ޖަލުން ފިލި ދެ ހަގުރާމަވެރިއަކު އަލުން ހައްޔަރު ކޮށްފިކަމަށް އިސްރާއީލުން ބުނެފި

ފާއިތުވެދިޔަ ހަފްތާގައި، އިސްރާއީލުގެ ސަލާމަތީ ފިޔަވަޅުތައް ވަރުގަދަ ޖަލަކުން ފިލާފައިވާ، ފަސްތީނުގެ 6 މުޖާހިދުންގެ ތެރެއިން 2 ހަގުރާމަވެރިއަކު އަލުން ހައްޔަރު ކޮށްފައިވާ ކަމަށް އެގައުމުން ބުނެފިއެވެ.

ހުކުރުދުވަހު އާންމު ކޮށްފައިވާ ބަޔާނެއްގައި އިސްރާއީލުގެ އަސްކަރިއްޔާގެ ތަރުޖަމާނަކު ބުނެފައިވަނީ، ދެ ހަގުރާމަވެރިން ހައްޔަރު ކޮށްފައިވަނީ، ނަޒަރެތުގެ ކައިރީގައިވާ ކުރިސްޓިއަނުންގެ ދީނީ ބިނާއެއް ކަމުގައިވާ މައުންޓް ޕްރެސިޕީސް ކައިރިން ކަމުގައެވެ.

އިސްރާއިލްގެ މީޑިއާތަކުން ރިޕޯޓު ކޮށްފައިވާ ގޮތުގައި، 6 މީހުންގެ ތެރެއިން އަލުން ހައްޔަރު ކޮށްފައިވާ 2 ހަގުރާމަވެރިންނަކީ އިސްލާމިކް ޖިހާދަށް ނިސްބަތްވާ ދެ ހަގުރާމަވެރިންނެވެ.

އިސްރާއީލުން މި ހަގުރާމަވެރިންގެ ވަނަވަރު ހާމަ ކޮށްފައިނުވި ނަމަވެސް، ސޯޝަލް މީޑިއާގައި ދައުރުވަމުންދާ ބައެއް ވީޑިއޯތަކުންވަނީ، އިސްރާއީލުގެ ޕޮލިސް އޮފިސަރުން ދެ ހަގުރާމަވެރިންވެސް، ޕޮލިހުންގެ ދެ އުޅަދަކަށް އަރުވަނިކޮށް ފެނިފައެވެ.

އިސްރާއީލުގައި ހުރި ސަލާމަތީ ފިޔަވަޅުތައް އެންމެ ވަރުގަދަ އެއް ޖަލުން މުޖާހިދުން ފިލާފައިވަނީ ރޭގަޑުގެ ވަގުތެއްގައި ކަމަށް އިސްރާއީލުގެ އަސްކަރިއްޔާއިން ވަނީ ބުނެފައެވެ. އިސްރާއީލުގެ އަސްކަރިއްޔާގެ ރޭޑިއޯއިން ބުނެފައިވާ ގޮތުގައި، މުޖާހިދުން ފިލާފައިވަނީ ޖަލުންގެ އެތެއިން ކޮނެގެން ހަދާފައިވާ ޓަނަލެއް ބޭނުން ކޮށްގެންނެވެ. އަދި ބުނެފައިވަނީ، މި މުޖާހިދުން ފިލާފައިވަނީ، ބޭރުގެ ފަރާތްތަކުގެ އެހީތެރިކަން ލިބިގެންކަމީ ކަށަވަރުވެ ޔަގީންވާ ކަމެއްކަމުގައެވެ.

ސަލާމަތީ ފިޔަވަޅުތައް ވަރުގަދަ ގިލްބޯ ޖަލުން މުޖާހިދުން ފިލާފައިވަނީ، އެމީހުން ހައްޔަރު ކޮށްފައިތިބި ސެލްގައިހުރި ސިންކެއްގެ އަޑީގައި ހުރި ޓަނެލްއެގެ ތެރެއިން ލާފައެވެ.

ޖަލުން ފިލާފައިވާ 6 މީހުންގެ ތެރެއިން 4 މީހުންވެސް އަދި އިސްރާއީލުގެ ފުލުހުން ދަނީ ހޯދަމުންނެވެ.

