އަންނަ ނޮވެމްބަރު މަހުގެ 3 ވަނަ ދުވަހު، އެމެރިކާގެ ރައްޔިތުން އެގައުމުގެ ރިޔާސި އިންތިޚާބުގައި ވޯޓުލާނެއެވެ. އަދި އެގައުމުގެ ރައީސްކަމުގެ މަގާމު ކުރިޔަށް އޮތް 4 އަހަރަށް އަދާކުރައްވާނެ ރައީސަކު އިންތިޚާބު ކުރާނެއެވެ.

މި އިންތިޚާބުގައި މިހާރުގެ ރައީސް އަދި ރިޕަބްލިކަން ޕާޓީގެ ކެޑިޑޭޓު ޑޮނަލްޑް ޓްރަމްޕާއި ވާދަކުރައްވަނީ، އެމެރިކާގެ ކުރީގެ ރައީސް ބަރަކް އޮބާމާގެ ނާއިބް ރައީސްގެ ގޮތުގައި އެންމެންވެސް ދަންނަ، ޑިމޮކްރަޓިކް ޕާޓީގެ ކެޑިޑޭޓް ޖޯ ބައިޑްންއެވެ. ޑޮނަލްޑް ޓްރަމްޕަކީ އެމެރިކާގެ ސިޔާސީ މައިދާނުގައި ތަޖުރިބާ މަދު ބޭފުޅަކަށްވިޔަސް، އޭނާއަކީ މުއްސަދި މަހުޖަނެކެވެ. 4 އަހަރު ރައީސްކަން ކުރައްވާ، ތަޖްރިބާތަކެއްވެސް މިހާރުވަނީ ހާސިލް ކުރައްވާފައެވެ. އެހެންނަމަވެސް، އެއާއި ޚިލާފަށް، ޖޯބައިޑަންއަކީ 1970 އިން ފެށިގެން އެމެރިކާގެ ސިޔާސީ މަސްރަހުގައި ހަރަކާތްތެރިވަމުން އަންނަ، ނުހަނު ތަޖުރިބާ ހުރި ސިޔާސީ ބޭފުޅެކެވެ.

ރިޔާސީ އިންތިޚާބު ގާތްވަމުން އަންނައިރު، އެމެރިކާގައި ކޮންމެ އިންތިޚާބެއްގައިވެސް، ޚިޔާލުން ހޯދުންތަކުން ވޯޓުލާމީހުންގެ އިހުސާސްތައް ދެނެގަތުމަކީ އެމެރިކާގައި އެތައްބައެއްގެ ނަޒަރު ހުއްޓޭ ދިމާލެކެވެ. އަދި ގިނަފަހަރަށް ޚިޔާލު ހޯދުންތަކުން ދައްކާގޮތަށް ބައެއް ސަބަބުތައް މެދުވެރިވެގެން ނަތީޖާ ނުކުމެގެން ނުދިޔަ ކަމުގައިވި ނަމަވެސް، އިންތިޚާބުގެ ޖުމްލަ މިސްރާބު ހުންނަގޮތް ދެނެގަނެވެއެވެ.

ތިރީގައި މިގެނެސްދެނީ، މިއިންތިޚާބުގެ އެންމެ ފަހު ހަފްތާއަށް އެޅިގެން ގޮސްފައިވާއިރު، ޚިޔާލު ހޯދުންތަކުން ބުނެދޭ ވާހަކަތަކާއި ނުބުނެދޭ ވާހަކަތަކެވެ.

ވޯޓުލާ މުޅި އާބާދީއަށް ބަރޯސާކޮށް ނެގޭ ޚިޔާލު ހޯދުންތަކުން ކުރީގަ އުޅެނީ ބައިޑަން

