އިނގިރޭސި ޕްރިމިއާ ލީގުގައި އަމިއްލަ ދަނޑުގައި މެންޗެސްޓާ ޔުނައިޓެޑުން އެވަޓަންއާ ވާދަކުރި ޕްރިމިއާ ލީގުގެ މެޗު 1-1 އިން އެއްވަރު ވެއްޖެއެވެ.
ދެ ޓީމުގެ ފަރާތުން ވެސް ގިނަ ހަމަލާތަކެއް ފެނިގެން ދިޔަ މިމެޗުގައި ފުރަތަމަ ގޯލު ކާމިޔާބުކުރީ މެންޗެސްޓާ ޔުނައިޓެޑުންނެވެ. ފުރަތަމަ ހާފްގެ 43 ވަނަ މިނިޓުގައި ޔުނައިޓެޑަށް މި ލަނޑު ޖަހައިދިނީ މާޝިއަލް އެވެ. މިއީ މި އަހަރުގެ ފެބްރުއަރީ މަހު ލީގުގައި ސައުތެމްޓަން ކޮޅަށް ޖެހި ދެ ގޯލަށް ފަހު އޭނާ ޖެހި ފުރަތަމަ ލަނޑެވެ.
ދެވަނަ ހާފު ފެށިގެން 12 މިނިޓު ފަހުން ކަވާނީ އާއި މާޝިއަލްގެ ބަދަލުގައި ސޯލްޝެއާ ވަނީ ޖޭޑަން ސަންޗޯ އާއި ކްރިސްޓިއާނޯ ރޮނާލްޑޯ ކުޅެން އަރުވައިފަ އެވެ. އެވަޓަން އިން އެއްވަރުކުރީ 65 ވަނަ މިނިޓުގައި ޑޮކޫރޭގެ އެހީތެރިކަމާއެކު އެންޑްރޮސް ޓައުންސެންޑް ޖެހި ލަނޑުންނެވެ. އަދި މި ލަނޑު ޖަހާފައި ޓައުންސެންޑް އުފާފާޅުކުރީ ރޮނާލްޑޯގެ "ސިއޫ" ސްޓައިލުގައެވެ.
މި ނަތީޖާއާއެކު ޔުނައިޓެޑާއި އެވަޓަން ވެސް އޮތީ ދާދި އެއް ހަމައެއްގައެވެ. ދެ ޓީމުވެސް ހަތް މެޗު ކުޅެ ލިބިފައިވަނީ 14 ޕޮއިންޓެވެ. ނަމަވެސް ފައިދާ ލަނޑުގެ ތަފާތުން ދެވަނައިގައި ޔުނައިޓެޑު އޮތްއިރު ތިންވަނައިގައި އޮތީ އެވަޓަންއެވެ.
