މިއަދު ބޭއްވޭ އެމްޑީޕީގެ ގައުމީ މަޖިލިސް އިންތިޚާބު ވެގެންދާނީ އެއްގޮތަށްވުރެ ގިނަ ގޮތްގޮތުން މުހިންމު އިންތިޚާބަކަށެވެ. ސަބަބަކީ މިވަގުތު އެމްޑީޕީގެ އެތެރޭގަ އޮތް ބޮޑެތި ސިޔާސީ ކޯޅުންތަކެވެ.

އަދި މިއިންތިޚާބު ވަކީން ޚާއްސަކޮށް ވެގެން މިދަނީ، ފާއިތުވެދިޔަ މުއްދަތުގައި، ރައީސް ސާިލހާއި، ރައީސް ނަޝީދުއާ ދެބޭފުޅުންގެ މެދުގައި އުފެދިގެންދިޔަ ޚިޔާލު ތަފާތުވުންތަކާއި، އަދި އުފެދިގެންދިޔަ އުދާސްތަކަށްފަހު، އެ ޕާޓީތެރޭގައި ބޭއްވިގެންދާ ފުރަތަމަ އާންމު އިންތިޚާބު ކަމުގައިވެސް މެއެވެ. އަދި މި ޚިޔާޅުތަފާތުވުން ތަކުގައި ޕާޓީ ބައިބައިވެ، ދެ ފެކްޝަނެއްގެ ގޮތުގައި ޕާޓީ ދެބައި ވެގެން ގޮސްފައި ވަނިކޮށް، ދެފެކްޝަންގެ ވާދަވެރި ކަމުގެ ތެރޭގައި ބޭއްވިގެންދާ، ޕާޓީގެ ހުރިހާ މެމްބަރުން ވޯޓުލާ ފުރަތަމަ އިންތިޚާބަށް ކަމުގައިވެސް މެއެވެ.

ހަމަ އެފަދައިން، ދާދިފަހުން، އެމްޑީޕީގެ މަޖިލިސް މެޖޯރިޓީގެ އިތުރުން ގައުމީ މަޖުލިހުގެ މެޖޯރިޓީވެސް ރައީސް ސާލިހުގެ އަތްޕުޅުގައި އޮތްކަމަށް އެމަނިކްފާނު ވިދާޅުވެ، ވަކީން ޚާސަކޮށް ގައުމީ މަޖިލިހުގެ ތެރެއިން ރައީސް ނަޝީދަށް އޮތް މެޖޯރިޓީ ގެއްލިގެން ގޮސްފައިވާކަން، ގައުމީ މަޖިލިހުގައި ދާދިފަހުން ނެގުނު އެތައް ވޯޓަކުންނާއި ޖަލްސާއަކުންވެސް ވަރަށް ރަގަޅަށް ސާފުވެގެން ގޮސްފައިވަނިކޮށް، ގައުމީ މަޖިލިސް މެޖޯރިޓީ އަލުން ހޯދުމަށް މި ފުރުސަތު ވެގެންދަނީ ނަޝީދަށް ލިބިގެންދާ މުޅިން އާ ފުރުސަތަކަށް ކަންވެސް މިފުރުސަތުގައި ފާހަގަ ކޮށްލަން ޖެހެއެވެ.

އެހެންކަމުން ހުރިހާ ގޮތަކުން ބެލިކަމުގައިވި ނަމަވެސް، އެމްޑީޕީގެ ގައުމީ މަޖިލިސް އަލުން އިންތުޚާބު ކުރުމަށް އެޕާޓީގެ މެމްބަރުން މިއަދު ވޯޓުލުމަށް ނިކުންނައިރު، މިއަދުގެ ގައުމީ މަޖިލިސް އިންތިޚާބު ވެގެން ދަނީ، އެޕާޓީއަށް އެތައް ގޮތަކުން މުހިންމު އިންތިޚާބަކަށެވެ.

ގައުމީ މަޖިލިސް މެޖޯރިޓީ ދެ ފެކްޝަނަށްވެސް ވަރަށް މުހިންމު!

