މިސްރުގެ ހަވަމްދިޔާ ސިޓީގެ ވިލެޖެއް ކަމުގައިވާ އުއްމު ޚެނާންގައި، ކައިވެނި ކުރުމަށްޓަކާއި، އުމުރުން 12 އަހަރުގެ ފިރިހެން ކުއްޖަކާއި 11 އަހަަރުގެ އަންހެން ކުއްޖަކު އެންގޭޖް ވިކަން އިއުލާން ކުރިތާ ގަޑިއެއްހާއިރު ތެރޭގައި، މިސްރުގެ ސަލާމަތީ ބާރުތަކުން އެ ދެކުދިންގެ މައިންފައިން ހައްޔަރު ކޮށްފިއެވެ.
މި ދެކުދިންގެ އެންގޭޖް ވުމަށްފަހު، އެންގޭޖްމަންޓް ޕާޓީ ބާއްވާފައިވަނީ، މި މިހަފްތާގެ ހުކުރު ދުވަހު، މިސްރުގެ ވެރިރަށް، ކައިރޯއާއި 30 ކިލޯމީޓަރު ދުރުގައި އޮންނަ އުއްމު ޚެނާން ވިިލެޖުގައެވެ.
މި ދެކުދިންގެ އެންގޭޖްމަންޓްގެ އުފަލުގައި ކުރިޔަށް ދިޔަ ހަރަކާތްތައް ދެ އާއިލާއިން ކުއްލިއަކަށް މަޑު ޖައްސާލާފައިވަނީ، މި ދެކުންދިންގެ މައިންބަފައިން، ދެކުދިންގެ ކައިވެންޏަށް ރަން ގަތް ފިހާރައިން ފޮޓޯތައް ފޭސްބުކުގައި އާންމު ކުރުމާއި ގުޅިގެންނެވެ.
އަދި މިހާހިސާބުން، މިސްރުގެ ސަލާމަތީބާރުތަކުންވަނީ، މި ދެކުދިންގެ އެންގޭޖްމަންޓާއި ގުޅުންހުރި އިވެންޓްތަކާއި ގުޅޭ މައުލޫމާތު ހޯދުމުގެ މަސައްކަތް ފަށާފައި ވެއެވެ.
މިސްރުގެ ނޭޝަނަލް ކައުންސިލް ފޯރ ޗައިލްހޫޑް އެންޑް މަދަރހޫޑްއިން މައުލޫމާތު ދީފައިވާ ގޮތުގައި، މިގޮތުން ކުރެވުނު މަސައްކަތުގެ ނަތީޖާއެއްގެ ގޮތުން، މި ދެކުދިންގެ މައިންބަފައިން ހޯދާ، އެމީހުން ހަޔަރުކޮށް، އަދި މިހާރުވަނީ ތަހުގީގީ އިދާރާތަކާ ހަވާލު ކުރެވިފައެވެ.
ނޭޝަނަލް ކައުންސިލް ފޯރ ޗައިލްހޫޑް އެންޑް މަދަރހޫޑް އިން ނެރުނު ބަޔާނެއްގައި އެ ކައުންސިލްގެ ސެކެޓްރީ ޖެނެރަލް ސަހަރު އަލް ސަންބަތީ ވިދާޅުވީ މިހާދިސާއާއި ގުޅޭ މައުލޫމާތު އެ ކައުންސިލްގެ ޗައިލްޑް ސަޕޯޓު ސިސްޓަމަށް ލިބިގެން ދިޔައީ، މި ހަފްތާގެ ހޮނިހިރު ދުވަހު އެ ކައުންސިލުގެ ހޮޓްލައިނަށް ކަމަށެވެ. އަދި މިދެކުދިން އެންގޭޖުވެގެން ބޭއްވި ޕާޓީގެ ފޮޓޯތައްވެސް އެކައުންސިލަށް ލިބިފައިވާކަމަށްވެސް މިބަޔާނުގައި ބުނެފައިވެއެވެ.
އަލް ސަންބަތީ ވަނީ މިޙާދިސާ ވަރަށްބޮޑަށް ކުށްވެރި ކޮށްފައެވެ. އަދި ވިދާޅުވެފައިވަނީ، ކުޑަކުދިންނަށް އަނިޔާ ކުރުމާއި، ބިރު ދެއްކުމަކީ، މިސްރުގެ ގާނޫނު އަސާސީ 80ވަނަ މާއްދާއާއި ޚިލާފު ކަމެއް ކަމަށާއި އަދި ދައުލަތުން މިހާލަތުގައި ފިޔަވަޅު އެޅުމަކީ ގާނޫނު އަސާސީން ދައުލަތުގެ މައްޗަށް ލާޒިމްކަމެއް ކަމަށެވެ.
ކޮމެންޓު ފޮނުވާ