ހޮނިހިރު ދުވަހު ބާއްވާ އެމްޑީޕީގެ އެތެރޭގެ އިންތިޚާބަކީ މިހާތަނަށް އެޕާޓީން ބާއްވާ އެންމެ ވާދަވެރި އިންތިޚާބު ކަމުގައި އެމްޑީޕީގެ ޗެއާޕާސަން ހަސަން ލަތީފް ވިދާޅުވެއްޖެއެވެ.
އެމްޑީޕީގެ އެތެރޭގެ އިންތިޚާބުގެ އެންމެ ފަހުގެ މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ހަސަން ލަތީފް ވިދާޅުވީ، މިއިންތިޚާބަށް ވަމުންދާ ތައްޔާރީތަކާއި، އިންތިޚާބުގެ ކެމްޕެއިންގެ ކަންކަން ކުރިއަށްދާ ގޮތަށް ބަލާއިރުވެސް މިއިންތިޚާބުގެ ފޯރި އޮތް މިންވަރު ހާމަވާކަމަށެވެ. މިއިންތިޚާބުގައި އިންތިޚާބު ކުރެވޭ މެމްބަރުންނަކީ އެމްޑީޕީ ހިންގުމާއި ހަވާލުވާ ބަޔަކަށްވާއިރު، އެފަދަ ބަޔަކު އިންތިޚާބު ވުމަކީ މުހިންމު ކަމެއްކަމަށް ހަސަން ވަނީ ވިދާޅުވެފައެވެ.
އިންތިޚާބަށް ތައްޔާރުވަމުންދިޔަ ގޮތާއި، އިންތިޚާބުގެ ކެމްޕެއިންގެ ކަންކަން ކުރިއަށްދާ ގޮތުންވެސް އިންތިޚާބުގެ ފޯރި ވަރަށް ގަދަވާނެ. މި އިންތިޚާބުގެ ނަތީޖާ ވަރަށް މުހިހްމު ވާނެ. އިންތިޚާބުގެ ނަތީޖާ މުހިންމު ވަނީ ޕާޓީ ޕާޓީއެއްގެ ގޮތުގައި ދެމިއޮތުމަށް. އިންތިޚާބު ކުރެވޭ މެމްބަރުން ވާންޖެހޭ ޕާޓީ ދެމިއޮތުމަށް އިންތިޚާބު ކުރެވޭ މެމްބަރުންނަށް.
– ހަސަން ވިދާޅުވިއެވެ.
މި އިންތިޚާބުގެ މައުލޫމާތު ދެއްވަމުން އިންތިޒާމު ކޮމެޓީގެ މެންބަރު އެޑިއުކެޝަން މިނިސްޓަރ ޑރ.އައިޝަތު އަލީ ވިދާޅުވީ އިންތިޚާބުގައި 3 ރަށެއް ފިޔަވައި ހުރިހާ ރަށެއްގައިވެސް ވޯޓުލުން ކުރިއަށްދާނީ އެރަށެއްގެ ސްކޫލުގައި ކަމަށެވެ. އަދި މާލޭގައި 15 ސްކޫލެއްގެ އިތުރުން ސޯޝަލް ސެންޓަރުގައި ކަމަށެވެ. މިފަހަރުގެ އިންތިޚާބުގައި ހޮނިހިރު ދުވަހު ތ.ގުރައިދޫ ދާއިރާގައި ފިޔަވައި އެހެން ހުރިހާ ރަށެއްގައި ވޯޓުލުން ކުރިއަށްދާނެއެވެ.
ގުރައިދޫގެ އިންތިޚާބު ފަސްކުރީ ކޯވިޑްގެ ހާލަތާއި ގުޅިގެންނެވެ. މިއިންތިޚާބުގައި މޮނިޓަރިންގައި ހުރި ރަށްތަކުގައިވެސް ވޯޓުލުން ކުރިއަށްދާނެކަމަށް އެމްޑީޕީގެ އިންތިޒާމު ކޮމެޓީން ބުނެފައިވެއެވެ.
ވެރިކަންކުރާ މައި ޕާޓީ އެމްޑީޕީން އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ އެޕާޓީގެ އެތެރޭގެ އިންތިޚާބުގައި 92،743 މީހުނަށް ވޯޓް ލެވޭނެ ކަމަށް އެޕާޓީންވަނީ ބުނެފައެވެ. އެމްޑީޕީގެ އެތެރޭގައި ބޭއްވޭ އެންމެ ބޮޑު އިންތިޚާބަށްވާއިރު، އިންތިޚާބުގައި 300 ވޯޓު ފޮށި އެކި ދާއިރާތަކުގައި ބެހައްޓާނެއެވެ. މިއިންތިޚާބުގައި 900 އެއްހައި އޮފިޝަލުން ހަރަކާތްތެރިވާނެކަމަށާ، އޮފިޝަލުން ހޯދުމުގެ މަސައްކަތް މިހާރުވެސް ދަނީ ކުރަމުންކަމަށް އެމްޑީޕީން ބުނެއެވެ.
ހޮނިހިރު ދުވަހު ބޭއްވުމަށް ހަމަޖެހިފައިވާ، އެމްޑީޕީގެ އެތެރޭގެ އިންތިޚާބުގައި 733 ކެނޑިޑޭޓުން ވާދަކުރެއެވެ. މީގެ ތެރެއިން 165 ކެނޑިޑޭޓަކު ވަނީ ވޯޓަކާއި ނުލައި އިންތިޚާބު ވެފައެވެ. އެމްޑީޕީގެ އިންތިޚާބާބެހޭ ޤަވާއިދު ބުނާގޮތުން ޤައުމީ މަޖިލިސް އިންތިޚާބުގައި ކުރިމަތިލާ ދާއިރާތަކަށް ހޮވަންޖެހޭ ޢަދަދަށް ކުރިމަތިލައިފިނަމަ އެކެނޑިޑޭޓަކު ވޯޓަކާއި ނުލައި އިންތިޚާބުވާނެއެވެ.