އެމްޑީޕީގެ ގައުމީ މަޖިލިހަކީ އެޕާޓީގެ އެންމެ ބާރުގަދަ ގުނަވަނެވެ. އަދި އަމުދުން މިހާރު ޕާޓީގެ އެންމެ އިސްލީޑަރު ވެރިކަމުގައި ހުރެމެ، ރައްޔިތުންގެ މަޖިލިިހުގައި އެޕާޓީގެ ސުޕަރ މެޖޯރިޓީ އޮތުމުގެ ނަތީޖާއެއްގެ ގޮތުންވެސް، ސަރުކާރު ހިންގުމުގައާއި ރައްޔިތުންގެ މަޖިލިހުން ނިންމާ މުހިންމު ބައެއް ނިންމުންތަކުގައި އެންޑީޕީގެ ގައުމީ މަޖިލިހުގެ ދައުރުވަނީ އެތައް ގޮތަކުން އިތުރުވެގެން ގޮސްފައެވެ.

މީގެ ބައެއް ހެކިތައް ފާއިތުވެދިޔަ ކުރުމުއްދަތުގައިވެސް ވަނީ ފެނިގެން ގޮސްފައެވެ. މިގޮތުން މީގެ އެއް މިސާލެއްގެ ގޮތުން ފާހަގަ ވާން އޮތީ، ދާދިފަހުން އެމްޑީޕީގެ ގައުމީ މަޖިލިހުގެ ތެރެއިން ރައީސް ނަޝީދު ފާސް ކުރައްވަން މަސައްކަތް ކުރެއްވި ބައެއް ގަރާރުތަކެވެ.

ފާއިތިވެދިޔަ ޖުލައިމަހުގެ 25ވަނަ ދުވަހު ބޭއްވުނު އެޕާޓީގެ ގައުމީ މަޖިލިހުގެ ޖަލްސާގައި ނަޝީދު ވަނީ، ރާއްޖޭގައި ކުއްލި ނުރައްކާ އިއުލާންކޮށް ހަރުކަށި ފިކުރަށް ނިސްބަތްވާ މީހުން ހައްޔަރު ކުރުމަށް ސަރުކާރަށް ގޮވާލާ ގަރާރެއް ޤައުމީ މަޖިލީހުގެ އެބައްދަލުވުމަށް ހުށަހައްޅުއްވާފައެވެ. މިގާރާރުގައި ނަޝީދު ވިދާޅުވީ މިއީ ދިވެހި ފުލުހުންނަށް ހަރުކަށި ފިކުރު މީހުން ހައްޔަރު ކުރަން ޖާގަދޭންވީ ވަގުތުކަމަށެވެ.

މަސްރަހު ދިރާސާކުރާ ބައެއް ފަރާތްތަކުން ވިދާޅުވާ ގޮތުގައި، އެމްޑީޕީގެ ގައުމީ މަޖިލިހުގެ ތާއީދު މި ގަރާރަށް ހޯއްދަވައިގެން ނަޝީދު ބޭނުންފުޅުވީ، ހަރުކަށިފިކުރަށް ތާއީދުކުރާ ކަމަށް އެކަނިކުފާނު ގަބޫލުފުޅު ކުރައްވާ ބައެއް ފަރާތްތައް ހައްޔަރު ކުރުމަށް ރައީސް ސާލިހަށް މަޖުބޫރު ކުރުވުމެވެ. އެހެންނަމަވެސް ކަން ދިމާކުރިގޮތުން، 144 މެމްބަރުން ތިއްބަވާ ގައުމީ މަޖިލިހުގައި އެންމެ 38 ވަރަކަށް މެމްބަރުން މިގަރާރަށް ތާއީދު ކުރެއްވުމުން، ރައީސަށް ޕްރެޝަކުރެވޭ ވަރުގެ ބާރެއް މިގަރާރުގައި ނެތިގެން ދިޔައީއެވެ.

އެހެންކަމުން އެމްޑީޕީގެ އިސްލީޑަރު ގައުމުގެ ރައީސަކަށް ހުންނަވާ، ގައުމީ މަޖިލީހުގެ ސާފު މެޖޯރިޓީ ލިބިގެންދާ ނިންމުންތަކަށް އަމަލީސިފަ ގެނައުމުގައި ރައީސުލްޖުމުހޫރިއްޔާގެ މައްޗަށް ވަރަށްވެސް ބޮޑު ނުފޫޒެއް ގައުމީ މަޖިލިހަށް ފޯރުވެން އޮތް ކަމުގައި ދަންނަވަން ޖެހެއެވެ.

