ޖަރުމަނުގެ އާ ޗާންސެލަރު އިންތިޚާބު ކުރުމަށް ބޭއްވުނު އާންމު އިންތިޚާބު، ވާތުފިޔައިގެ މެދުމިނަށް ތާއީދުކުރާ ސޯޝަލް ޑިމޮކްރެޓްސް (SPD) އިން ހަނި އަޢުލަބިއްޔަތަކުން ކާމިޔާބު ކޮށްފިއެވެ. ސޯޝަލް ޑިމޮކްރެޓުން މިއިންތިޚާބު ކާމިޔާބު ކޮށްފައިވަނީ، ފާއިތުވެދިޔަ 16 އަަހަރު ޖަރުމަގައި ޗާންސެލަރުކަން ކުރަމުންދާ އެންޖިލާ މާކެލްގެ ޕާޓީ ކޮންޒަވޭޓިވް ކްރިސްޓިއަން ޑިމޮކްރަޓިކް ޔޫނިއަން CDUގެ މައްޗަށް ކުރި ހޯދާއިގެންނެވެ.
ވަރަށް ހަނި އަޢުލަބިއްޔަކުން އާންމު އިންތިޚާބު SPD އިން ކާމިޔާބު ކުރުމާއި ގުޅިގެން އެޕާޓީގެ ލީޑަރު އޯލާފް ޝޯލްޒް ވިދާޅުވެފައިވަނީ، ޖަރުމަނުގައި އާސަރުކާރެއް ގާއިމް ކުރުމުގެ ފުރިހަމަ އިޚްތިޔާރާއި ބާރު މިހާރު އޭނާއަށް ލިބިގެން ގޮސްފައިވާ ކަމުގައެވެ.
އެހެންނަމަވެސ،ް އޭނާއާއި ވާދަކުރަމުންދާ ކޮންޒަވޭޓިވް ސިޔާސަތުތަކަށް ތާއީދުކުރާ އާމިން ލަޗެސްޓް ވިދާޅުވެފައިވަނީ، އޭނާ ދޫނުދެއްވާ އަދިވެސް ކުރިޔަށް ވަޑައިގަންނަވާނޭ ކަމުގައެވެ. އެހެންނަމަވެސް މި ދެޕާޓީއަކީ އެކީގައި އެތައް އަހަރެއްވަންދެން މަސައްކަތް ކޮށްފައިވާ ދެޕާޓީއެވެ.
ސޯޝަލް ޑިމޮކްރެޓްސް (SPD) އިންތިޚާބު ހަނި އަޢުލަބިއްޔަތަކުން ކާމިޔާބު ވެފައިވާ ކަމަށް ނަތީޖާއިން ދައްކާފައިވާތީ، ޕާޓީގެ ލީޑަރު ޝޯލްޒް ވިދާޅުވެފައިވަނީ އޭނާ ބޭނުންފުޅު ވެވަޑައިގަންނަވަނީ، ގަރީން ޕާޓީއާއި އަދި ލިބަރަލް ޕާޓީއާއެކީ އާސަރުކާރެއް އެކުލަވާލުމަށް ކަމަށެވެ.
ޖަރުމަނުގެ އާ ޗާންސެލަރަކު އިންތިޚާބުކޮށް، އަދި އާ ސަރުކާރެއް އެކުލަވާލުމަށް ބޭއްވިގެންދިޔަ މި އިންތިޚާބު ޝޯލްޒްގެ ޕާޓީއަށް ކާމިޔާބު ވެގެން ގޮސްފައިވާއިރު، ކޮންޒަވޭޓިވުންނަށް މިއިންތިޚާބުގައިވަނީ ފާއިތުވެދިޔަ ތަނުގައި ލިބިގެން ގޮސްފައި ނުވާވަރުގެ ބޮޑު ނާކާމިޔާބީއަކާ ކުރިމަތިލާން ޖެހިފައެވެ.
އެހެންނަމަވެސް ކޮންޒަވެޓިވުންގެ ލީޑަރު ލަޗެސްޓް، އެހެން ޕާޓީތަކާ ވާހަކަ ދައްކައިގެން ކޯލިޝަނެއް ހެދުމުގެ އިޚްތިޔާރު އޭނާގެ ޕާޓީން އޭނާއަށް ދީފައިވާ ކަމަށް ވިދާޅުވެފައިވާތީ، މިހާރު ބައެއް ފަރާތަތަކުން ގަބޫލުކުރަނީ، ޖަރުމަނުގެ ސިޔާސީ މަސްރަހަށް ހައްލެއް ނުލިބި އިންތިޚާބުގެ ވާދަވެރިކަން ދިގު މުއްދަތަކަށް ދެމިގެން ހިގައިދާނޭ ކަމުގައެވެ.
މި އިންތިޚާބު ފާހަގަ ވެގެންދިޔައީ، ދެޖަރުމަނުގެ ހަގުރާމައަށްފަހު ޖަރުމަނުގެ ސިޔާސީ މަސްރަހުގައި، އޮތް އެންމެ ބޮޑު ދެޕާޓީ ކަމުގައިވާ ޝޯލްޒްގެ SPD އާއި އަދި އެޕާޓީގެ ވާދަވެރި، ކޮންޒަވޭޓިވް ކްރިސްޓިއަން ޑިމޮކްރަޓިކް ޔޫނިއަން CDUގެ ބާރު ބޮޑުތަނުން ކުޑަވެގެންދިޔަ އިންތިޚާބެއްގެ ގޮތުގައެވެ.
ޖަރުމަނުގެ މިހާރުގެ ޗާންސެލަރ މާކެލް ނިސްބަތްވަނީ ކޮންޒަވޭޓިވް ކްރިސްޓިއަން ޑިމޮކްރަޓިކް ޔޫނިއަން CDU އަށެވެ.
