މިދިޔަ އަންގާރަ ދުވަހުގެރޭ ރާއްޖޭގެ ރައީސުލްޖުމްހޫރިއްޔާ އަދި ވެރިކަންކުރާ މައި ޕާޓީ އެމްޑީޕީގެ އެންމެ އިސްލީޑަރު ރައީސް ޞާލިހު އދ.ގެ އާންމު މަޖިލީހުގައި ދެއްވި ތާރީޚީ ތަޤުރީރަށް އެތައްބައެއްގެ ތައުރީފުވަނީ ލިބިގެން ގޮސްފައެވެ.
ރައީސް އިބްރާހިމް މުހައްމަދު ޞާލިހު ދެއްވި ތަޤުރީރަށް ދުނިޔޭގެ ބޮޑެތި ޤައުތަކުންވެސް ވަނީ ތައުރީފް ކޮށްފައެވެ. ޚާއްސަކޮށް މުސްލިމު ޤައުމުތަކާއި، އަވަށްޓެރި ޤައުމުތަކުންވެސް ވަނީ ރައީސްގެ ތަޤުރީރަށް ތަޢުރީފް ކުރައްވާފައެވެ. ދިވެހިންނަށް މި ތަޤުރީރު ޚާއްސަވީ ދިވެހިންގެ މާދަރީ ބަހުން ވާހަކަ ދެއްކުމާއި، ދިވެހިން އުންމީދުކޮށްގެން ތިއްބެވި އެތައް ވާހަކަތަކެއް ރައީސްގެ ތަޤުރީރުން އަޑުއިވިގެން ދިއުމުންނެވެ. އަދި މީގެ އިތުރުން، އާންމު ޖަލްސާގައި ދިބެހި ބަހުން ރައީސް ސާލިހު ވާހަކަ ތަގުރީރު ކުރެއްވިއިރު، އާންމު މަޖިލިހުގެ ރިޔާސަތު ބަލަހައްޓަވަން ރާއްޖޭގެ ފޮރިންގ މިނިސްޓަރ އަބުދުﷲ ޝާހިދު އިންނެވުމެވެ.
މޫސުމާއިބެހޭ މައްސަލަތަކަށާއި، ފަލަސްތީން މިނިވަން ދައުލަތެއްގެ ގޮތޮތުގައި ބަލައި ގަތުމަށާއި، ޓެރަރިޒަމާއި ދެކޮޅަށް ކެރިންގެ ފާޅުގައި މި ޖަލްސާގައި ރައީސް ސާލިހު ދެއްވި ވަރުގަދަ މެސެޖްތަކަކީ އދގ.ގެ އާންމު މަޖިލީހުގައި ދުނިޔޭގެ ބާރުގަދަ ގައުމުތަކުންވެސް ބުނަން ފަސްޖެހުނު ވާހަކަތަކެކެވެ. ރައީސްގެ ތަޤުރީރަށް ރާއްޖޭގެ އެތައް ބައެއްގެ ތައުރީފް ލިބިގެން ދިޔައީ މި ސަބަބުތަކަށްޓަކާ ކަމަށް ގިނަބަޔަކު ދަނީ ބުނަމުންނެވެ. މިގޮތުން، ދައުލަތުގެ ވަޒީރުންނާއި، ތާރީޚީ ބޭފުޅުންނާއި، އާންމު ގިނަ ބައެއްގެ ތައުރީފްވެސް ޔޫއެން ޖެނެރަލް އެސެމްބްލީގެ 76ވަނަ ސެޝަންގައި ދިވެހި ބަހުން ރައީސަށް ދެއްވި ތާރީޚީ ތަގުރީރަށް ލިބިގެންދިޔައެވެ.
ރައީސްގެ ތަޤުރީރުގައި ރާއްޖެއަށް މުހިންމު ގިނަ މައްސަލަތަކަށް އަލިއަޅުއްވާލައްވާ، އަދި އަދި ވަކީން ޚާއްސަކޮށް ދުނިޔޭގެ ތިމާވެއްޓާވެސް ގުޅުންހުރި ބޮޑެތި މައްސަލަތަކާ ގުޅޭގޮތުން، ދުނިޔޭގެ ގައުމުތަކަށް ވަރުގަދަ މެސެޖްތަކެއްވެސް ދެއްވާފައިވާތީ، ރައީސް މި ތަގުރީރަށް އެންމެ ފުރަތަަ ތަހުނިޔާ ވިދާޅުވާނެ އެއްބޭފުޅަކަށް ވެގެންދާނެކަމަށް ގިނަ ބަޔަކު ގަބޫލުކޮށްގެން ތިބި އެއްބޭފުޅަކީ އެމްޑީޕީގެ ރައީސް މުހައްމަދު ނަޝީދެވެ.
މިގޮތުން، ރައީސް ނަޝީދަކީ އެމްޑީޕީގެ ރައީސަށް ވުމާއި، އަދި ދައުލަތުގެ އެއްބާރުގެ ވެރިޔަކަށް ވުމުގެ އިތުރުން، ރައީސް ޞާލިހަކީ ރާއްޖޭގެ ރައީސްކަން އެމްޑީޕީގެ ޓިކެޓުގައި ތަމްސީލް ކުރައްވާ ބޭފުޅަކަށްވާއިރު، މިފަދަ މުހިންމު މަގާމެއްގައި ރައީސުލްޖުމްހޫރިއްޔާ ދިވެހިރާއްޖެ ތަމްސީލުކޮށް، އަދި ރާއްޖެ ފަޚުރުވެރިވާފަދަ ވާހަކަ ފުޅުތަކެއް ދައްކަވާ، ރާއްޖެ ދުނިޔޭގެ ސަމާލުކަމަށް އައިސްފައިވާ މިފަދަ ދަޑިވަޅެއްގައި، އެމްޑީޕީގެ ރައީސްގެ ތަހުނިޔާގެ "ޓުވީޓެއް" ނަމަވެސް ފެންނާނެކަމަށް ގިނަ ބަޔަކު ދިޔައީ އުއްމީދު ކުރަމުންނެވެ.