އަދި މީގެ އިތުރުންވެސް، ރައްޔިތުންގެ މަޖީލީހުގައި ވަޒީރުން ޒިންމާދާރު ކުރުވުމާއި، އަދި ވަޒީރުންނަށް އިތުބާރު އޮތްތޯ ބެލުމާއި ނުބެލުމުގެ އިތުރުންވެސް، ވަކި ޚާއްސަ އެޖެންޑާއެއް ކުރިއެރުވުމުގައި، ގައުމީ މަޖިލިހުގެ ސާފު މެޖޯރިޓީން އިން ވަކި ކަމެއް ވަކިގޮތަކަށް ނިންމިގެން ދިއުމުން އެނިންމުމުގެ ޕްރެޝަރ ސަރުކާރަށް އިންތިހާއަށް އޮންނަމުންދާކަން މިއީވެސް މިވެރިކަމުގައި ފާއިތިވެދިޔަ މުއްދަތުގައި ވަރަށްވެސް ފާޅުކަން ބޮޑު ގޮތެއްގައި ފެނިގެން ގޮސްފައިވާ ހަގީގަތެކެ.

ބައެއް މުހިންމު ދާއިރާތަކުގެ ނަތީޖާއިން އަސްލު މަންޒަރު ބުނެދޭނެ!

އެމްޑީޕީގެ ބައެއް މަޖިލިސް މެމްބަރުންގެ މިހާރުގެވެސް ޝަކުވާއަކީ، ކޮރަޕްޝަންގެ ތުހުމަތު ކުރެވިފައިވާ ބައެއް ފަރާތްތައް މި އިންތިޚާބުގައި ވާދަކުރަމުންދާ ދިއުމެވެ. އަދި، ކޮރަޕްޝަންގެ މައްސަލަތަކުގައި ޕީޖީއާއި ހަމައަށް ނުވަތަ އޭސީސީއަށް މައްސަލަ ހުށަހެޅިފައިވާ ފަރާތްތަކުންވެސް މިއިންތިޚާބުގައި ވާދަކުރަމުންދަނީ، މިފަދަ ފަރާތްތަކަށް މިއިންތިޚާބުގައި ވާދަ ނުކުރެވޭނެކަމަށް ކުރިން އެޕާޓީން ނިންމާފައިވާ ބައެއް ނިންމުންތަކަށް ފަހުން ބަދަލު ގެނެސްގެންކަންވެސް ފާހަގަ ކޮށްލަންޖެއެވެ.

އަދި ހަމައެފަދައިން، މިގޮތުން، މިއިންތިޚާބުގައި ވާދަކުރަމުންދާ ބައެއް ފަރާތްތަކަކީ، އެމްޑީޕީގެ ރައީސް، ނަޝީދުގެ ފާޑުކިއުން ވަރަށް ބޮޑަށް އަމާޒުވެގެން ގޮސްފައިވާ ފަރާތްތައްކަންވެސް މިފުރުސަތުގައި ފާހަގަ ކޮށްލަންޖެއެވެ.

މިގޮތުން އެންމެ ބޮޑަށް ފާހަގަ ކޮށްލަންޖެހެނީ މާލޭ ދާއިރާއަށް ކުރިމަތި ލާފައިވާ، ސަރުކާރުގެ ސްޓޭޓް މިނިސްރުކަމުގެ މަގާމްގައި މިވަގުތު ހުންނެވި އަކްރަމް ކަމާލުއްދީނާއި އަދި މާލޭ ސިޓީގެ ކުރީގެ މޭޔަރު ސިފާއާއި ދެބޭފުޅުންގެ މެދުގައި އުފެދިގެން ގޮސްފައިވާ ވާދެވެރިކަމެވެ. އަކްރަމް ކަމާލުއްދީނަކީ، ސީދާ ރައީސް ނަޝީދުގެ ފާޑުކިޔުން އަމާޒުވެފައިވާ ބޭފުޅަކަށް ވާއިރު، ކުރީގެ މޭޔަރު ސިފާއަކީ، ނަޝީދު އާއިލާގެވެސް ތާއީދާއެކީ ކެމްޕޭން ކުރައްވަމުން ގެންދަވާ ބޭފުޅެކެވެ. އެހެންކަމުން، މާލޭ ސިޓީގެ ދާއިރާ ރައީސްކަމަށް، ސިފާ އިންތިޚާބުވެ ދިއުމަކީ، ނަޝީދު ބޭނުންފުޅުވާ އަދި، އަމިއްލަ ހައިސިއްޔަތުންވެސް އެމަގުން މަސައްކަތް ކުރައްވަމުން ގެންދަވާ ކެމެއްކަންވެސް އޮތީ ސާފުކޮށް ފެންނާށެވެ.