ސަލާމަތީ ފިޔަވަޅުތައް ވަރުގަދަ މިޖަލުން ފިލާފައިވާ، ފަލަސްތީނުގެ މުޖާހިދުންނަށް ތާއީދުކޮށް، ހިފާފައިވާ ހުޅަގު އައްސޭރިއާއި ޖެރޫސެމްގައި ފަލަސްތީނުގެ ރައްޔިތުން ހުކުރު ދުވަހު ވަނީ މުޒާހިރާ ކޮށްފައެވެ. އަދި ހުކުރުދުވަސް ފަލަސްތީނުގެ ރައްޔިތުން ފާޙަގަ ކުރީ މި 6 މުޖާހިދުންނަށް ތާއީދު ކުރުމަށް ޚާއްސަކުރެވުނު ދުވަހެއްގެ ގޮތުގައެވެ.

ބައެއް މީޑިއާތަކުން ހާމަ ކޮށްފައިވާ ގޮތުގައި، ހައްޔަރު ކޮށްފައިވާ 2 މީހުންގެތެރެއިން އެއް ހަހުރާމަވެރިއަކީ، 1996 ވަނަ އަހަރުން ފެށިގެން އިސްރާއީލުން ޖަލަށް ލާފައިވާ ހަގުރާމަވެރި އެކެވެ. އަދި އޭނާއަކީ ޖަލުން ފިލި 6 ހަގުރާމަވެރިންގެ ތެރެއިން އެންމެ އިސް މީހާ ކަމަށްވެސް ބައެއް މީޑިއާތަކުން ރިޕޯޓު ކޮށްފައި ވެއެވެ.

މި 6 ހަގުރާމަވެރިންނަކީވެސް، އިސްރާއިލަށް ހަމަލާ ދިނުމުގެ ދައުވާތައް ސާބިތުވެ، ނުވަތަ ތުހުމަތުގައި ހައްޔަރު ކުރެވިފައިވާ ހަގުރާމަވެރިންނެވެ.

ހަގުރާމަވެރިން އިސްރާއީލުގެ ޖަލުން މިނިވަން ވިފަހުން، މި ހަގުރާމަވެރިންގެ އާއިލާތަކުގެ އެތަކެއް މެމްބަރުންނެއް އިސްރާއީލުގެ އަސްކަރިއްޔާއިންވަނީ ހައްޔަރު ކޮށްފައެވެ. އަދި މި ހަގުރާމަވެރިން ހޯދުމަށް އިސްރާއީލުގެ އަސްކަރިއްޔާއިން ކުރަމުންދާ މަސައްކަތުގެ ބައެއްގެ ގޮތުން، ހުކުރު ދުވަހު ހެނދުނު ވަނީ ހަގުރާމަވެރިންގެ އާއިލާތަކަށް ނިސްބަތްވާ އިތުރު 3 މީހަކު ހައްޔަރު ކޮށްފައެވެ.

އިސްލާމިކް ޖިހާދުން ނެރުނު ބަޔާނެއްގައި ބުނެފައިވަނީ، މުޖާހިދުން ޖަލުން ފިލުމަކީ، ޝުކުރު ޙައްގު ކަމެއްކަމަށާއި އަދި މިއީ “އިސްރާއީލުގެ އަސްކަރިއްޔާއަށާއި އަދި މުޅި އިސްރާއީލުގެ ސިސްޓަމަށްވެސް ދެވުނު ރަގަޅު ފިލާވަޅެއް” ކަމުގައެވެ.

އިސްރާއީލުން ބުނެފައިވަނީ، އެގައުމުގެ އިންޓެލިޖެންސްއިން އެހީތެރިވެދީގެން، ޖަލުން ފިލި މުޖާހިދުން ހޯދުމަށްޓަކާ މިހާރު ވަރަށް ބޮޑު ޕޮލިސް އޮޕަރޭޝަނެއް ކުރިޔަށް ދާކަމުގައެވެ. އަދި އިސްރާއީލުގެ ޕޮލިހުން ބުނެފައިވާ ގޮތުގައި، މި އޮޕަރޭޝަންގައި ޑްރޯންއާއި ހެލިކޮޕްޓަރުތައްވެސް ދަނީ ބޭނުން ކުރެވެމުންނެވެ.