މިއަދު މުޞްތަފާބެއާއި، ޝަކުވާ މިކުރަނީ، ދަތި އުދަގޫ ކަންތައްތަކެއް މުސްތަފާބޭގެ ފަރާތުން ރައްޔިތުންނަށް ކުރިމަތިވަމުންދާތީއެވެ. ރައްޔިތުންނަށް ވީ ވަޢުދުތައް ނުފުއްދާތީ ކުރަމުންދާ ޝަކުވާއެވެ. ގޭދޮށު މަސްފެކްޓަރީތަކަށްވީގޮތެއް ނޭގުމުގެ ޝަކުވާތަކެވެ. ޓާޝަރީ ހޮސްޕިޓަލް އަޅަންބުނެ އެކަން ނުކުރާތީ ކުރާ ޝަކުވާއެވެ. ބޭބީ ބޮކްސް ނުދޭތީ ކުރެވޭ ޝަކުވާއެވެ. އައިސްޕްލާންޓްތައް އަޅަމުންނުދާތީ ކުރާ ޝަކުވާއެވެ. މާލޭ، ވިލިގިނލި، ތިލަފުށި ގުޅީފަޅު ބުރިޖް ބިލާހަކަށްވެގެންދާތީ ކުރެވޭ ޝަކުވާއެވެ. ޖަޒީރާ ރާއްޖެއާއި، ރަށްވެހިފަތިހެއްގެ ވާހަކަތަކުން ރައްޔިތުންނަށް އެތައް އޮޅުންތަކެއް އަރައިގެންކުރެވޭ ޝަކުވާއެވެ.
މުސްތަފާބޭ އެވެ. އެޖެންޑާ 19 އަކީ މާއޮޅުންބޮޑު އެއްޗަކަށްވެއްޖެ ނޫންހެއްޔެވެ. އަޑިނޭގޭ އެޖެންޑާއަކީ ކޮންއެއްޗެއްކަން އަދިއަދަށްދާންދެންވެސް ދިވެހިރައްޔިތަކަށް ފަހުމެއްނުވިއެވެ. އެކަމުންވެސް އެތަކެއް ޝަކުވާތަކެއް ފެންމަތިވެގެންދިޔައީއެވެ. ގޮތްނޭގޭ މަރުތަކަށް އިންސާފު ހޯދައިދޭނެ ކަމަށް ބުނެ ވެފައިވާ ވަޢުދު ނުފުދިގެން ޢާއިލާތައް މާޔޫސްވެފައިވާތީ ކުރެވޭ ޝަކުވާތަކެވެ. މިހުރިހާ ޝަކުވާތައް މިކުރަނީ ދައުރުގެ ބޮޑުބައެއް ފާއިތުވުމާ ގާތްވެފައިވާ ދަނޑިވަޅެއްގައެވެ. މިކަންކަން ފުރިހަމަނުކޮށް ދެވަނަ ދައުރަކަށް ދޮންކުރާ ވާހަކަ އަޑުއަހަމެވެ. މިޝަކުވާތައް މިކުރަނީ މުސްތަފާބެއަށް ޓަކައި ރެއާ ދުވާލު ބުރަ މަސައްކަތްތަކެއްކުރި މީހެއްގެ ޙައިސިއްޔަތުންނެވެ.
މުސްތަފާބެއަށް ގައުމުގެ އެންމެމަތީ މަގާމް ހޯދައިދިނުމަށް އަހަރެންގެ ހިއްސާ ކުޑައެއްނުވާނެއެވެ. އެކިއެކި ޓީވީތަކުގައި އެތައް ވަގުތެއް ހޭދަކުރެވުނެވެ. އެތައްރަށެއްގެ އެތައް ސްޓޭޖެއްގައި އެތައްވާހަކަތަކެއް ދެކެވުނެވެ. މުސްތަފާބެއަށް ޓަކައެވެ. ރަތްދައްކަ އަވީގައި މީހާ ކަޅުމަދަނަށްވެގެން ދެފައި އެއްތާނުޖެހި ރަށްރަށަށް ދަތުރުކޮށް ކުރި ބުރަމަސައްކަތް އަދެއްހެން ހަނދާން އެބަހުއްޓެއެވެ. އަޖައިބުވެ އަންތަރީސްވާވަރުގެ ގުރުބާނީއެއްނޫންތޯއެވެ. ހައިރާންވާ ވަރުގެ ބޮޑު ގުރުބާނީއެކެވެ. މިކަންކަން މުސްތަފާބެ މިއަދު ހަނދާނެއްނެތެވެ. ކިހާދެރަތޯއެވެ.