އަދި މީގެއިތުރުން، ގައުމީ މަޖިލިހުގެ ދާއިރާ ރައީސްކަމަށް ސިފާ ކެމްޕޭން ކުރައްވާފައިވަނީ، ނަޝީދު މިހާރު ކުރައްވަމުން ގެންދަވާ، ވެރިކަމުގެ ނިޒާމުގެ ބަރުލަމާނީ ނިޒާމަކަށް ބަދަލު ކޮށްލުމުގެ މަސައްކަތްވެސް ވަރަށްބޮޑަށް ޕްރޮމޯޓު ކުރައްވައިގެން ކަމަށް ވުމާވެސް އެކު، މިދާއިރާގެ އިންތިޚާބުގެ ނަތީޖާ ނިކުމެގެން ދާގޮތުން، މާލެފަދަ އެމްޑީޕީގެ ތާއީދު ޒަމާނުއްސުރެ ބޮޑުކޮށް އޮތްކަމަށް އެޕާޓީން އަބަދުވެސް ބުނަމުންދާ ދާއިރާއެއްގެ ގްރާސް ރޫޓަށް އައިސްފައިވާ ބަދަލު މި ނަތީޖާއިން ވަރަށްވެސް ބޮޑަށް ރަމްޒު ކޮށްދޭނޭ ކަމުގައި ގިނަ ބަޔަކު ދެކެއެވެ.

ހަމައެއާއެކު، މިއިންތިޚާބުގެ އެކި ދާއިރާތަކަށް، މި ސަރުކާރުގެ ބައެއް ވަޒީރުންވެސް ވާދަކުރައްވަމުން ގެންދެވުމާއެކު، އަދި މީގެ ތެރޭގައި ނަޝީދުގެ ތާއީދު ނެތް ވަޒީރުންނާއި، ރައީސް ސާލިހުގެ ތާއީދު އޮތް ވަޒީރުންނާއި، އަދި އެމްއެމްޕީއާރުސީގެ ޚިޔާނާތުގައި އެބައެއްގެ މައްޗަށް ޚިޔާނާތުގެ ތުހުމަތު ކުރެވޭ ވަޒީރުންނާއި، އަދި ނަޝީދުގެ ފެކްޝަނުގެ ފާޑުކިއުންތައް ފާޅުގައި އާމާޒުވާ ވަޒީރުންނާއި އަދި އެނޫން ބޭބޭފުޅުންވެސް އެކި ދާއިރާތަކަށް ވާދަކުރައްވަމުން ގެންދެވުމުގެ ނަތީޖާއެއްގެ ގޮތުން، މިފަދަ ގިނަ ދާއިރާތަކުގެ ނަތިޖާއިން، އެމްޑީޕީ އާންމު މެމްބަރުންގެ ތާއީދު ނުވަތަ ރުހުން، ރައީސް ނަޝީދާއި ރައީސް ސާލިހާ ދެބޭފުޅުންގެ ތެރެއިން މިވަގުތު ބޮޑަށް އޮތީ ކޮން ބޭފުޅަކަށް ކަންވެސް މިއިންތިޚާބުން ސާފުވެގެން ދާނޭކަމީ ކަށަވަރުވެ ޔަގީންވާ ކަމެކެވެ.

ގައުމީ މަޖިލިސް އިންތިޚާބަށްފަހު ބޮޑެތި ބަދަލުތަކެއް!

އެމްޑީޕީގެ ގައުމީ މަޖިލިސް އިންތިޚާބު މިއަދު ބޭއްވިގެން ދާއިރު ފާހަގަ ކޮށްލަންޖެހޭ އެންމެ މުހިންމު ނުކުތާއަކީ، ކުރިޔަށް އޮތީ 2023ގެ ރިޔާސީ އިންތިޚާބު ކަމެވެ. އަދި ހަމައެފަދައިން ފާހަގަވާން އޮތް އަނެއްކަމަކީ، ރިޔާސީ އިންތިޚާބަށް 2 އަހަރެއްހާ ދުވަސް ބާކީ އޮތްއިރު، ރާއްޖޭގައި މިވަގުތު އޮތް ރިޔާސީ ނިޒާމް އުވާލާ، ބަރުލަމާނީ ނިޒާމް ގެނައުމަށް އެމްޑީޕީގެ ރައީސް މުހައްމަދު ނަޝީދު ކުރައްވަމުން ގެންދަވާ މަސައްކަތަތަކެވެ.

ހަމަ އެފަަދައިން، ކުރިޔަށް އޮތް 2023ގެ ރިޔާސީ އިންތިޚާބުގައި ވާދަކުރައްވާނޭކަން ރައީސް ނަޝީދު އިއުލާން ކުރައްވާފައިވާއިރު، އެ އިންތިޚާބަށް ކުރިމަތި ލެއްވުމުގައި ޕާޓީގެ އެތެރޭގައި ރައީސް ނަޝީދާއި ރައީސް ސާލިހާ ދެބޭފުޅުންގެ މެދުގައި އުފެދިގެން ގޮސްފައިވާ ވާދަވެރިކަމެވެ.

