ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހްގެ ދައުވަތަކަށް އ.ދ.ގެ ޢާންމު މަޖިލީހުގެ ރައީސް ޢަބުދުﷲ ޝާހިދު އަންނަ ބުދަ ދުވަހު ރާއްޖެ ވަޑައިގަންނަވާނެކަމަށް ރައީސް އޮފީހުން ބުނެފިއެވެ.
ރައީސް އޮފީހުން ބުނީ، އދ.ގެ ޢާންމު މަޖިލީހުގެ ރައީސްގެ ހައިސިއްޔަތު ޝާހިދު ރާއްޖެއަށް ވަޑައިގަންނަވަނީ މިމަހުގެ 6 އިން 9 އަށް ރަސްމީދަތުރުފުޅެއްގައިކަމަށެވެ.އ.ދ.ގެ ޢާންމު މަޖިލީހުގެ ރައީސްގެ މި ދަތުރުފުޅުގައި ރައީސުލްޖުމްހޫރިއްޔާއާ ބައްދަލުކުރައްވައި ރަސްމީ ވާހަކަފުޅުތައް ބާއްވަވާނެކަމަށް ރައީސް އޮފީހުން ބުންޏެވެ.
އ.ދ.ގެ ޢާންމު މަޖިލީހުގެ 76 ވަނަ ސެޝަނުގެ ރިޔާސަތު ރާއްޖެއިން ބަލަހައްޓަމުން ދިޔުމަކީ ރާއްޖެ އ.ދ.ގައި ބައިވެރިވުމަށްފަހު ފާއިތުވި މާޒީގައި ޚާރިޖީ ދާއިރާއިން ރާއްޖެއަށް ނުލިބޭހާ ބޮޑު ކުރިއެރުމެއްކަމަށްވެސް ރައީސް އޮފީހުން ބުންޏެވެ.
ރާއްޖޭގެ ފޮރިންގ މިނިސްޓަރު އަބުދުﷲ ޝާހިދު، އދ.ގެ އާންމު މަޖިލިހުގެ ރިޔާސަތަށް އިންތިޚާބުވެ، އެ މަޤާމާއި ހަވާލުވެވަޑައިގަތީ ފާއިތުވި ސެޕްޓެމްބަރުމަހު 14ވަނަ ދުވަހުއެވެ. ރާއްޖޭގެ ފޮރިންގ މިނސިްޓަރ އަބުދުﷲ ޝާހިދު އދ.ގެ އާންމު މަޖިލިހުގެ ރިޔާސަތަށް އިންތިޚާބު ވެވަޑައިގަތުމަށް ފަހު، އެމަގާމުގައި ދެމި ހުންނަވާނީ 1 އަހަރުގެ މުއްދަތަކަށެވެ.
އާންމު މަޖިލީހުގެ ރިޔާސަތު ލިބިވަޑައިގަތުމުން ޝާހިދު ވިދާޅުވެފައިވަނީ، ރައީސް ސާލިހުގެ ލީޑަރޝިޕްގައި، ބައިނަލްއަގުވާމީ މަސްރަހުގައި މިއަދު ރާއްޖެއިން ބޮޑެތި ކުރިއެރުންތަކެއް ހޯދަމުންދާތަން ފެންނަމުން ދާ ކަމަށާއި، މިއީ ރައީސް ސާލިހުގެ ހަރުދަނާ ޚާރިޖީ ސިޔާސަތުގެ ކާމިޔާބީ ކަމުގައެވެ. އަދި ޝާހިދުވަނީ، އެމަނިކްފާނަށް ރައީސް ސޯލިހު ކުރެއްވި އިތުބާރާއި، އަދި ޔޫއެން ޖެނެރަލް އެސެމްބްލީގެ ރައީސެއްގެ ހައިސިއްޔަތުން މަސަައްކަތް ކުރުމުގެ ފުރުސަތު ދެއްވި ކަމަށްޓަކާ ރައީސް ސާލިހަށް ޝުކުރު އަދާ ކުރައްވާފައެވެ.
2021 ސެޕްޓެމްބަރު 14 ގައި ފެށިގެން ކުރިޔަށްދާ ޢާއްމު މަޖިލީހުގެ 76 ވަނަ ދައުރުގައި އޭޝިއާ ޕެސިފިކް ސަރަހައްދުގެ ފަރާތުން ރިޔާސަތު ބަލަހައްޓަން ފޮރިން މިނިސްޓަރ ޝާހިދު ނޮމިނޭޓްކުރެއްވީ ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހްއެވެ. މިއީ އދގެ ޢާއްމު މަޖިލީހުގެ ރިޔާސަތަށް ދިވެހިރާއްޖެއިން ކުރިމަތިލި ފުރަތަމަ ފަހަރެވެ. އަދި ދިވެހިރާއްޖެ ވެގެން މިދިޔައީ ތަރައްޤީވަމުން އަންނަ ކުދި ޖަޒީރާ ޤައުމުތަކުގެ ތެރެއިން އދގެ ރިޔާސަތު ބަލަހައްޓާ 6 ވަނަ ޤައުމަށެވެ.
