މާލެ ސިޓީ ކައުންސިލުން ވެމްކޯއަށް ދައްކަން ޖެހޭ 30.5 މިލިއަން ރުފިޔާއަކީ މާލެ ސިޓީ ކައުންސިލާއި މިހާރު އޮތް ކައުންސިލުން ހަވާލުވިއިރުވެސް ނުދައްކާ އޮތް ފައިސާތަކެއްކަމަށް މާލެ ސިޓީ ކައުންސިލްގެ މޭޔަރު ޑރ.މުހައްމަދު މުއިއްޒު ވިދާޅުވެއްޖެއެވެ.
ވެމްކޯއިން އިއްޔެ ބޭއްވި ނޫސްވެރިންގެ ބައްދަލުވުމެއްގައި ޗީޕް ފައިނޭންޝަލް އޮފިސަރު ހަލީމް ވިދާޅުވީ ސިޓީ ކައުންސިލުން އެ ކުންފުންޏަށް ދައްކަން ޖެހޭ ތިރީސް މިލިއަން ރުފިޔާ އޮތީ ނުދައްކާ ކަމަށެވެ.
މިކަމާއި ގުޅިގެން މިރޭ ޑރ.މުއިއްޒު ކުރެއްވި ޓްވީޓުގައި ވިދާޅުވީ މިފައިސާއަކީ ކުރީގައި އޮތް ސިޓީ ކައުންސިލުން ނުދައްކާ އޮތް ފައިސާ ތަކެއްކަމަށެވެ. މިފައިސާ ދެއްކުމަށްޓަކައި، ބަޖެޓަށް އެދިފައިވާނެކަމަށް ޑރ.މުއިއްޒު ވިދާޅުވިއެވެ. މުއިއްޒު ވިދާޅުވީ މިފައިސާއަކީ މިހާރު އޮތް ކައުންސިލުން ހަވާލުވުމުގެ ކުރިންވެސް ނުދައްކާ އޮތް ފައިސާތަކެއްކަމަށެވެ.
ވެމްކޯއަށް ދައްކަންޖެހިފައިވާ 30 މިލިއަން ރުފިޔާއަކީ އަޅުގަނޑުމެން ކައުންސިލާއި 17 މެއި 2021 ގައި ޙަވާލުވިއިރުވެސް ދައްކަންޖެހިފައިވާ ފައިސާއެއް. އެ ފައިސާ ދައްކަން ބޭނުންވާ ބަޖެޓަށްވާނީ އެދިފައި.
– ޑރ.މުއިއްޒު ވިދާޅުވިއެވެ.
ކޯވިޑް-19އާ ގުޅިގެން، ވެމްކޯއިން ކުނި ނަގާ އުސޫލަށް ގެނައި ބަދަލުތައް ބްރާސްފަތި ދުވަހުގެ ރެއިން ފެށިގެން ވަނީ އުވާލައިފައެވެ. އެހެންކަމުން ދެން ކުނި ނަގާނީ ކުރިން ވެސް ނަގަމުން އައި ގޮތަށް ރަޖިސްޓްރީ ކޮށްފައިވާ ގެތަކުން ވަކި ވަކި އެޕާޓްމަންޓުތަކަށް ވެމްކޯގެ މުވައްޒަފުން ގޮސްގެންނެވެ.
މިގޮތަށް ނިންމާފައިވީނަމަވެސް މިއަދު ގިނަ ގޭގޭގެ ކައިރީގައި ކުނި ނުނަގާ ހުރުމުން މާލެ ސިޓީ ކައުންސިލުން ވަނީ ބައެއް ސަރަހައްދު ތަކުގައި ހުރި ކުނިތައް ނަގައިގެން ގޮސް ވެމްކޯގެ ކުނި އުކާލާ ސައިޓުގެ ގޭޓު ކުރިމައްޗަށް އަޅާލާފައެވެ. މިކަމުގައި މާލެ ސިޓީ ކައުންސިލުން ވަނީ ފަހުން މަޢާފަށް އެދިފައެވެ.