އެހެންކަމުން، އެމްޑީޕީގެ މިހާރުގެ އަސާސީ ގަވާއިދު އޮތްގޮތަށް ބަލާއިރު، ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކޮށް ނުކުރެވިއްޖެނަމަ، ކުރިޔަށް އޮތް 2023ގެ ރިޔާސީ އިންތިޚާބުގައި އެ ޕާޓީގެ ޓިކެޓުގައި ވާދަކުރާނޭ ބޭފުޅަކު އިންތިޚާބު ކުރުމަށްޓަކާ ޕާޓީގެ އެތެރޭގެ އިންތިޚާބެއް ބޭއްވުން ލާޒިމްވެގެން ދާނެއެވެ.

އެހެންނަނަމަވެސް ދުނިޔޭގެ ގިނަ ޑިމޮކްރަސީތަކުގައި އޮންނަ އުސޫލަށް ބަލާއިރުވެސް، އަދި އެމްޑީޕީގެ ތެރޭގައި އޮތް ރައީސް ސާލިހުގެ ފެކްޝަނުން ވަކާލާތު ކުރަމުންދާ ގޮތަށް ބަލާއިރުވެސް، ޕްރައިމަރީއަކާ ނުލާ ރިޔާސީ ޓިކެޓް މިހާރު ހުންނެވި އެޕާޓީގެ ރައީސަށް، ދެވަނަ ދައުރަކަށް އެރުވުމަށް ޕާޓީގެ އެތެރޭގައި މަސައްކަތްތަކެއް ކުރެވިގެންދާނެ ކަމީ ވަރަށްވެސް ބޮޑަށް ގަބޫލުކުރެވޭ ކަމެކެވެ. އަދި މިގޮތުން ކުރެވޭ މަސައްކަތެއް ކާމިޔާބު ކުރުމަށްޓަކާ، އެމްޑީޕީގެ ޚާއްސަ ކޮންގްރެސްއެއް ބޭއްވުމަށްޓަކާ ގައުމީ މަޖިލިހުގެ މެޖޯރިޓީއިން ނިންމާ ނިމްމުންތައް ވަރަށްވެސް މުހިންމު ވެގެންދާއިރު، މިގޮތުން އުފެދޭ ވާދެވެރިކަމެއްގައި، ރައީސް ސާލިހަށްވެސް އަދި ރައީސް ނަޝީދަށްވެސް އެމްޑީޕީގެ ގައުމީ މަޖިލިހުގެ ސާފު މެޖޯރިޓީ އިންތިހާއަށް މުހިންމު ވެގެންދާކަމީ އެއްވެސް ޝައްކެއް ނެތް މިންވަރަށް ކަށަވަރުވެ ޔަގީންވާ ކަމެކެވެ.

އެހެންކަމުން، ހުރިހާ ގޮތަކުން ބެލިކަމުގައި ވިނަމަވެސް، މިއަދު ބޭއްވިގެންދާ އެމްޑީޕީގެ ގައުމީ މަޖިލިސް އިންތިޚާބަކީ އެޕާޓީގެ އެތެރޭގައި މިވަގުތު އޮތް ސިޔާސީ ވާދަވެރިކަމަށް ވަރަށްވެސް މުހިންމު އިންތިޚާބެކެވެ. އަދި މިއިންތިޚާބު ގުޅިފައިވަނީ، 2023 ގެ ރިޔާސީ އިންތިޚާބާ ކަމީވެސް، ޝައްކެއް ނެތްމިންވަރަށް އެގެން އޮތް ކަމެކެވެ. އަދި މިއިންތިޚާބުގެ ނަތީޖާއިން، ޕާޓީގެ ގްރާސް ރޫޓް މިވަގުތު އޮތް ގޮތްވެސް، ބޮޑުވާ ބިއްލޫރި އަޅާ ނަތީޖާއަށް ބާލާލުމުން ވަރަށްވެސް ރަގަޅަށް ސާފުވެގެން ދާނެކަމީވެސް ކަށަވަރުވެ ޔަގީންވާ ކަމެކެވެ. ގިނަ ބަޔަކު އިންތިޒާރު ކުރަމުންދަނީ މިހަގީގަތްތައް ސާފުވެގެންދާނެ ވަގުތަކަށެވެ.