އަހަރެމެން މުސްތަފާބެއަށް އިތުބާރު ކުރީމެވެ. އަދި އިޙްތިރާމްވެސް ކުރީމެވެ. ހެޔޮލަފާ ހެޔޮވިސްނޭ އިޚްލާޞްތެރި އެކުވެރިއެއްކަމަށް ދެކިގެންނެވެ. ގައުމުގެ އެންމެ މަތީ މަގާމަށް ވެރިއަކު ހޮވުމަކީ ކުޑަ ކަމެއްނޫނެވެ. އެއީ ވަރަށްބޮޑު ކަމެއްކަން މުސްތަފާބެއަށް ރަނގަޅަށް އެނގޭނެއެވެ. ކުޑަކަމެއްގެ ގޮތުގައި ސިކުޑީގެތަރާދުން ކިރައިގެން ނުވާވަރުގެ ބޮޑު މަސްއޫލިއްޔަތެކެވެ. ކޮންފަދަ ބޮޑު މަސްއޫލިއްޔަތެއްކަން މުސްތަފާބެއަށް އެނގޭ ހެއްޔެވެ. އެއްދުވަސްވަރެއްގައި މަޖީލީހުގައި އެކުގައި ވަރަށް ކައިރީގައި މުސްތަފާބެއާއެކު އުޅެވުނެވެ. ޗެމްބަރުގައާއި، ކުޑަދަށުގައި އެތައް ވާހަކަތަކެއް ހިއްސާކުރެވުނެވެ. އިތުބާރު އުފެދުނެވެ. އިޙްތިރާމާ ލޯބިވެސް އުފެދުނެވެ. މުސްތަފާބެއަކީ ދުރުވިސްނޭ ޚުލްގު ހެޔޮ ސިފަތަކެއް ހުރި ކަމަށް ބަލައިގެންނެވެ. އެކަން އެހެން އެވީ ތަޖްރިބާކާރު މެމްބަރަކަށްވީމައި ކަމަށްވެސް ވެދާނެއެވެ. މަޑުމައިތިރި ސިފަތަކެއް ހުރީމައި ކަމުގައިވެސް ބުނެވިދާނެއެވެ.
މުސްތަފާބެއާ ބެހޭގޮތުން އިވުނު އަޑުތަކަށާއި، އަދި އިވެމުންދިޔަ އަޑުތަކަށްވެސް ސަމާލުކަން ދެވުނީކަމަށް ބަލަމާ ހިގާށެވެ. ވިސްނުމާއި ފިކުރު ރަނގަޅު ކަމަށް ދެކިގެންނެވެ. ނަމަވެސް އިވޭ ކޮންމެ ލަވައަކަށް ބެރުޖަހަން އުޅުމަކީ ޒިންމާދާރުގޮތް ނޫންކަންވެސް އެނގި ހުރެގެންނެވެ. މުސްތަފާބޭގެ ކިބާގައި ހުރި މަޑުމައިތިރި ކަމުގެ ސިފަތަކަކީ އޭގެ ޒާތުގައި ތުނިތުނި ފަށަލައެއް އޭގައި ހުރި ސިފަތަކެއް ކަމަށް ބެލެވޭކަންނެތެވެ. ވަރަށް ވަރިބޯ ފަށަލައެކެވެ. ހައިރާންވެ އަންތަރީސްވެއްޖެއެވެ.
