ކެލާދާއިރަގެ މެމްބަރު އިބްރާހިމް ޝަރީފް މިއަދު ފިއްލަދުއަށް ދިއުމުން އެރަށުގެ ގިނަ ބަޔަކު ނިކުމެ މުޒާހަރާކޮށް އޭނާ ރަށުން ބާލައިފިއެވެ.

ޚަބަރު އޮންލައިނަށް މައުލޫމާތު ދިން ފިއްލަދޫ މީހަކު ބުނެފައިވަނީ މެމްބަރު ރަށަށް އައީ އަހަރަށްވުރެ ގިނަ ދުވަސްފަހުން ކަމަށާއި، ރައްޔިތުންގެ ކަންބޮޑުވުންތައް ތަކުރާރުކޮށް ހުށަހެޅުމުންވެސް މެމްބަރު އަޑު ނާހާކަމަށެވެ. އަދި މިއަދުވެސް ވަޑައިގަތީ އަމިއްލަ އެދުމެއް އޮވެގެން އެކަން ހާސިލް ކުރަން ކަމަށެވެ. ރައްޔިތުން ތިބީ މެމްބަރާއި މެދު އިންތިހާއަށް "ރުޅި" އައިސްފައި ކަމަށާއި، ޚާއްސަކޮށް ދައްޕަރު ވިއްކާލުމުގައި މެމްބަރުގެ ބައިވެރިވުން އޮތްކަމަށް އޭނާވަނީ ބުނެފައެވެ.

ޝަރީފް މިއަދު ފިއްލަދުއަށް ދިއުމުން ފިއްލަދޫ ޒުވާނުން ވަނީ ދައްޕަރު މައްސަލާގައި ވަރަށް ބޮޑަށް ފާޑުކިޔާފައެވެ. ފާޑުކުޔުންތައް އަމާޒުކޮށް ޒުވާނުން ކިޔަމުންދިޔަ އެއްވެސް އެއްޗަަށް އޭނާ އެއްޗެއް ބުނެފައި ނުވެއެވެ. ޒުވާނުން ގޮވަމުން ދިޔައީ މަޤާމުން އިސްތިއުފާ ދެއްވުމަށާއި، ވެފައިވާ ވައުދުތަކާއި ޚިލާފް ވެފައިވާކަމަށެވެ. އަދި ދައްޕަރަކީ ފިއްލަދޫ އިހްތިޞާޞްގައި ހިމެނޭ ރަށަކަށްވާއިރު، އެރަށް ފިއްލަދޫގެ އިހުތިސާސުޔން ވަކި ކުރުމަކީ ގަބޫލު ކުރެވޭނެ ކަމެއް ނޫންކަމަށެވެ.

2010 އަހަރު ހއ.ދައްޕަރަކީ ފަޅުރަށެއްގެ ގޮތުގައި ކަނޑައަޅައި، އެރަށުގައި ރިސޯޓެއް ތަރައްޤީކުރުމަށް ބަޔަކާއި ހަވާލުކުރިއެވެ. ނަމަވެސް ރިސޯޓް ތަރައްޤީކުރުން އެރަށުގައި ކުރިއަށް ގެންގޮސްފައެއް ނުވެއެވެ. އޭގެ ފަހުން މިދޔަ އަހަރުގެ މާރިޗް 18 ގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ ފިއްލަދޫގެ އިހުތިޞާސްގެ ތެރޭގައި ދައްޕަރު ހިމަނުއްވާފައެވެ. ނަމަވެސް ފަހުން ރައީސް އޮފީހުން ނެރުނު ގަރާރެއްގައި ވަނީ ފިއްލަދޫގެ އިދާރީ ދާއިރާގެ އިހުތިޞާސްގެ ތެރެއިން ދައްޕަރު ވަކިކޮށްފައެވެ.

ދައްޕަރަކީ ހއ.ފިއްލަދޫގެ އުތުރުން އެރަށާގުޅިފައި އޮންނަ ރަށެކެވެ.ފިއްލަދޫގެ އިހްތިސާސްގެ ތެރޭގައި އޮތް ދައްޕަރު އެރަށުގެ އިގްތިސާސް އިން ވަކިކުރުމާ ގުޅިގެން ޓްރާންސްޕޭރެންސީ މޯލްޑިވްސްއިންވެސް ވަނީ ކަންބޮޑުވުން ފާޅުކޮށްފައެވެ.