ޖަލުހުކުމެއް ތަންފީޒު ކުރައްވަމުންދާ ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް، ގޭބަންދަށް ބަދަލުކުރިއިރު ވެފައިވާ އެއްވެސް ޝަރުތަކާއި ޚިލާފް ނުވާކަމަށް އެމަނިކުފާނުގެ ޤާނޫނީ ވަކީލުން ވިދާޅުވެއްޖެއެވެ.
ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމް މިއަދު ޢަމަލުކުރެއްވީ ގޭ ބަންދުކޮށްފައިވާ އިޤްރާރާ ޚިލާފަށް ކަމަށާއި އެހެންކަމުން މި މައްސަލަ ބަލާ، ފިޔަވަޅު އަޅާނެ ކަމަށް ކަރެކްޝަންސްއިން ވަނީ ބުނެފައެވެ. ރައީސް ޔާމީން ވަނީ މިއަދު އިދިކޮޅުން ބޭއްވި މުޒާހަރާގައި އެއްވި މީހުން އެމަނިކުފާނުގެ ގެކޮޅު ކައިރިއަށް ޖަމާވުމުން ކުޑަދޮރު ހުުޅުވައި، އެއްވި މީހުންނަށް ހަނާ އަޅައި، ހިތްވަރު ދެއްވާފައެވެ.
ރައީސް ޔާމީން އެއްބަސްވުމާއި ޚިލާފްވެފައިވާކަމަށް ކަރެކްޝަނުން ބުނުމާއި ގުޅިގެން އެމަނިކުފާނުގެ ޤާނޫނީ ވަކީލުންގެ ޓީމުގައި ހިމެނި ވަޑައި ގަންނަވާ ޢަބްދުﷲ ޝިޔާޒު ވިދާޅުވީ ރައީސް ޔާމީން ގޭބަންދަށް ބަދަލުކުރިއިރު ކަރެކްޝަނުން ވެފައިވާ އެއްބަސްވުމާއި، އަދި ކޮށްފައިވާ އެއްވެސް ޝަރުތަކާއި ޚިލާފް ނުވާކެމަަށެވެ. އަދި ޤާނޫނާއި ޤަވާއިދާއި ޚިލާފް އެއްވެސް ކަމެއް އެމަނިކުފާނު ކުރައްވާފައި ނުވާކަމަށެވެ.
މޯލްޑިވްސް ކަރެކްޝަނަލް ސާރވިސް އިން 2021 އޭޕްރީލް 29 ވަނަ ދުވަހުގެ ރޭ 19:40ގައި ރައީސްޔާމީން ގޭބަންދަށް ބަދަލު ކުރެއްވިއިރު ކުރައްވާފައިވާ އެއްވެސް ޝަރުތަކާ ރައީސްޔާމީން ޚިލާފްވެފައެއް ނުވެއެވެ. އަދި ޤާނޫނާ ޤަވާޢިދާ ޚިލާފަށް އެއްވެސް ކަމެއް ނުކުރައްވައެވެ.
– ޝިޔާޒް ވިދާޅުވިއެވެ.
ރައީސް ޔާމީންއާއި މެދު ފިޔަވަޅު އަޅާނެކަމަށް ކަރެކްޝަނުން ބުނުމާއި ގުޅިގެން ރައީސް ޔާމީންގެ ޤާނޫނީ ޓީމުގައި ހިމެނި ވަޑައިގަންނަވާ ޑރ. މުހައްމަދު ޖަމީލު އަހްމަދު ވިދާޅުވެފައިވަނީ ރައީސް ޔާމީން ސިޔާސީ އެއްވެސް ހަރަކާތެއްގައި ބައިވެެރިވެވަޑައިގެންފައި ނުވާ ކަމަށެވެ. އަދި ގައިދީން ގޭބަންދަށް ބަދަލުކުރާއިރު ވެވޭ އިގްރާރާއި ވެސް ހިލާފު ނުވާ ކަމަށެވެ.
ރައީސް ޔާމީން ގޭ ބަންދަށް ބަދަލުކުރައްވާފައިވަނީ ރާއްޖޭގެ ޖަލުތަކުގައި ކޯވިޑް-19ގެ ނުރައްކާ އިތުރުވުމާ ގުޅިގެން، ހައި ރިސްކު ގައިދީން ގޭ ބަންދަށް ބަދަލުކުރި އުސޫލުގެ ތެރެއިންނެވެ.
ކުރީގެ ރައީސް ޔާމީންގެ މައްޗަށް މަނީ ލޯންޑަރިން ކުށް ސާބިތުވެ ފަސް މިލިއަން ޑޮލަރުން ޖޫރިމަނާކޮށް ފަސް އަހަރަށް ޖަލަށްލުމަށް ކްރިމިނަލް ކޯޓުން ހުކުމްކުރީ 2019ވަނަ އަހަރުގެ ނޮވެމްބަރު މަހުގެ 28 ވަނަދުވަހުއެވެ. ރައީސް ޔާމީން 5 އަހަރަށް ޖަލަށް ލައި ފަސް މިލިއަން ޑޮލަރުން ޖޫރިމަނާކުރީ ގއ. ވޮޑަމުލާ ދޫކޮށްގެން ދައުލަތަށް ލިބެން ޖެހޭ އެއް މިލިއަން ޑޮލަރު ލޯންޑާ ކުރިކަން ކްރިމިނަލް ކޯޓުގައި ސާބިތު ވުމުންނެވެ. ކްރިމިނަލް ކޯޓުން ކުރި ހުކުން ހައިކޯޓުގައި އިސްތިއުނާފްކުރުމުން، ދަށުކޯޓުގެ ޙުކުމް ދަމަހައްޓަން ހައިކޯޓުން ނިންމާފައިވަނީ މިދިޔަ ޖެނުއަރީ މަހުގެ 21ވަނަ ދުވަހުއެވެ.
މީގެ އިތުރުން ރ.ފުއްގިރި ތަރައްގީކުރަން ކުއްޔަށް ދޫކުރުމުގެ މުޢާމަލާތުގައި މަޤާމުގެ ނުފޫޒު ބޭނުން ކުރައްވައި 1.1 މިލިއަން ޑޮލަރު ހޯއްދަވައި ސަން ކޮންސްޓްރަކްޝަން އެންޑް އިންޖިނިއަރިން ޕްރައިވެޓް ލިމިޓެޑާއި ސަން އިންވެސްޓްމެންޓް ޕްރައިވެޓް ލިމިޓެޑް މެދުވެރިކޮށް އެ ފައިސާ ލޯންޑަކުރުމަށް ފަށަލަކޮށްފައިވާ މައްސަލައިގަވެސް މަނީ ލޯންޑްރިންގއާ ރިޝްވަތު ޤަބޫލުކުރުމުގެ ކުށުގެ ދައުވާ ރައީސް ޔާމީންގެ މައްޗަށްވަނީ އުފުލާފައެވެ.
