ދީނީ ހޭލުންތެރިކަން އިތުރު ކުރުމުގެ ޕްރޮގްރާމަތަކެއް އަތޮޅުތެރޭގައި ހިންގުމަށް، ކުރީގެ އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދު ފައްޓަވާފައިވާ ދަތުރުގެ ތެރެއިން ފުރަތަމަ ދަރުސްއަށް ބޮޑު ތަރުހީބެއް ލިބިއްޖެއެވެ.
ޑރ.ޝަހީމްގެ އަތޮޅު ތެރޭގެ ސިލްސިލާ ދަރުސްތައް ފަށަފައިވަނީ، ތ.ގުރައިދޫ އިންނެވެ. ގުރައިދޫގައި ރޭ ބޭއްވި ދަރުސްއަޑު އެހުމަށް އެރަށުގެ ގިނަ ބަޔަކު ވަނީ ގޮސްފައެވެ. ރޭގެ ދަރުސް ޚާއްސަ ކޮށްފައިވަނީ ހެޔޮ ޞިއްޙަތެއްގައި ދެމި ތިބުމުގެ މުހިންމުކަމުގެ މައްޗަށެވެ. ޑރ.ޝަހީމް ވަނީ މިމައުޞޫގައި އިސްލާމީ ތާރީހަށާއި، ދީނީ ގޮތުން ޞިއްޚީ ކަންކަމަށް ރައްކާތެރިވުމުގެ މުހިންމުކަމުގެ މައްޗަށް އަލި އަޅުވާލައި ވާހަކަ ދައްކަވާފައެވެ.
ޑރ މުހައްމަދު ޝަހީމް ވިދާޅުވީ ޞިއްޙަތު ސަލާމަތްކުރުމަށްޓަކައި ވެކްސިނ ޖެހުމަކީ މުހިންމުކަމެއް ކަމަށާއި އިސްލާމްދީނަކީ އިންސާނާގެ ދުޅަ ހެޔޮ ޞިއްހަތެއްގައި ހުރުމަށް ބާރުއަޅާ ދީނެއް ކަމަށެވެ. ދަރުސްގައި އިތުރަށް ވިދާޅުވީ ބަލިވުމުގެ ކުރިން ޞިއްޙަތާމެދު ރައްކާތެރިވުމަށް ކީރިތި ރަސޫލާ އިރުޝާދު ދެއްވާފައިވާކަމަށެވެ.
ދިރިއުޅޭ މާޙައުލުގެ ސާފުތާހިރުކަމަށް އިސްކަންދިނުމާއި ދުޅަހެޔޮ ޞިއްޙަތެއްގައި ހުރުމަށް ރަނގަޅު ކާނާ ކެއުމާއި ކަސްރަތުކުރުމަކީ ވެސް ބޭނުންތެރިކަމެއްކަމުގައި ދީނުގެ ދަލީލުތަކުގެ އަލީގައި ވިދާޅުވިއެވެ. ޑރ ޝަހީމް ވިދާޅުވީ ޒުވާނުންނަކީ ކޮންމެ އުންމަތެއްގެ މައިބަދަ ކަމަށާއި ޤައުމު ބިނާކުރުމުގައި ޒުވާނުން ޙިއްސާ އޮންނަންޖެހޭނެކަމަށެވެ. އަދި ހެޔޮ ގޮތުގައި ޒުވާން ޢުމުރު ހޭދަކުރުމަށާއި ޙަލާލު ގޮތުގައި މަސައްކަތްކޮށް ޢާއިލާ ބިނާކޮށް މައިންބަފައިންނަށް ހެޔޮކޮށްހިތާއި ބޮޑެތި މީހުންނަށް ކަމޭ ހިތާ ޚުލްޤު ހެޔޮ ބަޔަކަށް ޒުވާނުން ވާންޖެހޭނެކަމުގައި ޑރ ޝަހީމް ވިދާޅުވިއެވެ.
ޑރ. ޝަހީމް ވިދާޅުވެފައިވަނީ، ދީނީ ހޭލުންތެރިކަން އިތުރު ކުރުމަށް ކުރައްވުމަ ހަމަޖައްސަވާފައިވާ މި ދަތުރުތަކަކީ، އެއްގޮތަކަށް ވެސް ސިޔާސީ ކަންކަމާ ގުޅުންހުރި ދަތުރުތަކެއްނޫން ކަމަށާއި، މިއީ ޢިލްމީ ބޭނުމަށްޓަކައި ލިބޭ ދައުވަތުތަކަށް، ދަޢުވަތު ދޭ ފަރާތުގެ އިންތިޒާމްގެ ދަށުން އެފަރާތަކުން ރާވާ ގޮތެއްގެ މަތީން ކުރައްވާނޭ ދަތުރު ތަކެއް ކަމުގައެވެ.
ޑރ. ޝަހީމްއަކީ، ރައްޖޭގެ އެކި ކަންކުޅުތަކުގައި ދީނީ ހޭލުންތެރިކަން އިތުރުކުމަށްޓަކާ ފާއިތުވެދިޔަ ތަނުގައިވެސް ގިނަގުނަ މަސައްކަތްތަކެއް ކުރައްވާފައިވާ އަދި ކުރައްވަމުން ގެންދަވާ ބޭފުޅެއްކަން ފާހަގަ ކޮށްލެވެއެވެ.
