ހދ.ނޭކުރެންދޫގައި ސަރުކާރުން ހަދަން ނިންމާފައިވާ ޖަލުގެ މަސައްކަތް ކުރުމަށް މެމްބަރަށް އެއްވެސް އެންގުމެއްނެތި ކުއްލިއަކަށް ގެޒެޓް ކުރެއްވުމުން އެކަމުގެ ހިތްހަމަ ނުޖެހުން އެދާއިރާގެ މެމްބަރު މުހައްމަދު ރާއީ ފާޅު ކުރައްވައިފިއެވެ.

ނޭކުރެންދު ޖަލު ތަރަައްޤީ ކުރުމަކީ މިސަރުކާރުގެ ވައުދެކެވެ. އަދި އެކަން ކުރުމަށް މިނިސްޓަރ އިމްރާން ދެއްވި އެކި ތާރީހުތަކަށް މަސައްކަތް ނުފެށުމުން ރާއީ ވަނީ އެކި ފަހަރުމަތީން މިނިސްޓަރު މަޖިލީހަށްވެސް ހާޒިރުކޮށްފައެވެ. އަދި މިކަން ނުދާތީ މިދިޔަ މަހުގެ 21 ވަނަ ދުވަހުވެސް ވަޒީރު މަޖިލީހަށް ހާޒިރު ކުރުމަށް ރާއީ ވަނީ ސުވާލު ހުށަހަޅުއްވާފައެވެ.

މިނިސްޓަރ އިމްރާން މަޖިލީހަށް ހާޒިރު ކުރުމަށް މުދްއަތު ކައިރިވެފައި ވަނިކޮށް، މިމަސައްކަތް ގެޒެޓް ކުރުމާއި ގުޅިގެން ރާއީ ވިދާޅުވީ ތަރައްޤީގެ މިފަދަ މަސައްކަތަކީ ވަޒީރު ސިއްރު ސިއްރުން ކުރަންޖެހޭ ކަންތައްތަކެއް ނޫންކަމަށެވެ. ދާއިރާތަކުގައި ކުރެވޭ މަސައްކަތްތަކީ ދާއިރާގެ ރައްޔިތުންނާއި، ރައްޔިތުން އިންތިޚާބު ކޮށްފައިވާ މެމްބަރަށް އެނގިގެން ކުރަންޖެހޭ ކަންތައްތަކެއްކަމަށް އޭނާ ވަނީ ވިދާޅުވެފައެވެ.

ދައުލަތުން ކުރައްވަމުން ގެންދަވާ ދާއިރާތަކާއި ގުޅުންހުރި މަސައްކަތްތަކުގެ މައުލޫމާތު ދާއިރާގެ ރައްޔިތުންގެ މެމްބަރަށް އެނގިގެން ދިއުމަކީ ރައްޔިތުންނާއި އެކަމުގައި ކަން ވަމުންދާ ގޮޔް ސާފުކޮށް ދެވުމެވެ. އެއީ ވަޒީރު ސިއްރުން ކޮށް ނިންމާލަންޖެހޭ ކަންކަމެއް ނޫނެވެ.

– ރާއީ ވިދާޅުވިއެވެ.

Dhaulathun kuravamun gendhavaa dhaairaa thakaai gulhun huri masakkaiy thakuge mauloomaath dhaairaage rayyithunge member ah engigen dhiumakee rayyithuna ekamugai kan vamun dhaagoi saafu koh dhevumeve
Eyee vazeeru sirrun koh ninmaalan jehey kan kame nooneve.@ShimranAb @amausoom https://t.co/IbzONpEBEf pic.twitter.com/xlcR2pieuU

— Mohamed Raee / Makunudhoo Constituency (@Mraee12) September 18, 2021

ނޭކުރެންދޫގައި ޖަލެއް ހެދުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ރިޔާސީ ވައުދުފުޅަކަށް ވުމާއެކު އެޖަލު ވެގެންދާނީ އެތަނުގައި ރިހިބިލިޓޭޝަން ފަރުވާދެވި، ބައެއް ކަހަލަ ކުށްކޮށްފައިވާ ޤައިދީން އަލުން އަވަހަށް މުޖުތަމައަށް ނެރެވޭފަދަ އިންތިޒާމު ތަކާއެކު ހަދާ ޖަލަކަށް ވާނެކަމަށް ހޯމް މިނިސްޓަރ ވަނީ މީގެ ކުރިންވެސް އެކި ފަހަރު މަތީން ވިދާޅުވެފައެވެ.

ހދ. ނޭކުރަންދޫގައި ޖަލެއް ހެދުމަށް 2020ވަނަ އަހަރުގެ ބަޖެޓުންވަނީ 4.17 މިލިޔަން ރުފިޔާ ހިމަނާ ފައެވެ. ކޯވިޑް-19 އާއި ގުޅިގެން މަސައްކަތް ހުއްޓިފައިވީނަމަވެސް އަލުން އެމަސައްކަތް ފެށުމަށްޓަކައި މަސައްކަތްކުރެވެމުންދިޔަކަމަށް ހޯމް މިނިސްޓަރ އިމްރާން ކުރިންވަނީ ވިދާޅުވެފައެވެ.