ނަމަވެސް، ރައީސް ނަޝީދުގެ ފަރާތްޕުޅުން މިތަޤުރީރާއި ގުޅިގެން އެއްވެސް ވާހަކަފުޅެއް މިހާތަނަށް އިވިގެން ގޮސްފައިނުވާކަން ފާހަގަ ކޮށްލެވެއެވެ. އދ.ގެ އާންމު މަޖިލިހުގެ ރިޔާސަތާ މިހާރު ހަވާލުވެ ވަޑައިގަންނަވާފައިވާ، ރާއްޖޭގެ ފޮރިންގ މިނިސްޓަރ އަބުދުﷲ ޝާހިދު އާންމު މަޖިލިހުގެ ރިޔާސަތާއި ހަވާލުވެ ވަޑައިގެންނެވި މުނާސަބަތުގައި ރައީސް ނަޝީދު ޝާހިދަށް ތަހުނިޔާ ވިދާޅުވެ ވަނީ ޓުވީޓު ކުރައްވާފައެވެ.
A proud moment for small islands. Maldives Foreign Minister starts the UNGA for this year. https://t.co/WbtlHpC6HH
— Mohamed Nasheed (@MohamedNasheed) September 14, 2021
ރައީސް ޞާލިހަށް އދ.ގައި ތަޤުރީރު ކުރައްވަން ލިބުނު ފުރުސަތުގައި ދެއްވި ތަޤުރީރަށް އެތައް ބައެއްގެ ސަމާލުކަން ލިބުނުނަމަވެސް، އެމްޑީޕީގެ އެތެރޭގައި އުފެދިފައިވާ ވާދަވެރިކަމާއިއެކު، އެމްޑީޕީގެ ތެރޭގައި މިވަގުތު އޮތް ރައީސް ނަޝީދުގެ ފެކްޝަނަށް ނިސްބަތްވާ ބޭފުޅުންގެ ފަރާތުން ރައީސް ސާލިހުގެ ތަޤުރީރާ ގުޅޭ އެއްވެސް ކޮމެންޓެއް ކުރި ތަނެއް ނުފެނެއެވެ. ރައްޔިތުންގެ މަޖިލީހުގެ މެމްބަރުންގެ ތެރެއިން ރައީސް ޞާލިހުގެ ފެކްޝަނަށް ތާއީދު ކުރައްވާ ބޭފުޅުން، މިތަޤުރީރަށް ތަޢުރީފުކޮށް، ރައީސް ސާލިހަށް ތަހުނިޔާ އަރިސް ކުރެއްވި ނަމަވެސް، ޕާލަމެންޓްރީ ގްރޫޕްގައި ތިއްބަވާ، ރައީސް ނަޝީދަށް ތާއީދު ކުރައްވާ ގިނަ ބޭފުޅުންގެ ފަރާތުން މިފަދަ އެއްވެސް ވާހަކަފުޅެއް އިވިގެން ގޮސްފައި ނުވާއިރު، މީގެތެރެއިން ގިނަ ބޭފުޅުންނަށް، ރާއްޖޭގެ ރައީސުލްޖުމްހޫރިއްޔާ އދ. ގައި ތަގުރީރެއް ދެއްވިކަން އެގިވަޑައި ގަންނަވާކަމަށްވެސް ހައްދަވާފައި ނުވާކަން ފާހަގަ ކޮށްލެވެއެވެ.
ރައީސް ނަޝީދާއި ރައީސް ޞާލިހުގެ ވާދަވެރިކަން ބޮޑުވެފައިވާ މިހާލަތަކީ އެމްޑީޕީގެ ޤައުމީ މަޖިލިސްގެ އިންތިޚާބުވެސް ބޯމަތިވެފައިވާ ދަނޑިވަޅެވެ. ހޮނިހިރު ދުވަހު އިންތިޚާބު ބާއްވާއިރު، ރައީސް ޞާލިހު އދ.އަށް ވަޑައިގެންނެވީވެސް އަތޮޅު ތެރޭގެ ރަށްތަކަށް ވަޑައިގެން ވަރަށް ވަރުގަދަ ކެމްޕެއިން ތަކެއް ކުރައްވާފައެވެ.
އަދި މިހާރު އެމްޑީޕީގެ މެމްބަރުންގެ ތެރޭގައި އިންތިޚާބުގެ ވާދަވެރިކަން ބޮޑުވެ، ރައީސް ނަޝީދުއާއި ރައީސް ސާލިހުގެ ފެކްޝަނަށް ނިސްބަތްވާ މެމްބަރުންގެ މެދުގައި ބަހުގެ ހަމަލާތައްވެސް ދަނީ ބަދަލު ކުރެވެމުންނެވެ. މި އިންތިޚާބު ރައީސް ޞާލިހަށް ތާއީދު ކުރައްވާ ބޭފުޅުން ބޮޑު ތަފާތަކުން ކާމިޔާބު ކުރައްވާނެކަމަށް މަަސްރަހު ދިރާސާ ކުރައްވާ ބޭފުޅުން ދެކެއެވެ.
