ރައްޔިތުންގެ މަޖިލީހުގެ ޚާރިޖީ ގުޅުންތަކުގެ ކޮމިޓީން އިންޑިއާއަށް ވަޑައިގަންނަވަން ނިންމަވައިފިއެވެ.
ޚާރިޖީ ގުޅުންތަކުގެ ކޮމިޓީން އިންޑިއާއަށް ވަޑައިގަންނަވަނީ އިންޑިއަން ހައިކޮމިޝަންގެ ދައުވަތަކަށެވެ. މި ދަތުރުގައި އެ ކޮމިޓީގައި ހިމެނިވަޑައިގަންނަވާ އިދިކޮޅު މެންބަރުންވެސް ބައިވެރިވެވަޑައިގަންނަވަނެއެވެ.
އެކޮމިޓީން މިއަދު ބޭއްވި ބައްދަލުވުމުގައި ކޮމިޓީގެ މުގައްރިރު މަރަދޫ ދާއިރާގެ މެންބަރު އިބްރާހީމް ޝަރީފް ވިދާޅުވީ، އިންޑިއާ ސަރުކާރައި ހައިކޮމިޝަނުން ކޮމިޓީއަށް ރަސްމީ ދަތުރެއްގެ ދައުވަތު ދެއްވާފައިވާކަމަށެވެ. އެ ދަތުރުގެ ހުރިހާ ޚަރަދެއް ކުރާނީ އިންޑިާއިން ކަމަށާއި، މި ދަތުރުގައި ކޮމިޓީގެ މެންބަރުންގެ އިތުރުން އިދާރީ މުވައްޒަފުންވެސް ހިމެނޭކަމަށެވެ.
ޝަރީފް ވިދާޅުވީ މިދަތުރު ކުރުމަށް ހަމަޖެހިފައިވަނީ މަޖިލިސް ޗުއްޓީއަށް ދިއުމުން މި ޑިސެމްބަރުގައެވެ. އަދި ކޮމިޓީގެ މެންބަރުންނާއި މަޝްވަރާކުރުމަށްފަހު ތާރީޚެއް ކަނޑައެޅެނެކަމަށްވެސް ޝަރީފް ވިދާޅުވިއެވެ. އޭނާ ވަނީ މިދަތުރުގައި އިދިކޮޅު މެންބަރުންވެސް ބައިވެރިވެވަޑައިގަތުމަކީ އިންޑިއާގެ އެދުމެއްކަމަށްވެސް ވިދާޅުވެފައެވެ.
އިދިކޮޅު މެންބަރުންވެސް ބައިވެރިވެވަޑައިގަތުމަކީ އިންޑިއާ ސަރުކާރުގެ ވަރަށް ބޮޑު އެދުމެއް. އެއީ ގައުމެއްގެ ޚާރިޖީ ކަންތައްތައް އޮންނައިރު، އެގައުމެއްގެ މުހިންމު ސިޔާސީ ޕާޓީތަކާ ދޭތެރޭގައި އަނެއްކާ ގައުމުގެ ސަރުކާރުތަކުން އަބަދުވެސް އެއް އުސޫލުކުން ހަމައަކުން ކަންކުރުމަކީ އާންމުކޮށް ޑިޕްލޮމެޓިކް ރިލޭޝަންސް ގާއިމްކޮށްފަ ކުރިއަށް ގެންދާ ގޮތްކަމަށްވާތީ.
– އިބްރާހީމް ޝަރީފް
ޚާރިޖީ ގުޅުންތަކިުގެ ކޮމިޓީގައި އިދިކޮޅުގެ ދެ މެންބަރަކު އިންނަވައެވެ. އެއީ ޕީއެންސީގެ ނާއިބު ރައީސް އަދި މާވަށު ދާއިރާގެ މެންބަރު މުޙައްމަދު ސަޢީދާއި، ޕީޕީއެމްގެ ނާއިބު ރައީސް އަދި ތ.ގުރައިދޫ ދާއިރާގެ މެންބަރު މުޙައްމަދު ޣައްސާން މައުމޫނެވެ.
ކޮމިޓީގެ ބައްދަލުވުމުގައި ބައިވެރިވެވަޑައިގެންނެވި ޣައްސާން ވަނީ އެޕާޓީގެ ލީޑާޝިޕާ ވާހަކަ ދައްކައިގެން ގޮތެއް ނިންމަވާނެކަމަށް ވިދާޅުވެފައެވެ.
