މިމަހުގެ ކުރީކޮޅު އިސްރާއީލުގެ ސެކިއުރިޓީ ވަރުގަދަ ޖަލަކުން ފިލާފައިވާ ފަލަސްތީނުގެ 6 މުޖާހިދުންގެ ތެރެއިން ބާކީތިބި 2 ހަގުރާމަވެރިންވެސް މިހާރު ހައްޔަރު ކޮށްފައިވާ ކަމުގައި، އިސްރާއީލުގެ އަސްކަރިއްޔާއިން މިއަދު ބުނެފިއެވެ.
އިސްރާއީލުގައި ހުރި ސަލާމަތީ ފިޔަވަޅުތައް އެންމެ ވަރުގަދަ އެއް ޖަލުން މުޖާހިދުން ފިލާފައިވަނީ މިމަހުގެ ކުރީކޮޅުގެ ދުވަހެއްގެ ރޭގަޑުގެ ވަގުތެއްގައި ކަމަށް އިސްރާއީލުގެ އަސްކަރިއްޔާއިން ވަނީ ބުނެފައެވެ. އިސްރާއީލުގެ އަސްކަރިއްޔާގެ ރޭޑިއޯއިން އޭރު ބުނެފައިވާ ގޮތުގައި، މުޖާހިދުން ފިލާފައިވަނީ ޖަލުންގެ އެތެއިން ކޮނެގެން ހަދާފައިވާ ޓަނަލެއް ބޭނުން ކޮށްގެންނެވެ. އަދި ބުނެފައިވަނީ، މި މުޖާހިދުން ފިލާފައިވަނީ، ބޭރުގެ ފަރާތްތަކުގެ އެހީތެރިކަން ލިބިގެންކަމީ ކަށަވަރުވެ ޔަގީންވާ ކަމެއްކަމުގައެވެ.
އިސްރާއީލުގެ އުތުރުގައި ހަދާފައިހުންނަ ގިލްބޮއާ ޖަލުން މުޖާހިދުން ފިލުމަށް ބޭނުންކޮށްފައިވަނީ އެމީހުން ހައްޔަރު ކޮށްފައިވާ ގޮޅީގައި ހުރި ސިންކެއްގެ ދަށުން ޓަނަލެއް ކޮނެގެންނެވެ. މި ޓަނަލް ކޮނުމަށް މުޖާހިދުން ބޭނުން ކޮށްފައިވަނީ، ތަފާތު އެކި ޓޫލްތަކާއި އަދި އޭގެ އިތުރުން ސަމްސާފަދަ ތަކެއްޗެވެ.
މި މުޖާހިދުން ޖަލުން ފިލުމާއެކު އެމީހުން ހޯދުމަށް އިސްރާއީލުން ވަރުގަދަ އޮޕަރޭޝަނެއް ހިންގާފައި ވެއެވެ. މިގޮތުން، ރޯޑް ބްލޮކްތަކާއި ޗެކް ޕޮއިންޓްތައް ގާއިމްކޮށް، ހިފާފައިވާ ހުޅަނގު އައްސޭރިއަށް އެތައްހާސް ސިފައިންނެއް ޖަމާކޮށް، ޑްރޯންތަކާއި ހެލިކޮޕްޓަރުތައް ބޭނުންކޮށް، އެމީހުން ހޯދުމަށްޓަކާ އެކި ސަރަހައްދުތަކުގައި ކެމެރާތައްވެސް ހަރުކޮށްފައި ވެއެވެ.
އިސްރާއީލުގެ އޮތޯރިޓީތަކުން މީގެކުރިންވަނީ އިތުރު 4 މުޖާހިދުން ހައްޔަރު ކޮށްފައެވެ. އާދީއްތަ ދުވަހު އިސްރާއީލުން އަސްކަރިއްޔާއިން ބުނެފައިވަނީ، ބާކީ ތިބި ދެމީހުން އަމާން ދީފައިވަނީ، "ސެކިއުރިޓީ ފޯރސްއަށް ލިބުނު އިންޓެލިޖެންސް މައުލޫމާތުތަކުގެ އަލީގައި އެ ދެމީހުން ތިބި ތަން ހޯދާ، މުޅި ސަރަހައްދު ވަށާލުމާއެކު،" ކަމުގައެވެ.
އުމުރުން 35 އަހަރުގެ އައިމަން ކަމަމްޖީ އާއި 26 އަަހަރުގެ މުނަޑެލް އިންފިއާތުއާއި ދެމީހުންނަކީވެސް އިސްލާމިކް ޖިހާދުގެ މެމްބަރުންނެވެ.
މި 6 މުޖާހިދުންވެސް ހައްޔަރުކޮށްފައިވަނީ، ހުޅަނގު އައްސޭރީގެ ވެސްޓް ބޭންކުގެ ޖެނިންގައި ކައުންޓަރޓެރަރިޒްމް ފޯރސްތަކާއެކު ހިންގުނު އޮޕްރޭޝަންތަކުގައި ކަމަށް އިސްރާއީލުގެ އަސްކަރިއްޔާއިން އާންމު ކޮށްފައިވާ ކުރު ބަޔާނެއްގައި ބުނެފައި ވެއެވެ. އަދި ބުނެފައިވަނީ މިހާރު އެމީހުންނާ ދަނީ ސުވާލުކުރެވި ތަހުގީގު ކުރެވެމުން ކަމުގައެވެ.
އެންމެ ފަހުން ހައްޔަރު ކުރެވުނު 2 މީހުންގެ ތެރެއިން ކަމަމްޖީ އެންމެ ފުރަތަމަ އިސްރާއީލުން ހައްޔަރު ކޮށްފައިވަނީ 2006 ވަނަ އަހަރު ހުޅަނގު އައްސޭރީގެ ޖެނިން ކައިރީގައި އޮންނަ ކަފްރު ޑަންއިންނެވެ. އަދި އެ ސަރަހައްދުގައި ވަޒަންވެރި ވެގެން އުޅުނު އިސްރާއީލުގެ ޒުވާނަކު ކިޑްނެޕްކޮށް މަރާލުމުގެ ކުށުގައި އިސްރާއީލުގެ ކޯޓުންވަނީ އޭނާގެ މައްޗަށް އުމުރު ދުވަހުގެ ޖަލުހުކުމެއް އިއްވާފައެވެ.
ކޮމެންޓު ފޮނުވާ