ދާދިފަހުން، އިސްރާއީލުގެ ސެކިއުރިޓީ ވަރުގަދަ ގިލްބޮއާ ޖަލުން ފިލުމަށް ބޭނުންކުރި ޓަނަލް ކޮނުމަށް، ޖަލުންފިލި 6 މުޖާހިދުން، ކެއިން ބުއިމަށް ބޭނުންކުރާ ސަމްސަލާއި އަދި އެފަދަ އެހެންތަކެތި ބޭނުން ކޮށްފައިވާކަން އެގުމާއެކު، ފަލަސްތީނުގެ ރައްޔިތުން އެމީހުންގެ މިނިވަންކަމަށް ކުރަމުންދާ ޖިހާދުގެ ރަމްޒީ ނިޝާނެއްގެ ގޮތުން ސަމްސާ ބޭނުން ކުރަން ފަށަައިފިއެވެ.
މިމަހުގެ 6 ވަނަ ދުވަހު، ގިލްބޮއާ ޖަލުން ފަލަސްތީނުގެ މި 6 މުޖާހިދުން ފިލުމަށްފަހު، ސޯޝަލް މީޑިއާތަކުގައި އާންމުވެގެންދިޔަ ފޮޓޯތަކުން ފެންނަ ހުރިގޮތުގައި މުޖާހިދުން ފިލާފައިވަނީ، އެމީހުން ހައްޔަރު ކޮށްފައި ތިބި ގޮޅީގައިހުރި ސިންކެއްގެ ދަށުގައިހުރި ބާގަޑަކުން ޓަނަލެއް ކޮނެގެންނެވެ.
އިސްރާއީލުގެ އަސްކަރިއްޔާއިން މިހާރުވަނީ މި ހުރިހާ މުޖާހިދުންވެސް ހައްޔަރު ކޮށްފައެވެ.
އިސްރާއީލު ސިފައިން އަލުން ހައްޔަރު ކޮށްފައިވާ މަހުމޫދު އަބުދުﷲ އަރުދާހުގެ ގާނޫނީ ވަކީލު ބުނެފައިވާ ގޮތުގައި، މަހުމޫދު އޭނާގެ ގޮޅިން ޓަނެލް ކޮނުމަށް ބޭނުންކޮށްފައިވަނީ، ކާން ގެންގުޅުން ސަމަސަލާއި، ތައްޓާއި، އަދި ސައި ކައްކަން ގެންގުޅުނު ކުރާގެ އަތްގަޑު ފަދަ ތަކެއްޗެވެ.
އަދި މަހުމޫދުއާއި ހަވާލާދީ، އޭނާގެ ގާނޫނީ ވަކީލު ރުސްލާން މަހާޖަނެހު މައުލޫމާތު ދީފައިވާ ގޮތުގައި، އޭނާ ޓަނެލް ކޮނުމުގެ މަސައްކަތް ފަށާފައިވަނީ، ފާއިތުވެދިޔަ އަހަރުގެ ޑިސެމްބަރު މަހުއެވެ.
ހިފާފައިވާ ހުޅަނގު އައްސޭރީގައި އޮންނަ ފަލަސްތީނުގެ ސިޓީއެއްކަމުގައިވާ ތުލްކަރެމް އަވަށަށް، މި 6 މުޖާހިދުން ޖަލުން ފިލި ހާދިސާއާއި ގުޅިގެން ވަނީ 1996 ވަނަ އަހަރު އިސްރާއީލުގެ ޖަލުން ފިލި ގައްސާން މަހުދާވީގެ ހަދާންތައް ގެނުވާފައެވެ.
އޭނާ އިސްރާއީލުގެ ޖަލުން ފިލާފައިވަނީ އަމިއްލަ އަތުގެ ނިޔަފަތި ބޭނުން ކޮށްގެން ކޮނުނު ޓަނަލެއް ބޭނުން ކޮށްގެންނެވެ.
މި މުޖާހިދުން ޖަލުން ފިލުމާއެކު އެމީހުން ހޯދުމަށް އިސްރާއީލުން ވަރުގަދަ އޮޕަރޭޝަނެއް ހިންގާފައި ވެއެވެ. މިގޮތުން، ރޯޑް ބްލޮކްތަކާއި ޗެކް ޕޮއިންޓްތައް ގާއިމްކޮށް، ހިފާފައިވާ ހުޅަނގު އައްސޭރިއަށް އެތައްހާސް ސިފައިންނެއް ޖަމާކޮށް، ޑްރޯންތަކާއި ހެލިކޮޕްޓަރުތައް ބޭނުންކޮށް، އެމީހުން ހޯދުމަށްޓަކާ އެކި ސަރަހައްދުތަކުގައި ކެމެރާތައްވެސް ހަރުކޮށްފައި ވެއެވެ.
އިސްރާއީލުގެ އޮތޯރިޓީތަކުން މީގެކުރިންވަނީ އިތުރު 4 މުޖާހިދުން ހައްޔަރު ކޮށްފައެވެ. އާދީއްތަ ދުވަހު އިސްރާއީލުން އަސްކަރިއްޔާއިން ބުނެފައިވަނީ، ބާކީ ތިބި ދެމީހުން އަމާން ދީފައިވަނީ، "ސެކިއުރިޓީ ފޯރސްއަށް ލިބުނު އިންޓެލިޖެންސް މައުލޫމާތުތަކުގެ އަލީގައި އެ ދެމީހުން ތިބި ތަން ހޯދާ، މުޅި ސަރަހައްދު ވަށާލުމާއެކު،" ކަމުގައެވެ.
އުމުރުން 35 އަހަރުގެ އައިމަން ކަމަމްޖީ އާއި 26 އަަހަރުގެ މުނަޑެލް އިންފިއާތުއާއި ދެމީހުންނަކީވެސް އިސްލާމިކް ޖިހާދުގެ މެމްބަރުންނެވެ.
މި 6 މުޖާހިދުންވެސް ހައްޔަރުކޮށްފައިވަނީ، ހުޅަނގު އައްސޭރީގެ ވެސްޓް ބޭންކުގެ ޖެނިންގައި ކައުންޓަރޓެރަރިޒްމް ފޯރސްތަކާއެކު ހިންގުނު އޮޕްރޭޝަންތަކުގައި ކަމަށް އިސްރާއީލުގެ އަސްކަރިއްޔާއިން އާންމު ކޮށްފައިވާ ކުރު ބަޔާނެއްގައި ބުނެފައި ވެއެވެ. އަދި ބުނެފައިވަނީ މިހާރު އެމީހުންނާ ދަނީ ސުވާލުކުރެވި ތަހުގީގު ކުރެވެމުން ކަމުގައެވެ.
އެންމެ ފަހުން ހައްޔަރު ކުރެވުނު 2 މީހުންގެ ތެރެއިން ކަމަމްޖީ އެންމެ ފުރަތަމަ އިސްރާއީލުން ހައްޔަރު ކޮށްފައިވަނީ 2006 ވަނަ އަހަރު ހުޅަނގު އައްސޭރީގެ ޖެނިން ކައިރީގައި އޮންނަ ކަފްރު ޑަންއިންނެވެ. އަދި އެ ސަރަހައްދުގައި ވަޒަންވެރި ވެގެން އުޅުނު އިސްރާއީލުގެ ޒުވާނަކު ކިޑްނެޕްކޮށް މަރާލުމުގެ ކުށުގައި އިސްރާއީލުގެ ކޯޓުންވަނީ އޭނާގެ މައްޗަށް އުމުރު ދުވަހުގެ ޖަލުހުކުމެއް އިއްވާފައެވެ.