ވޯޓުލާ އަބާދީގެ މެދުގައި ނެގޭ ސާވޭތަކުން ދައްކާ ޖުމްލަ ނަތީޖާއިން އިންތިޚާބުގެ ޕޮޕިއުލަރ (އެންމެ ގިނަ މީހުން ވޯޓު ލާ)ކެޑިޑޭޓަކީ ކާކުކަން ވަރަށް ރަގަޅަށް ސާފުވެގެން ދެއެވެ. އެއީ ވޯޓު ލާ މީހުންގެ ތެރެއިން އެންމެ ގިނަ ވޯޓު ކާމިޔާބު ކުރާ ކެޑިޑޭޓެވެ. އެހެން ނަމަވެސް އެމެރިކާގެ ވޯޓިން ސިސްޓަމް ހަމަޖެހިފަ އޮންނަނީ އިލެކްޓޯރަލް ވޯޓުގެ މައްޗަށް ކަމަށްވާއިރު، މުޅި ގައުމުން އެންމެ ގިނަ މީހުން ވޯޓުލާ މީހާއަށް އިންތިޚާބު ކާމިޔާބު ވުގެން ދިއުމުގެ ބަދަލުގައި، ޕޮޕިއުލާ ވޯޓުން ގިނަ ސްޓޭޓްތައް ކާމިޔާބު ކުރާ ކެޑިޑޭޓަކަށް ރިޔާސީ އިންތިޚާބު ކާމިޔާބު ކުރުމުގެ ފުރުސަތު ބޮޑުވެއެވެ. ސަބަބަކީ، އެކި ސްޓޭޓްތަކަށް އެކިމިންވަރަށް އިލެކްޓޯރަލް ވޯޓު ކަޑައާފައި ވާއިރު، ސްޓޭޓްގެ ޕޮޕިއުލާ ވޯޓު ކާމިޔާބު ކުރާ ކެޑިޑޭޓަކަށް އެ ސްޓޭޓެއްގެ ހުރިހާ އިލެކްޓޯރަލް ވޯޓެއް ލިބޭ ގޮތަށް ހަމަޖެހފައި އޮންނާތީއެވެ.

2016 ވަނަ އަހަރު އެމރިކާގައި ބޭއްވުނު ރިޔާސި އިންތިޚާބުގައި ޓްރަމްޕާއި ދެކޮޅަށް ނިކުމެވަޑައިގެންނެވި ހިލަރީ ކުލިންޓަން ޓްރަމްޕަށްވުރެ އިތުރަށް 2 މިލިއަން ވޯޓު ހޯއްދެވިއެވެ. އެހެންނަމަވެސް، ގިނަ ސްޓޭޓްތައް ޕޮޕިއުލާ ވޯޓުން ކާމިޔާބުކޮށް އިންތިޚާބު ކާމިޔާބު ކުރެއްވީ ޑޮނާލްޑް ޓްރަމްޕެވެ.

މިހާތަނަށް އައިއިރު، ފާއިތުވެދިޔަ އެއް އަހަރުތެރޭގައި ނެގުނު ގިނަ ޚިޔާލު ހޯދުންތަކުން ކުރީގަ އުޅޭކަމަށް ދައްކަނީ ޑިމޮކްރަޓިގެ ޕާޓީގެ ފަރާތުން އިންތިޚާބުގައި ވާއްދަކުރައްވާ ކުރީގެ ނައިބު ރައީސް ޖޯ ބައިޑްންއެވެ. މިހުރިހާ ޚިޔާލު ހޯދުންތަކުންވެސް ދައްކާގޮތުގައި، ޖޯ ބައިޑަން %50 އަށްވުރެ މަތީ އަޢުލަބިއްޔަތެއް ހޯއްދަވާނެއެވެ. އަދި ބައެއް ފަހަރު ޖޯ ބައިޑްން ކުރީގައި އުޅެނީ  %10 އަށްވުރެވެސް މަތީ ފަރަގެއްގައެވެ.

ނަތީޖާ ނިންމާނީ ކޮން ސްޓޭޓް ތަކަކުން؟

2016 ވަނަ އަހަރުގެ ރިޔާސީ އިންތިޚާބުގެ ނަތީޖާއިން ހާމަވެގެންދިޔަ އެއް ކަމަކީ، ކެޑިޑޭޓަކަށް ލިބޭ ޖުމްލަ ވޯޓުގެ އަދަދަށްވުރެ މުހިންމީ ކޮންމެ ކެޑިޑޭޓަކަށްވެސް ލިބިފައިވާ ވޯޓު ލިބިގެން ދިޔަ ސްޓޭޓްތައް ބެލުމެވެ. އެމެރިކާގެ ރިޔާސީ އިންތިޚާބުތަކުގެ ތާރީޚަށް ބަލާއިރު، ގިނަ ސްޓޭޓްތަކުން ވޯޓުލަނީ އަބަދުވެސް އެއް އަމާޒަކަށެވެ. މާނައަކީ ޑިމޮކްރަޓުންނާއި ރިޕަބްލިކަނުންނަށް ޒަމާނުއްސުރެ ތާއީދުކުރާ ސްޓޭޓްތަކުން އެޕާޓީތަކުން ނަތީޖާ ނެރެއެވެ. ނަތީޖާއެއްގެ ގޮތުން، ކޮންމެ އިންތިޚާބެއްގައިވެސް ނަތީޖާ ބަދަލުކޮށް އިންތިޚާބު ކާމިޔާބު ކުރުމުގެ ފުރުސަތު އޮންނަނީ މަދު ސްޓޭޓްތަކަކުން ނެރެވޭ ނަތީޖާތަކެއްގެ މައްޗަށެވެ.