މުސްތަފާބޭގެ ހިތުގެ ޖަޒުބާތަކީ، ވޭނާއި ކެކުޅުން ހުރި، ބޭރު ފުށަށް އޭގެ އަސަރުތައް ފެންނަންނެތް، ނަމަވެސް ގަބޫލުކުރަންދަތި، އެތައް ކަންތައްތަކެއް ހިމެނިގެންވާ ޖަޒުބާތު ތަކެކެވެ. މުސްތަފާބޭގެ އެންމެ ނުރައްކާތެރި އެއްސިފައަކީ، ބަސް ނުބުނުމުގެ ސިފައެވެ. ޒިންމާ އަނެކާގެ ބޮލަށް ޖަހާލުމުގެ ސިފައެވެ. ނުވާ ކަންކަން ނުވެހުރީ ކުރީގެ ސަރުކާރުން އީއައިއޭ ހެދިގޮތުން ނުވަތަ ފަޅުކޮނެފައިވާގޮތުން ނުވަތަ އެއަޕޯޓް އެޅިގޮތުން ނުވަތަ ބްރިޖް އެޅިގޮތުން ކަން ރައްޔިތުންނަށް ވިސްނައިދޭން މުސްތަފާބެ މަސައްކަތް ކުރަމުންދަނީއެވެ. އެހެންކަމުން ތަރައްގީގެ މަސްރޫޢުތައް ލަސްވެގެންދަނީއެވެ. މިބާވަތުގެ ދެކޮޅުނުޖެހޭ ވާހަކަތަކަނުން އިސްތަށިތައް ކޮޅަށް ޖެހޭވަރުވެއެވެ. އަދިވެސް އެތައް ވާހަކަތަކަކާއި ބަހަނާތަކެކެވެ. ދައުލަތުގެ މާލީ އިދާރާތާއް ކުރިން ހިންގިގޮތް ކަމު ނުގޮސްގެން ދައްކަމުންދާ ބަހަނާތަކެވެ. ތަޢުލީމާއި، އަދި ޞިއްޙަތާބެހޭ ވުޒާރާގެ ކަންތައްތައް ބޮއްސުންލައިގެން މިދަނީ ކުރީގެ ސަރުކާރުން ކަންކުރިގޮތުން ކަމަށްބުނެ، ދައްކަމުންދާ ވާހަކަތަކެވެ.
އެއިރު އަހަރެންނަށް ވިސްނުނު ގޮތުގައި ހުރިހާވެސް އުއްމީދަކީ، ނުވަތަ ހުރިހާވެސް މީހަކީ އެކުވެރި މުސްތަފާބެއެވެ. އެއް ދުވަސްވަރެއްގައި މަޖިލީހުގައި އުޅެވުނީތިވެ ގާތްކަމާއި، އެކުވެރިކަމާއި، އަޚްވަންތަކަންވެސް އޮތުމާއެކު މި ގައުމަށް ރަނގަޅުގޮތްތައް ހޯދައި ދިނުމަށް މުސްތަފާބެއަކީ ވަރަށް ހަރުދަނާ ބޭފުޅެއްގެ ގޮތުގައި ބަލަންޖެހޭނެ ކަމުގައެވެ. ސަބަބުތަކެއް ނެތިއެއްނޫނެވެ. ގާނޫނުހަދާ މަޖިލީހުގައިި އެތައް އަހަރެއް ހޭދަކުރެވުމުން ރާއްޖޭގެ އާދަ ކާދަ އާއި، ރައްޔިތުންގެ ބޭނުންތަކާއި، ރާއްޖޭގެ ވެރިކަމުގެ ނިޒާމް ބައްޓަވެގެންދާގޮތް އެގޭނެ ކަމަށް ބެލެވުނު ބޮޑު ތަޖްރިބާކާރެއްގެ ގޮތުގައެވެ.
ހެޔޮވިސްނޭ ތަޖްރިބާކާރުން އަބަދުމެ މަސައްކަތްކުރާނީ، ރައްޔިތުންނަށް ލުއިފަސޭހަގޮތްތައް ތަނަވަސްކޮށްދީ ގައުމު އަޅުވެތި ނުކޮށް، ބައިނަލް އަގްވާމީ ދުނިޔޭގައި އެހެން ގައުމުތަކާއެކު އެއްމިންގަނޑެއްގައި ހިފެހެއްޓުމަށެވެ. މާތްވެގެންވާ އިސްލާމްދީނާއި ގައުމުގެ މިނިވަންކަމަށް ބުރޫއަރާފަދަ ކަންކަން މުސްތަފާބެ ނުކުރާނެ ކަމަށެވެ. ވަޒީފާގެ ހަމަހަމަ ފުރުޞަތުތައް ހޯދައިދީ، ތަފާތު ފިކުރުގެ މީހުންނާއެކުވެސް ގައުމު ބިނާކުރުމުގެ މަސައްކަތްކުރައްވާނެ ކަމުގެ ފޮނި އުއްމީދުގައި މުސްތަފާބެއަށް އިތުބާރުކުރެވުނެވެ. އެފަދަ އިތުބާރެއް ކުރެވުނީ، މުސްތަފާބޭގެ ފަރާތުން ގޯސް ކަންތައްތަކެއް ކުރިން ފެނިފައިނެތީކަމަށް ވެދާނެއެވެ. އަޅުގަނޑަކީވެސް އިންސާނެކެވެ. އަޅުގަނޑުގެ ވިސްނުމާ ފިކުރު މުސްތަފާބެއާމެދު ހުރީ އުއްމީދީ ނަޒަރަކުންނެވެ.
