ހިޔާ ފްލެޓް ލިބުނު މީހުންގެ ތެރެއިން ސޮއިނުކޮށްތިބި މީހުން ހިޔާގެ އެއްބަސްވުމުގައި ދެން ސޮއިކުރުން އޮންނާނީ ހުލުމާލެ ސެންޓްރަލް މޯލްގައިކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން ބުނެފިއެވެ. މިގޮތުން ހިޔާގެ އެއްބަސްވުމުގައި ސޮއިކުރުން އޮންނާނީސެންޓްރަލް މޯލްގެ ދެވަނަ ފަންގިފިލާގައިކަމަށްވެސް އެޗްޑީސީން ބުންޏެވެ.
ފްލެޓް ލިބުނު މީހުންގެ ތެރެއިން މިހާތަނަށް %85 މީހުން ސޮއިކޮށްފައިވާއިރު %15 މީހުން ސޮއިކޮށްފައިނުވާކަމަށް އެޗްޑީސީން ދާދިފަހުން ބުނެފައިވެއެވެ.
އެޗްޑީސީގެ މެނޭޖިންގ ޑިރެކްޓަރ ސުހައިލް އަހުމަދު ވިދާޅުވީ މި އެއްބަސްވުންތަކުގައި މިހާރު 5،483 މީހުން ސޮއި ކޮށްފައިވާއިރު، ސޮއި ނުކޮށް ބާކީ ތިބީ 200 އެއްހާ އޯނަރުން ކަމުގައެވެ. މި އެއްބަސްވުންތަކުގައި ސޮއި ކުރަންޖެހޭ 5،596 މީހުން އެބަތިއްބެވެ.
ސުހައިލް ވިދާޅުވެފައިވަނީ، ފްލެޓް އެއްބަސްވުންތަކުގައި މިހާތަނަށް ސޮއި ނުކުރާމީހުން އެއްބަސްވުންތަކުގައި ސޮއިކުރުމަށް ވަކި މުއްދަތެއް ދޭން ހަމަޖެހިފައިވާ ކަމަށެވެ. އަދި ހިޔާ ފްލެޓް ލިބުނު މީހުންގެ ތެރެއިން ފްލެޓް ބަދަލުކުރުމަށް ހުޅުވާލެވުނު ފުރުސަތުގައި ފްލެޓް ބަދަލުކުރުމަށް 400 މިހަކު އެދިފައިވާ ކަމަށާއި، އެމީހުންގެ އެއްބަސްވުންތަކުގައި ސޮއިކުރުން ލަސްކޮށްފައިވާ ކަމަށްވެސް ސުހައިލް ވިދާޅުވެފައި ވެއެވެ.
މީގެއިތުރުން ސުހައިލް ވިދާޅުވީ، ހިޔާ ފްލެޓް ލިބުނު ފަރާތްތަކުގެ ތެރެއިން 250 މީހަކު ވިނަރެސް ފްލެޓަށް ބަދަލުވުމަށް ނަންނޯޓު ކޮށްފައިވާ ކަމުގައެވެ.
ހިޔާ ފްލެޓްތަކަށް މިހާރު ކަރަންޓޫ ދޫކުރެވިފައިވާތީ، ފްލެޓް ލިބުނު ގިނަ އަދަދެއްގެ ބަޔަކު މިހަރުދަނީ ފްލެޓްތަކަށް ބަދަލުވަމުންނެވެ. މިގޮތުން ބައެއް ފްލެޓްތަކުގެ ފިނިޝިންގެ މަސައްކަތް މިހާރު ނިމިފައިވާއިރު، ގިނަ ފްލެޓްތަކުގެ ފިނިޝިންގެ މަސައްކަތް މިހާރުދަނީ ކުރިޔަށެވެ.