ތިރީގައި މިވާ ޗާޓުން މިފެންނަ ބޮޑެތި ގޮޅިތަކަކީ ގިނަ އިލެކްޓޯރަލް ވޯޓުތައް އެކުލެވޭ ސިޓީތައް ރަމްޒު ކޮށްދޭ ގޮޅިތަކެވެ.

އެންމެ ވާދަވެރިކަން ބޮޑު ސްޓޭޓްތަކުގައި ކުރީގައި އުޅެނީ ކޮން ކެޑިޑޭޓެއް؟

މިހާރު ފެންނަން ހުރި ޚިޔާލު ހޯދުންތަކުން ދައްކާގޮތުގައި، އެންމެ ވާދަވެރި ސްޓޭޓްތަކުގައިވެސް ކުރީގައި އުޅެނީ ޖޯ ބައިޑްންއެވެ. އެހެންނަމަވެސް، ޚާއްސަ ގޮތެއްގައި މި ސްޓޭޓްތަކުގައި ކެޑިޑޭޓުން ހިންގާ ކެމްޕޭން ހަރަކާތްތަކުގެ ނަތީޖާއެއްގެ ގޮތުން، ނަތީޖާއަށް ބަދަލުއައުމަކީ އަބަދުވެސް މަސްރަހު ދިރާސާ ކުރާ ފަރާތްތަކުން ކުރާ އަންދާޒާގެ ތެރޭގައި ހިމަނާ ކަމެކެވެ.

އެންމެފަހުން ހެދިފައިވާ ޚިޔާލު ހޯދުމުގެ ސާވޭތަކުން ދައްކާ ގޮތުގައި ބޮޑެތި ސްޓޭޓްތައް ކަމުގައިވާ މިޗިގަން، ޕެންސެލްވޭނިއާ، އަދި ވިސްކަންސިންގގައި ބައިޑްން ތަފާތު ބޮޑުކޮށް އުޅެނީ ކުރީގައެވެ. މި 3 އިންޑަސްޓްރިއަލް ސްޓޭޓަކީވެސް، 2016 ވަނަ އަހަރު ޓްރަމްޕް %1 އަށްވުރެ ކުޑަ ތަފާތަކުން ހިލަރީ ކްލިންޓަންގެ މައްޗަށް ކުރި ހޯއްދެވި ތިން ސްޓޭޓެވެ.

ތިރީގައިވާ ޗާޓުން މި ދައްކުވައިދެނީ ވާދަވެރިކަން ބޮޑު ބޮޑެތި ބައެއް ސިޓީތަކުގައި ޚިޔާލު ހޯދުންތަކުން ދައްކާ ނަތީޖާތަކެވެ.

2016 ވަނަ އަހަރު ބޮޑު ތަފާތަކުން ޓްރަމްޕް ކުރި ހޯއްދެވި ބޮޑެތި ސްޓޭޓްތައް ކަމުގައިވާ އައޯވާ، އޯހިއޯ އަދި އަދި ޓެކްސަސްގެ މިހާރުގެ ޚިޔާލު ހޯދުންތަކުގެ ނަތީޖާތަކަށް ބަލާއިރު، ޓްރަމްޕްގެ ކެމްޕޭން ޓީމުން ނަތީޖާ ނެރުމަށް އިންތިހާއަށް މަސައްކަތް ކުރަން ޖެހިފައިވާ ކަމަށް މަސްރަހު ދިރާސާކުރާ ފަރާތްތަކުން ލަފާ ކުރެއެވެ. ސަބަބަކީ މި ސްޓޭޓްތަކަކީ 2016 ވަނަ އަހަރު ޓްރަމްޕް ހިލަރީ ކްލިންޓަންގެ މައްޗަށް %10-%8 ގެ ބޮޑު ތަފާތަކުން ކުރި ހޯއްދެވި ބޮޑެތި ސްޓޭޓްތައް ކަމަށްވާތީއެވެ.