފާތުކުރުންތަކާ، އަދި އެކަޝީގެންވާ މުސާރަ ލިބެމުން ނުދާކަމުގެ ޝަކުވާތއް ތައުލިމީ ނިޒާމުގެ ތެރޭގައިވެސް އިންތިހާއަށް އޮތް ނަމަވެސް، ރާއްޖޭގެ ތައުލީމީ ދާއިރާގައި ހަރަކާތްތެރިވާ މުދައްރިސުންގެ މުސާރަ އަންނަ އަހަރުން ފެށިގެން ބޮޑު ކުރުމަށް ނިންމާފައިވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ދާދިފަހުންވަނީ އިއުލާން ކުރައްވާފައެވެ. މިގޮތުން، މިއަހަރުގެ ދިރާސީ އައު އަހަރުގެ ކިޔެވުން ފެށުމާއި ގުޅިގެން ހުޅުމާލޭ ރެހެންދި ސްކޫލުގައި ބޭއްވި ޚާއްސަ އެސެމްބްލީގައި، ފާއިތިވެދިޔަ އޮގަސްޓުމަހުގެ 10 ވަނަ ދުވަހު، ދަރިވަރުންނާއި އަދި ޓީޗަރުންނާއި މުޚާތަބްކޮށް ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވީ ކޯވިޑް-19ގެ ދަތި އުދަނގޫ ވަގުތުގައިވެސް އެންމެ ބުރަ މަސައްކަތެއް ކުރެއްވީ މުދައްރިސުންކަމަށެވެ. ޓީޗަރުންގެ މަސައްކަތަކީ ދެވޭ ހަދިޔާއަކުން މުސާރައަކުން އަގުކުރެވޭނެ ކަމެއްނޫންކަމަށް ރައީސް ވިދާޅުވިއެވެ.

އަދި މި އެސެމްބްލީގައި ވާހަކަދައްކަވަމުން، ޓީޗަރުން ކުރައްވަމުން ގެންދަވާ، އަގު ވަޒަން ނުކުރެވޭ ވަރުގެ ބުރަ މަސައްކަތަށް އަލިއަޅުއްވާލައްވަމުން ރައީސުލްޖުމްހޫރިއްޔާ ވިދާޅުވިގޮތުގައި އެބޭފުޅުން ކުރައްވާ ބުރަ މަސައްކަތާއި ހޭދަކުރައްވާ ގިނަ ވަގުތުތަކާ އެކަށޭނަ ގޮތުން، މިއަންނަ އަހަރުގެ ބަޖެޓްގައި ހިމަނައިގެން، ޓީޗަރުންގެ މުސާރައާއި އިނާޔަތްތައް ބޮޑުކުރުމުގެ މަސައްކަތް ސަރުކާރުން ކުރަމުން އަންނަކަމުގައެވެ.

އެހެންކަމުން، އަނެއްކާވެސް ޓީޗަރުންގެ ދުވަހެއް ފާހަގަކޮށް، ޓީޗަރުން ގައުމަށްތަކާ ވެވަޑައިގަންނަވަމުން ގެންދަވާ ގުރުބާނީގެ ވާހަކަ ހުރިހާ އެންމެ އަލުން އަނެއްކާވެސް އާކޮށް ދައްކަމުން ދާއިރު، ޓީޗަރުންތިބީ ހާލަތު ބަދަލުވާނެ ދުވަހެއްގެ އިންތިޒާރުގައި ކަމުގައި ދަންނަވަން ޖެހެއެވެ.