މި ގައުމުގެ އެންމެ ޝަރަފްވެރިމަގާމަށް ރައްޔިތުންގެ ބުރަމަސައްކަތުން މުސްތަފާބެގެނައީ، އަހަރެމެން އެންމެން އެކުގައިކުރި ބުރަމަސައްކަތުކަން މުސްތަފާބެ ހަނދާންކުރަންވާނެއެވެ. ގަދަ ކަނޑެއްގައި ދަތުރުކުރަމުންދިޔަ ދޯންޏެއްގެ ފަޅުވެރިންފަދައިން ދިއްލާހާ އައްވާއި، ވެހޭހާ ވާރޭގައި ވެވުނު ގުރުބާނީގެ ސަބަބުންކަން މުސްތަފާބެއަށް ރަނގަޅަށް އެގެންެވާނެއެވެ.
މުސްތަފާބެއަކީ އެކަނި ހުރި މީހެކެވެ. މިވަރުގެ މަގާމަކަށް ތިމާއެކަނި މަސައްކަތުން ނާދެވޭނެ ކަމާއި، ވެރިކަމަށް އާދެވުނީ އެތައްބައެއްގެ ދާ އޮހުރުވައިގެން ވީ ގުރުބާނީގެ ސަބަބުންކަން މުސްތަފާބެ ގަބޫލުކުރަންޖެހެއެވެ. މުސްތަފާބެއަށް ވެރިކަން ލިބުމުން މަގާމްތައް ބަހާލި ގޮތުން އަންތަރީސް ވެއްޖެއެވެ. ވެރިކަން ހޯދައިދިން މީހުންގެމަތިން ހަނދާނެއް ނުވިއެވެ. އެމީހުން މަގުމަތީކޮށްލީއެވެ. އެއްބަޔަކު ޓެކްސީ ކުރަނީއެވެ. އަނެއްބަޔަކު މުސްތަފާބޭ ކުރަމުންދާ ދެކޮޅުނުޖެހޭ ކަންތައް ތަކަށް ފާޑުކިޔައި ރައްދު ދެނީއެވެ. އަނެއްބަޔަކު ތިބީ ސިކުނޑި ގޯސްވެފައެވެ. ކިހާދެރަތޯއެވެ.
ވެރިކަމަށް ފާޑުކިޔާ ފަރާތްތަކާއި، ފާޑުކިޔާ ދޫތަކުން ފާޑުނުކިޔާ ވަރެއްވެސްނޫނެވެ. ސަބަބުތައް ބައިވަރެވެ. ފާޑުކިޔަނީވެސް މުސްތަފާބޭ ނިންމާ ނިންމުންތަކަށް ފާޑުކިޔާވަރުގެ ބޮޑެތި ބާގަނޑުތައް ސަރުކާރު ތެރެއިން ފެންނަމުންދާތީއެވެ. ޒިންމާދާރުކަމާއެކުގައި ކުރަންޖެހޭ ކަންކަން ކުރުމުގައި ފަހަތު ފަޔަށް ބުރަވާތީއެވެ. ބައެއް ކަންކަމުގައި މުސްތަފާބޭ ގަސްތުގައި ފަހަތުފަޔަށް ބުރަވަނިއެވެ. އަނެއްބައި ކަންކަމުގައި، އޮޅިގެން ފަހަތު ފަޔަށް ބުރަ ވެވެނީއެވެ. އަނެއްބައި ކަންކަން މުސްތަފާބޭ ނޭގޭ ކަމަށް ހަދަނީއެވެ. ބީރުކަންފަތެއް ދެނިއެވެ. އެހެންކަމުން މުސްތަފާބެއަށް ހެދޭގޯސްތައް ގިނަވަމުންދަނީއެވެ.
މާތްވެގެންވާ އިސްލާމްދީނާއި، މިނިވަންކަމާއި، ގައުމީ ވަންތަކަން މުސްތަފާބޭގެ ޢަމަލުކުރައްވާ ގޮތަކުން ނެތެމުންދަނީއެވެ. ދިވެހިރައްޔިތެއްގެ ހައިސިއްޔަތުން މުސްތަފާބެއަށް އަސަރެއްނުކުރޭތޯއެވެ. މުސްތަފާބޭ ދެރައެއްނުވޭތޯއެެވެ. ބަދަލު ދިނުމުގެ ނަމުގައި ބޮޑެތި ޢަދަދުތަކުން ޚަޒާނާގައި ހުރި އެއްޗެއް މުސްތަފާބޭގެ ބައެއް އެކުވެރިން ނަގާ ހުސްކޮށްލީއެވެ. މުސްތަފާބޭ ކަހާތަން ހިރުވާވެސް ނުލާ ތިހުންނަނީ ނޫން ހެއްޔެވެ.
