އެމްޑީޕީގެ މަތީފަންތީގެ އެއްވެސް މަޤާމެއްގައި ރައްޔިތުންގެ ފައިސާގައި ޖެހުނު މީހަކު ނުހުންނާނެކަމަށް މާފަންނު ހުނޅަގު ދާއިރާގެ މެމްބަރު މުހައްމަދު ފަލާހު ވިދާޅުވެއްޖެއެވެ.
އެމްއެމްޕީއާރުސީގެ ޚިޔާނާތުގެ ފައިސާގައި ރައީސް ޞާލިހު ޖެހިފައިވާކަމަށްބުނެ އަލީ ވަހީދު ކުރެއްވި ތުހުމަތުތަކަށް ރައްދު ދެއްވަމުން، ފަލާހު ވިދާޅުވީ މަޤާމު ގެއްލި ބޮޑެތި ތުހުމަތު ކުރެވޭ ހިސާބުން ރައީސް ޞާލިހު ގޯސްވެ ސަރުކާރު ގޯސްވުމަކީ ވާނެ ކަމެއްކަމަށެވެ. ނަމަވެސް އަލީ ވަހީދު ވަޒީރުކަމަށް އައިރުވެސް ރައީސް ޞާލިހު 35 މިލިޔަން ރުފިޔާއެއްގައި ޖެހިފައިވާކަން އެގިހުރެ މަޤާމާއި ހަވާލުވިއިރު އެވާހަކަ ނުދައްކަވައި މިއަދު ދައްކަވާ ވާހަކަތަކެއް ރައްޔިތުން ގަބޫލު ނުކުރާނެކަމަށެވެ.
އޭނާ ވިދާޅުވީ މިސަރުކާރުގެ ޚާއްސަކޮށް އެމްޑީޕީގެ މަތީ މަޤާމުތަކުގައި އެމްއެމްޕީއާރުސީގެ ފައިސާގައި ޖެހިފައިވާ މީހަކު ނުހުންނާނެކަމަށެވެ. އެމްއެމްޕީއާރުސީގެ ފައިސާގައި ޖެހިފައިވަނީ ޕީޕީއެމްގެ އިސްބޭފުޅުންކަމަށާއި، އެކަމާއި ޝައްކު ކުރާނެ ރައްޔިތަކު މިޤައުމުގައި ނެތްކަމަށް އޭނާ ވިދާޅުވިއެވެ.
އިނގިރޭސިވިލާތުގައި ހުންނަވައިގެން ރޭ ނޫސްވެރިންނާ ބައްދަލުކުރައްވައި، އަލީ ވަހީދު ތަކުރާރުކޮށް ވިދާޅުވަމުން ގެންދެވީ މާލޭގެ ރެހެންދި ފްލެޓުން "ކަޅު ދަބަސް" އުފުއްލެވި ބޭފުޅުންގެ ތެރޭގައި އެމްޑީޕީގެ އެންމެ އިސް ފަސް މަގާމުގައި ތިއްބެވި ބޭފުޅުން ހިމެނިވަޑައިގަންނަވާ ކަމަށެވެ. އޭގެ ފަހުން، ތަފުސީލަށް ވަޑައިގެން އޭނާ ވިދާޅުވީ އޭގެ ތެރޭގައި ރައީސް ވެސް ހިމެނިވަޑައިގަންނަވާ ކަމަށާއި އޭގެ ވީޑިއޯ ޕޮލިހުގައި ވެސް ހުންނާނެ ކަމަށެވެ.
އަދި، ފުލުހުންގެ އެ ލިސްޓްގައި ހިމެނޭ ބައެއް ބޭފުޅުންގެ ނަންތައް ކަނޑާލައިފައިވާ ކަމުގެ ތުހުމަތު ކުރައްވައި، އެކަމަށް ޓަކައި، އެ މައްސަލަ އިސްކޮށް ބެއްލެވި އެސިސްޓެންޓް ކޮމިޝަނަ އޮފް ޕޮލިސް މުހަންމަދު ރިޔާޒު، ﷲއަށް ބިރުވެތިވާން ޖެހޭނެ ކަމަށް އޭނާ ވިދާޅުވިއެވެ. އަލީ ވަހީދު ވިދާޅުވީ އެކަން ހިނގިއިރު އޭނާ ހުންނެވީ އެމްޑީޕީގެ ޗެއާޕާސަންގެ މަގާމުގައި ކަމަށާއި އުޅުއްވީ ރާއްޖެ އިން ބޭރުގައި ކަމަށެވެ. ރައީސް އޭރު ހުންނެވީ އެމްޑީޕީގެ ޕީޖީ ލީޑަރު ކަމުގަ އެވެ.
މި ދަންނަވަނީ އެންމެ އިސް ފަސް މަގާމުގައި ހިމެނޭ ބޭފުޅަކު ރެހެންދި ފްލެޓަށް ވަދެ، 35 މިލިއަން ރުފިޔާ ހިފައިގެންދިޔައޭ. އަދި އެއީ އެކެއްގެ ވާހަކަ.
– އަލީ ވަހީދު ވިދާޅުވިއެވެ.
އަލީ ވަހީދު އެހެން ވިދާޅުވި ނަމަވެސް، އެމްއެމްޕީއާރުސީގެ އެއްވެސް ތަހުގީގެއްގައި، ރައީސް އިބްރާހިމް މުހަންމަދު ސޯލިހާ ހިޔާނާތުގެ ފައިސާ އެއްވެސް ގުޅުމެއް އޮތް ކަމެއް އެނގޭކަށް ނެތެވެ. އޭސީސީ އާއި ރައީސް އޮފީހުން ވެސް ކުރިން ވެސް ބުނެފައި ވަނީ ހިޔާނާތުގެ އެއްވެސް ކަމަކާ އަދި ފައިސާއަކާ ވެސް ރައީސާ ގުޅުމެއް ނެތް ކަމަށެވެ.
2 Responses
ސޯލިޙު ކަޅުދަބަސް ހިފައިގެން ދަނިކޮށް ނަގާފައިވާ ފޮޓޯއެއް ދެއްކިޔަސް ވީޑިއޯ އެއް ދެއްކިޔަސް މާކުންބެ މެން ގަބޫލެއް ނުކުރާނެ. މީހަކު ނުލަފާކަމެއް ކުރިކަން އެނގި ހުރެ އެވާހަކަ ކުރިން ނުދައްކާ ހުރެފަ ފަހުން އެވާހަކަ ދެއްކުމަކީ އެ މީހާ އެކަން ނުކުރާ ކަން ދޭހަވާ ކަމެއްނޫނެވެ.
35 މިލިއަން ކާލީ އިސްފަންތީގެ މީހެއް ނޫން. ޢެއީ މުލު ވަގު