މަޖިލީހުގައި މުސްތަފާބެ ހޭދަކުރި ދިގު މުއްދަތަކީ ސުމެއް ކަމުގައި ބަލަންވީހެއްޔެެވެ. އަސްލުގައިވެސް މުސްތަފާބޭސް ވިސްނުން ކޮށީހެއްވެ. ނުވަތަ ބާރެއް އަތައް އެރީމާ ވިސްނުން ބަލިކަށިވީހެއްޔެވެ. ނުވަތަ އިންޖީނުގެ ހޯސްޕަވަރ ދަށީ ހެއްޔެވެ. ނުވަތަ ބޮޑުބުރުގައި ކަމެއްނެތީ ހެއްޔެވެ.
މުސްތަފާބޭއެވެ. ދިވެހި ރައްޔިތުންނާއެކު ފިނިހަކަ ދުވެލީގައި ތިޔަ ދަތުރުކުރަނީ ހިކިފަސްތަނަކަށް އެރޭނެ ކަމަށް ބަލައިގެން ހެއްޔެވެ. ކޮށްފަ ނުކުރާނެ ކަމެއް ނޭގުނީމާ ކުރިން ތިޔަ މަގާމު ފުރުއްވި ބޭފުޅެއްގެ އިސްތަށިފުޅުގައި ބޮޑެތި އިލްޒާމްތައް އަޅުވަމުން އޭނާ ހުރަގޭގައި ބަންދުކޮށް، ދެއިރު ދެދަޅައަށް ކޯޓަށްގެންގޮސް ތިޔަ ގެންދަވަނީ މާދަމާއަކީ ނެތް ދުވަހެއްގެ ގޮތުގައި ހައްދަވައިގެންނޫންތޯއެވެ. މިކަމުން މުސްތަފާބެއަށް އޮތީ ކޮން އުފަލެއްތޯއެވެ. ކޮން ހިތްހަމަޖެހުމެއްތޯއެވެ. މުސްތަފާބެ ޢަމަލުކުރަމުންދާގޮތް ރައްޔިތުން އެދަނީ ގާތުން ބަލަމުންނެވެ. މުސްތަފާބެ ތިޔަގޮތަށް ކަންތައް ކުރަމުންދާނަމަ، ރައްޔިތުން ދެވަނަ ފަހަރަށް މުސްތަފާބެއާ މޫނު ހަމައެއްނުކުރާނެއެވެ. ނުވެސް ބަލާނެއެވެ. މުސްތަފާބޭގެ ޢަމަލުތައް ހުންނަގޮތުން ހީވާ ކަހަލައެވެ. މާދަމާއަކީ އަންނާނެ ދުވަހެއްނޫންނެވެ. ހަމަހިލާ އެހެނެއްނުވާނެއެވެ. މާދައަކީ އޮތްދުވަހެއްކަން މުސްތަފާބެއަށް ރައްޔިތުން ބުނެދޭނެއެވެ.
ރައްޔިތުން ބިކަވެ ހަނާވަނީއެވެ. ޒުވާނުން ކުނިގޮނޑު ހޮވަނީއެވެ. މާތްވެގެންވާ އިސްލާމްދީނަށް ފުރައްސާރަކުރާ މީހުން ގިނަވަނީއެވެ. ދިވެހިންގެ ދިވެހިވަންތަކަން ގެއްލެނީއެވެ. ގައުމިއްޔަތުގެ ފުރިހަމަކަން ނެތިދަނީއެވެ. މުސްތަފާބެ ތިޔަދުއްވާދޯނީގެ ހުންނާގާނުގައި ފެންހަރުލާހެނެއް ހިއެއްނުވެއެވެ. ކޮޅުފަސްކޮޅުގައި ތިޔަހުރީ މުސްތަފާބޭ އެކަނިމާ އެކަންޏެވެ. އޮޑި ދުއްވާގޮތާ ހިތްހަމަ ނުޖެހިގެން ގިނަ ބަޔަކު އެތިބީ އޮޑީގެ ދިރުބާން ކޮޅުގައިކަން މުސްތަފާބެއަށް ނޭގެނީތޯއެވެ. މުސްތަފާބެ ބުނެބަލާށެވެ. މިއީ އަޅެފަހެެ ދޮގެއްތޯއެވެ.
